ای ظلمله دالدان کسیلن باش سنه قربان
یاد ایلموسن زینبی قارداش سنه قربان
منده سنی گوردوم اُلم ای کاش سنه قربان
سنسیز داخی بو دنیا منه فایده ورمز
اودلاندی بو جان مزرعه سی عایده ورمز
گوردی سنی جان دفترینی بوکدی رقیم
هر نه که الینده واریدی توکدی رقیم
آیرلدی بیر آیری طرفه کچدی رقیم
بو چرخی دولانموش فلک اونلان سوزه گلدی
بیرده باجون السین گوزلیدی گوزه گلدی
بو چرخ فلک دن سنه چوخلی گله مندم
قول باغلیام و بستهٔ زنجیر و کمندم
مدتدی بو ویرانه ده قارداش ایله بندم
قارداشلاریم الموشدی بسیدی منِ زاره
بو نازلی قیزیم دا منی یاندیردی دوباره
دنیانین حسین هیچ یوخوموش مهر و وفاسی
بیهوده شعاریمیش ایله صلح و صفاسی
ظالم فلگین تک منه قالمشدی جفاسی
گوستردی اوزین کرب و بلاده منه قارداش
یوخ شرحه نیاز ایلیم آخر سنه قارداش
غم تیری سن الدون که منیم سینمه دگدی
ذلفیم که آغارمشدی دگوب قدیمی اگدی
ایندی دیورم کاش منه بیر یولدا دگیدی
جام اجلی منده ایچیب باری الیدیم
گورمیدیم اقلا بو گرفتاری الیدیم
سن جام شهادت چکوب اوز باشیوه گیتدون
وردون اونیراوز اوغلیوا قارداشیوه گیتدون
قربان اولوم اول گوزده کی گوز یاشیوه گیتدون
قالدون دل طوفاندا قزل قان آراسیندا
قویدون منی ده آتش نیران آراسیندا
چوخ تنگه بیزی لشگر کین قویدولا قارداش
سیم و زری زجریله عمر سویدولا قارداش
فکر ایلمه سرقتدن اولار دویدولا قارداش
سندن صورا اهل حرمون یاندی تالاندی
فریاد ایلدیم گوگلره نالم اوجالاندی
عزت گلومیز قالدی خزانلار قباقیندا
یا اون ایکی مین نامه قباقینداقباقیندا
نفسین گوجونه یولدان آزانلار قباقیندا
سندن صورا قارداش ایله طوفانلی یل اسدی
اسدیگجه منیم صبریمی قارداش جانی کسدی
سن قتلگه عشقده ایجاز ایلیردون
افلاک معلایه که پرواز ایلیردون
جناته گیدیردون ولی چوخ ناز ایلیردون
آغلوردی ملائک سنه حیرانیدی قارداش
باشون یوخودی پیکرون عریانیدی قارداش
لطفیله گلوبسن گجه ویرانیه قارداش
گوردی سنی یومدی گوزین اول هانیه قارداش
اول گلمگون اولدی منه بیر ثانیه قارداش
یولدوم باشمی باشیوه شاباش اولا قارداش
فکر ایلمورم سن کیمی قارداش اولا قارداش
شاد اول سن "امینی" بو قاپی باب حسین دور
محکم یاپوش عالملره ارباب حسین دور
بوش سالمیاجاق دور یولا قیل تاب حسین دور
اوز نوکری سن دفتر و دیواندا آدون وار
اوزگه قاپویا گیتمه اوز اربابوه یالوار
- شنبه
- 23
- مرداد
- 1400
- ساعت
- 20:2
- نوشته شده توسط
- یوسف اکبری
ارسال دیدگاه