قورموشدیلا بیر بزم ملوکانه یزیده
ایتمیشدیله بیر مسجدی میخانه یزیده
چوب الده حسین باشی او شومین قباقیندا
ویرماق نظری واریدی قانلی دوداقیندا
مستیدی خماریدی سوز آغزیندا آزیردی
هر نه دانشیردی اونی کاتب ده یازیردی
القصه اونین ایسته دیگی حاصله گلدی
دوردی ایاقا قولاری باغلی دیله گلدی
سجاد آقا فرمایشینی ایتدی یزیده
تأثیر ایلیبدور سوزی اول شوم پلیده
امرین یتروب اول شرر الناسه او حضرت
بیر نچه دقیقه دیدی سن ور منه فرصت
اذن آلدی ایاقین قویا بیر منبره سجاد
صلوات و سلام ایلدی پیغمبره سجاد
ایام گتورمیشدی او بیچاره نی درده
گوز یاشی روانیدی فقط عارض زرده
ایتمیشدی اونی کرب و بلانین غمی خسته
صبرین گوجونه چخدی ولی منبرین اوسته
بیر خطبهٔ برّا دیدی اول کان شجاعت
حیران و خمار اولدی او گفتاره جماعت
منطقله سوزین باشلادی حسب و نسبیندن
هیچ گونه کنار اولمادی اصلا ادبیندن
اوّل دیدی من باقیهٔ کرب و بلایم
هم سرمد و سر خیل بو فوج اسرایم
اول باشه یزید ایندی اوزوم نور دو عینم
سجادم و مظلوم علی بن حسینم
زهرا که منیم مام کباریمدی حیا ایت
زیبا آدی آغزیمدا شعاریمدی حیا ایت
جدیمدی محمد منه مفخر گوزل آدی
الله اونی گوندردی مسلمانلارا هادی
قرآنی او مولا گتروب آیه به آیه
جبریل اونا خادم دی ولیکن بیزه دایه
اول سرور ایجاد بیزه میر حرم دی
هر خلق دن افضل دی اوزی کام کرم دی
انصاف ایله سوز گر اونا ذریه منم من
گیت ممکنی اولسا اوز آتاندان خبر آل سن
قرآن مبین عرش خدادن بیزه گلدی
آیا دیگوروم سن اونا کیم سن بیزه گلدی
منبردن انوب گلدی اشاقه شرف الناس
سسلندی حرم لر هامی یا حضرت عباس
تأثیر ایدوب اول ناکسه فرمایش بیمار
مخلوقین ایچینده اوزینی ایلمه سین خار
اوچ گون دیدی قصریمده عزادار اولاجاق سوز
تسکین وروب بیر بیره دلدار اولاجاق
ایتدوز منی بو غصلی جریانه پریشان
جانیم بو حسینیم یارالی جانینه قربان
لعن ایلسین الله گوروم ابن زیاده
بی شرم و حیا سالمادی اللهینی یاده
الدوردی ذلیلانه حسین بن علی نی
خاموش ایلدی ظلمیله نور ازلی نی
عفو ایله منی سوئله دی بیمار امامه
آگاه دگیلدوم که گتیردوم سیزی شامه
هرچند حسین قانینه مولا عوض اولماز
هر قطره سینه مین دانا دریا عوض اولماز
تقدیم ایدورم من سیزه مقدار طلانی
فکر ایلمیون صفحهٔ دلدن سیله قانی
دستور وروب گتدیله هر غارت اساسین
سویموشدیلا هر بیر اُلنین قانلی لباسین
بیردن قولاقا وای بالا یاندیم سسی گلدی
لیلایه علی اکبرین عمامه سی گلدی
آغلاشما دوشوب هامی نین احوالینی قاتدی
اول زینبه ده قارداشینین کوینگی چاتدی
بیر خرداجا اود دوشدی دل شیخ له شابه
گستردیله قونداقی ده بیچاره ربابه
بیر قانلی عَلَم گلدی دیریلدی شرف الناس
زینب دیدی قارداش گوروم اُلسین باجون عباس
غم قافله سین کافر دوران یولا سالدی
اهل حرمین باغرین ایدوب قان یولا سالدی
دستور وروب قافله دن دوتدولار آمار
گوردیله ولیکن بیری کم گلدی قالان وار
دوردی ایاقا غصه لرین همدمی زینب
آلدی الینه قانه باتان پرچمی زینب
یول باشلادی تز منزل ویرانیه گلدی
گلدی ولی بولمم نجه اول هانیه گلدی
گوردی دانشور فاطمهٔ ثانیه آغلور
اوز اشکینی رخسارینه جیحون کیمی باغلور
تز تز دیور ای باجی آماندی بیله یاتما
اهل حرم آخر نگراندی بیله یاتما
غم قافله سی یثربه یولاندی رقیه
دور منله گیداخ قلبمیز اودلاندی رقیه
سنسیز وطنه من نجه رجعت ایدوم آخر
نیلوم که اسور گلمور ایاقیم گیدوم آخر
دور منله گیداخ یثربه دور یاتما رقیه
قربانون اولوم دور منی آغلاتما رقیه
ویرانه ده بو درد و ملالون منه بسدی
جبراً داغلان جاه و جلالون منه بسدی
از بس که خانم ایتدی فغان آغلادی یاندی
فریاد دلی عرش معلایه دایاندی
اهل حرمه قافله سالاریدی زینب
عصرینده بلی رونق بازاریدی زینب
حامی دی غرض عترت پیغمبر دینه
عباس علمدار علمین آلدی الینه
دوشدی قباقا دالدا نظامیله حرملر
هر تک تکی اما یورولان آهویه بنزر
اولموشدی حسین آدی اونون دلده شعاری
اَگدی یولونی کرب و بلا سمتینه ساری
اگلشدی یره بولمدیلر نیلدی زینب
قارداشینه قوزاندی سلام ایلدی زینب
عرض ایتدی حسینیم منه غم تیری دگوبدی
شامین سفری قدیمی بیر یوللوق اگوبدی
قان آغلور "امینی" یازان عنوانینه قارداش
اجرت ور اونون غصه لی دیوانینه قارداش
- شنبه
- 23
- مرداد
- 1400
- ساعت
- 19:56
- نوشته شده توسط
- یوسف اکبری
ارسال دیدگاه