گوردی اکبر مجلس جانان دا جان سوداسی وار
بولدی لیلانین بلالی باشینون غوغاسی وار
باخدی قلب آئینه سینده واردی محنت سایه سی
انزوا تاپموش همان ساعتده دینین پایه سی
نقش اولوبدور لوح پیماندا ولی ذبح آیه سی
بیر به بیر هر بیر ذبیحین اسمی هم امضاسی وار
دورموش عشقیله ذبیح الله خلیل کربلا
دوره سین آلموش صمیمیتله یتمیش بیر فدا
دللرینده ذکر یا الله و یا رب یا خدا
چون مسلم دور او مأوایه حقین ایماسی وار
گوندروب هند اوغلی شاماتین شقی اشرارینی
یخدیلار ظلمیله دینین مذهبین دیوارینی
آتدیلار دینی یزیدین دوتدیلار دینارینی
معنویتلن بلی مادیتین دعواسی وار
گورمسین زهرا عزیزی دینین اضمحلالینی
بوشلیوبدور دینه خاطر کل ملک و مالینی
ترک ایدوب ناقص قویوبدور کعبه نین اعمالینی
حجدن آرتیخ بولوبدور فیض عاشورا سی وار
کربلا صحراسی سرتاسر تجلی گاه نور
زادهٔ پیغمبر ایلیبدور همان مأوانی طور
ایلسین ایستور زمانین چرخی موسانی ظهور
چون او مأواده خداوند امرینین اجراسی وار
بیر طرف کفرین سپاهیلن دولوبدور یکسره
بیر طرفدن باش وروب یا رب اسفلی منظره
شاه دین بیر خلعت زیبا بیچیبدور اکبره
گون او.گون دور که حسینین عهدینین ایفاسی وار
امر ایدیبدور استقامتلن امام ممتحن
عزم میدان ایلسین شهزاده اگنینده کفن
انبیا گلمیش تماشایه بهشت عدن دن
گوردیلر اکبرده ختم الانبیا سیماسی وار
عرش طاقیندن ملائک فوج فوج ایلور نظر
عشق جولانگاهینی عشقیله عاشقلر گزر
جنت اعلانی حورا و بهشت اهلی بزر
راهی جنت دی اول کس که اونین طوباسی وار
اولدی پیغمبر شبیهی اوندا که مرکب سوار
آچدیلار دل ال دعایه گوتدولر خرد و کبار
اوغلومی لیلا دیدی حفظ ایله ای پروردگار
لشگرین قان توکمه ده یا رب مگر پرواسی وار
تل دن بیر ایلدیریم شاخدی دوتوب اول دشتی رود
فرض ایدوب لشگر زمینه آفتاب ایلوب صعود
گوردولر تز تز اَنور قالخور گوگه آهن عمود
مرحبا اولسین حسینین بیله رزم آراسی وار
ذوالفقارین برقی پی در پی شاخور اود قازانور
گه گورورسن تز خموش اولدی گهی تز تز یانور
هر کیمه ایلور اصابت باش گیدور قول تولانور
دال با دال پیکر دوشور تپراقه رهپیماسی وار
گه اصابت ایلیور باشدان قلج قاش پارچالور
گه دگور قاشدان دو نیم ایلور گیچور باش پارچالور
باش ندور یا قاش ندور تپراق سوکور داش پارچالور
احسن احسن اکبرین شمشیر برق آساسی وار
اورگدور تیغیله درس آدمیت دشمنه
تنگ اولور گه قلب لشگر میسره گه میمنه
یوخدی هیچ رزم آورین امیدی چخسین ایمنه
دم به دم خاموش جنگه لشگرین شوراسی وار
جنگدن صحبت دوشور چوخ کیمسه یه آسان گلور
لیک یردن توز دومان قالخور هوادن قان گلور
لحظه ده هر بیر جانین قصدینه پیکان گلور
لیلی نون قلبینده الله آه و واویلاسی وار
گون شاخور گوگدن سوسوزلوق طاقت اکبردن آلوب
خسته لیک چوخ چوخ سوسوزلوقدان اونی دلدن سالوب
غیبدن سس گلدی لیلا اکبرون یالقوز قالوب
قانه غلطاندور گیدوب جان دوغرانان اعضاسی وار
بیر زمان سس قوپدی قزلاردان اوجالدی الامان
یوز شتابان قویدی میدانه امام انس و جان
گوردی قان ایچره جوان اوغلون اولوبدور باغری قان
ایله فکر ایتدی یرین اوستونده قان دریاسی وار
اگلشوب مقتلده آهسته اولان دنیایه شاه
اکبرین بیر دوغرانان اعضاسینه قلدی نگاه
دوتدی یوز درگاه قدسه سویلوب الله اول گواه
گور کیمین قرآنه من تک فدیهٔ زیباسی وار
هانسی شاعر اکبرون شأنینده ایستور شعر یازا
اولیندن ذکر و فکری کربلا دور کربلا
سن بول اکبر جانی بیزدن یوز دولاندورما آقا
مدعی دور بو "امینی" سن کیمی مولاسی وار
- شنبه
- 23
- مرداد
- 1400
- ساعت
- 17:43
- نوشته شده توسط
- یوسف اکبری
ارسال دیدگاه