یا للعجب نه غصلی مأوادی سامرا
باشدان باشا محن لره دریادی سامرا
اولمیدی کاش ازلدن اونین آدی سامرا
صاحب زمان دیاریدی اما صفاسی یوخ
نسبت قوناقه اهلی نین اصلا وفاسی یوخ
بیر جوت قوناقی واردی بو شهرین مدینه لی
ذریّه و سلالهٔ پیغمبر و علی
ظلمت ایچینده هر بیری بیر نور منجلی
هر تک تکی چراغ هدایت دیلر بیزه
الله ذوالجلالیدن آیت دیلر بیزه
سن ای صبا یتورگیلن اول شه لره سلام
اونلار سبب دی خلقت عالم تاپوب نظام
نظمیله کهکشان دولانور گوگده صبح و شام
هر لحظه حق لن اولارین ارتباطی وار
اونلاردی مطلقا هامی مخلوقه اعتبار
ایلردیلر ولیک غریبانه زندگی
غربت ده چوخ چتین گلر انسانه زندگی
جداً غریب ایچون اولار افسانه زندگی
جان بذل ایدوب خلاصه علی النقی امام
شهرین باشین دومان بوریوب اولدی تیره شام
قوینوندا ال دوروب حسن العسگری باخور
حسرت گوزیندن اشک روان باشلیوب آخور
آغلور یانور جهان اورگین یاندیروب یاخور
هردن نظر سالور صاقا هردن باخور صولا
هردن تیکور گوزین گوروسن انتظار یولا
سسلور هایانداسان بابا مرتضی علی
جولاندا دور باشیمدا قدر هم قضا علی
گلمور ندن غریب خراسان رضا علی
سن قیل بابا عنایت اوزون تز هرایه گل
یوخ بیر کسیم یاماندی گونوم سامرایه گل
تز گل آتام غریب و غریبانه وردی جان
جاندان سالیب زمانه اونی ای شه جهان
بیجا دگول دیسم بیز ایچون اولدی حشر عیان
من بو غم و ملاله مدام آغلارام بابا
عمروم نقدری واردی قرا باغلارام بابا
عنوان اولوب بو غصلی بیر ماجرا بابا
هی یادیمه دوشور محن کربلا بابا
مظلوم الن حسینه دوتور دل عزا بابا
آتدان دوشنده حالینه باشلاندی مرثیه
قدوسیان گلردی حسین وای دیه دیه
یاز ای قلم بو مطلبی بیر داستان کیمی
تقدیم ایله زمانه امامینه جان کیمی
آغلور "امینی" ده بیر نوحه خوان کیمی
یابن الحسن بو امتی آواره قویما گل
گللر آچور چمنده گیدور خاره قویما گل
- یکشنبه
- 24
- مرداد
- 1400
- ساعت
- 13:46
- نوشته شده توسط
- یوسف اکبری
ارسال دیدگاه