خلقت آفاقینه خورشید منور زهرا
معرفت برجینه زیباترین اختر زهرا
پروش یافتهٔ مکتب قرآن مبین
سرخگین لالهٔ گلزار پیمبر زهرا
اولین گوهر گنجینهٔ عصمت زهرا
دومین مظهر آیینهٔ همت زهرا
سومین شافعهٔ روز قیامت زهرا
چارمین چارهٔ بیچارهٔ محشر زهرا
خلق ایدوب گور نه جلالتده اونی رب جلی
رتبه ده ام الائمه اوزونین یوخ مثلی
مشکلی دی اولا بیر آیرسی هم کفو علی
حق بویورموشدی که اول زوجهٔ حیدر زهرا
حرمتی که اونا الله ایلیبدور حسنات
کشتی نوحه همان حرمتیلن وردی نجات
بسته دور فاطمه نین رأیینه کلاً عرصات
اهل محشر هامی سی یکسره سسلر زهرا
اول حدیثی که گوزل اسمی کسادور یاران
کل عالملر اونون ذکرینه قالمش حیران
شأن زهرانی بیان ایلوری حی منان
خلقتین لوحینه اولموش بیله زیور زهرا
کون و امکانی یارالداندا خدای سبحان
ممکناتین بویوروب جمعینه وردیم امکان
اوز ارادمله یارانمش بو معظم انسان
اولموش عالم بویی انسانلقا مفخر زهرا
سینهٔ ختم پیمبرده دورولموش بیر گل
سرزمین حق داورده بورولموش سنبل
بوتهٔ غصه و غم لرده یورولموش بلبل
کهنه دیواریده یا غملی کبوتر زهرا
اوندا که دهری وداع ایتدی رسول مدنی
مهر انسانلقی سیندیردیلا اول قوم دنی
قویدولار اللری قوینوندا علی نی علنی
سالدی چون کشتی طوفان زده لنگر زهرا
شیر یزدان اوزی مستغرق دریای محن
مرد بی عاطفه قصد ایتدی نچه روبهیلن
جبرئیلین اذن آلان درگهی یاندیردی علن
تاپدی بو مسئله ده حالت دیگر زهرا
ساقی کوثره غم غصه چاقیندا غمخوار
دائماً مجمع اغیار قباقیندا حرار
سینه سین دلدی حیاطین بوجاقیندا مسمار
اولدی آلقانیله باشدان باشا احمر زهرا
چکدی غم غصه لر اطرافینه بیردن هاله
فکر ایدوبلر که دورانماز داخی یردن لاله
قالخوب افلاکه همان دمده جگردن ناله
قلبی سوزان و پریشان و مکدر زهرا
ایله بیر نالهٔ جانسوز چکوب شیر مثل
برکدوب سینه سین آتدی عربی معجره ال
قنفذیله اولوب آماده ایده جنگ و جدل
قاف نصرتده آچوب گوردوله شهپر زهرا
دوشدی بیر ضربتیلن عرش حقین قندیلی
صورت حضرت زهرا یه دگن تک سیلی
اولدی گل صورتی سیلی اثریندن نیلی
غملی گلشنده سولان غنچه یه بنزر زهرا
دوتدی یوز درگه والایه چکوب سینه دن آه
کای منیم منتقم آللهیم اولوبسان که گواه
انتقام آل بو جفا کاریدن الله الله
روز محشرده اولا شاهد کیفر زهرا
چاتدی بیر ناقیه نچه گونونین غصه سینی
آه و افغانیله سالدی یولا غم ناقه سينی
آلدی همسایه لر از بس که یانقلی سسینی
کیم گلوب سویله دی غمخانه دی ایولر زهرا
تیر آهون ددیلر قلب سماواتی دلر
آه و افغانوی آهولر ایشیتدیقجه ملر
یا گونوزلر بیر آز آرام اوتور یا گجه لر
سد ایدور آغلاماقون عابره معبر زهرا
قویدی آرام الین اشکیله بویانمش گوزینه
یعنی لبیک جوابی اولا خلقین سوزینه
دوتدی تصمیم تسلی وره بیر اوز اوزینه
ایندیده معرفتون خلق دیللر زهرا
دوردی آهسته خطاب ایتدی امام زمنه
خلقین عورتلری ایراد ایدور ایندی که منه
اذن ور باری گونوزلر گیده بیت الحزنه
اولماسین مورد تکرار مکرر زهرا
گورمدیم بیر گونی گونلردن اولام شاد و خرام
ایلدیم اوز گونوزوم تک سیزه ده گوندوزی شام
من گرک قونشولاریمدان بله حلیت آلام
آلماسا برگ رضایت اله نیلر زهرا
قورتاریب روحیمی روحیه می غم غصه منیم
ظلم ثانیله سولوبدور هامی باغ و چمنیم
چوخ مواظب اول امانتدی حسین و حسنیم
ایلسین قوی دل قبرستانی نی مقبر زهرا
- یکشنبه
- 24
- مرداد
- 1400
- ساعت
- 11:31
- نوشته شده توسط
- یوسف اکبری
ارسال دیدگاه