گل ای باجی قان لخته لرین سیل دوداقیمدان
دقتله باخ احوالیمی سن بیل دوداقیمدان
قلبیم آلشیر شعله چیخور جان جگریمدن
یاندیم توکولور قان باجی بو دیل دوداقیمدان
هی لخته لنور هی توکولور قان جگریمدن
افلاکه چیخور ناله و افغان جگریمدن
بیر طشت مهیا ایله زینب الورم من
یوخ طاقتیم الان چیخوری جان جگریمدن
زهرین اثری اوخ کیمی دگدی اورگیمدن
یاردی سینمه می رد اولور الان کورگیمدن
هر نه چکورم اوز عیالیمدان چکورم من
بیر ضربه ویریب جُده منیم شاه رگیمدن
دور گل باشیم اوستونده اوتور قوی تاپوم آرام
قارداشیم اویانسا اونی کیم ایلیجاق رام
منسیط اونا غم غصه فراوان اولاجاقدور
هجریمده یانیب آغلیاجاقدور سحر آخشام
هجریمده یانیب دائمی قان آغلیاجاقدور
زینب باخاجاقدور سمه دل داغلیاجاقدور
آخر بو جماعت اونا شورا قوراجاقدور
یوز هر هایانا قویسا یولین باغلیاجاقدور
دشمن لر اونین حقین الیندن آلاجاقلار
جبراً یولا بیر آیری دیاره سالاجاقدور
باشوندا سنونده اولاجاق اوندا قیامت
بیرگون اولاجاق دوره وی لشگر آلاجاقلار
قدرت که گیچوب ایندی معاویه پلیده
تقدیم ایده جاقدور بولورم اوغلی یزیده
عمالی یزیدینده بد عادت یاتاجاقدور
امنیت جان قالمیاجاق آل علی ده
دوران دولانیب گلدی حسینین او زمانی
عمالی یزیدین هامی سی دشمن جانی
اودلاندی خیام علوی قوپدی قیامت
تپراقلارا القصه توکوب خون خدانی
یازدیقجا "امینی" بو اسفلی جریانی
عرشه اوجالور دلدن اونین آه و فغانی
اوز دردینی اربابینه راحت دیه بلکه
الدن ولی قویمور یره هیچ بحر بکانی
- یکشنبه
- 24
- مرداد
- 1400
- ساعت
- 10:48
- نوشته شده توسط
- یوسف اکبری
ارسال دیدگاه