دللر گینه دریای غمه غرق اولوب ای دل
گلزار نبی دن گینه بیر گل سولوب ای دل
سامرا دیارینده عزا بزمی قوروبلار
صاحب زمانین جدینه یاسه اوتوروبلار
معناده ملک فوجی قرا پوش اولوب ای دل
فانوس هدایت نجه خاموش اولوب ای دل
دنیانی وداع ایلوب علی النقی مولا
باب الحسن العسگری ابن التقی مولا
اونمونجی شه ملک ولایت گیدوب الدن
الله تعالی ایچون آیت گیدوب الدن
گوگلر بورونوب رنگ غم و ابر ملاله
حسرتله تیکیب گوز هامی بیر دوتقون هلاله
یرلرده دیسم وار یری جن و بشر آغلور
هر کیمسه قضایادن اولور باخبر آغلور
ای باد صبا جنت الاعلایه خبر ور
جنت ده گیدوب حضرت طاهایه خبر ور
عرض ایله اجل هادی دورانی آپاردی
قویدی آرادا جسمی نی بیر جانی آپاردی
آگه ایله حیدر باباسین هر جریانه
گلسین حسن العسگری آغلور یانا یانه
بو محنت غمباریده مطلب اله گلسین
زهرایه اولور گرچه چتین مرحله گلسین
اما حسنه زهر سوزون سالما آماندی
احوالی اونوندا بولوسن ایندی یاماندی
چون وعده وروب شاه شهیدان اوزی گلسین
یولاردا قالیب صاحب عصرین گوزی گلسین
الان دیور ای قانی آخان کرب و بلایه
گلسن گلجخ سنله ننم سایه به سایه
اوندا نجه غم غصلی جریانیوه گلدی
دشمن ایوینه شام غریبانیوه گلدی
توکدی گوزی نین یاشینی ایسلاتدی فراشی
گوردی که حقارتله قویوبلار کُله باشی
مصداق دی بو باش بویوروب آیهٔ نوره
هانسی شل اولان ال گتروب قویدی تنوره
بسلردیم اوغول من باشیوی گللرین اوسته
دور سینمه گل یاتما بیله کللرین اوسته
آفاق اورگین تیر مصیبتله اویوبلار
بولمم گوره سن ظلم ده شام اهلی دویوبلار
دوشدوگجه آدون یادینه قان آغلار "امینی"
هر ماه محرم ده قرا باغلار امینی
- یکشنبه
- 24
- مرداد
- 1400
- ساعت
- 13:44
- نوشته شده توسط
- یوسف اکبری
ارسال دیدگاه