خلقت آفاقی منور دی سنون گل جمالوندان
دویماز عالم تا دم محشر او حسن و کمالوندان
آرزومندیدی هر لب ویرماقا بوسه خالوندان
(برگردان)
یا محمد یا محمد ختم الانبیا محمد
روی دینه عالمینه ورموسن جلا محمد
مقدمونلن بو جهانین دولوسی صلح و صفا دور
سن اوزون خیر وراسن آدون هر درده دوادور
آننوین نوری جلادور سر به سر لطف خدادور
به به الله بو گحه هر گجه دن پر ثمر اولدی
ظلمتین ایلچی سی شرمنده قییتدی سحر اولدی
آب دریاچهٔ ساوه چکیلوب خشک و بر اولدی
اول گجه سن گلجیدون که گوزل یللر اسوردی
گورمک ایستوردی جمالون چخماقا آی تلسوردی
حسرتین بند و طنابین وصلتین تیغی کسوردی
جمله بتخانه و بتلار بو گجه سیندی تالاندی
سحر لر بی اثر اولدی قلب جادو یارالاندی
شاهلارین تختی اگیلدی کاخ کسری آرالاندی
نقل ایدوب انجیل و تورات گلجک ختم پیمبر
آدیوی اهل کتابین هامی سی ایلیوب ازبر
انتظاریدی اورکلر سندن ای شافع محشر
عالم ذرده قویولموش باشیوا تاج نبوت
سنله خلاق وروبدور خلقت عالمه قوت
آیریلیقلار سیندی سن سویله جگون وحده وحدت
قلبلر شاد و خرامان دی که بو خوش خبر اولدی
گجه نین ظلمتی ختمه یتوب آیدین سحر اولدی
سن که گون مثلی اوجالدون امتون مفتخر اولدی
مدحوی یازمش "امینی" ایله سین الده کتابت
چون اولوب عشق مریضی اول طبیب ایله طبابت
سن حسین جانی گناهین عفو قیل روز قیامت
- یکشنبه
- 24
- مرداد
- 1400
- ساعت
- 11:3
- نوشته شده توسط
- یوسف اکبری
ارسال دیدگاه