حاکم اولموشدی جهان اهلینه بیر لیل سیاه
گورسنمّز دی طریقات الی الله ده ماه
جمله وادی لره بش قرن دی مسدودیدی راه
وضع ناجوریدی هیچ کیمسه تاپانمازدی پناه
سینه لردن ایله قالخاردی گوگه دودهٔ آه
عاطفت دن خبر انسانه محالیدی غرض
دوتموشیدی هره نین قلبنی بیر نوعی مرض
بت پرستان زمان ظالم و طغیان گریدی
شهر و برزن دولی باشدان ایاقا کافریدی
عار و عفت قره گیمیشدی سیاهی سریدی
شرمی دوندان دونا سالمشدیلا دونسوز شریدی
بعضی قارداشلارا بعضی باجیلار همسریدی
گرم بازار ملاقاتیدی قارداش باجیا
رنگ لر زنگه قارشمشدی شیرین لر آجیا
جاهلیت ایله سالمشدی جهانی خطره
خیره شر مایه سی ورمشدلا هم خیری شره
هیچ کس آلمازدی حلالیله حرامین نظره
سودیگین هر گجه بیر یانه چکرمیشله هره
چرخ دون ورمشیدی فرصتی بیر عده لره
زورلولار زورسیزی باغلاردیلا زنجیر غمه
عادت اولموشدی دوزردی هامی ظلم و ستمه
انسان انسانلقی سالمشدی الیندن یره لاب
محو اولونموشدی حیا حرمتیلن حجب و حجاب
گل اولارمش ایله گلشنده آچان وقته گلاب
باغبانلار ندی بولمزدی گناهیله ثواب
حق لن باطلی قاتمشدی هامی شیخ له شاب
حفظ ناموس و شرف ایلماق اولمازدی بلی
قویمامشدی بیری سالم قالا غارت گر الی
چوخدان ایستوردی خلاصه اورک آیینه سی نور
نور گیزلینده گزردی اونیلن شور و شعور
یاخشی لار قزلارین ایلردی بلی زنده به گور
عاطفت مکتبی باغلانمشدی جور به جور
ظلم لر زوری لر افشاگری لر فسق و فجور
عیش و نوش و می و میخانه هامی مست و خمار
بدتر اوندان باجی قارداشیله اویناردی قمار
جداً انسان اوزی اوز اگنینه گیمیشدی قرا
مردمین ایولری اولموشدی فقط ناله سرا
مکه ملکینده قالور کوه حرا غار حرا
جبرئیلیدی همان غارده هم خیر ورا
چکدی ایش بیر یره بیردن بیره بی چون و چرا
وردی فرمان خداوندی رسول زمنه
سانکه ببر زلزله دوشموشدی همان انجمنه
حاصل اورگتدی رسول زمنه روح الامین
عرض تبریک له وردی الینه دین علمین
کل سیاره لرین ایچره عزیز اولدی زمین
ملتی که اونی ابلیس لر ایتمشدی کمین
مین مصیبت له داغتدی هامی نین درد و غمین
چکدی مخلوقی جهالتدن عدالت یولونا
گلدی بیر عده لر البته که راحت یولونا
وردی بیر خط عدم بت لارا بتخانه لره
آتمش اوچ ائل شرف اورگتمده فرزانه لره
قویمادی ال آچا فرزانه لر افسانه لره
آشنالر یاتا فرصت دوشه بیگانه لره
سالدی امنیتی هر خانه و کاشانه لره
یاتمش انسان لاری قالخزدی بلی وردی نجات
لیک بیر عده لر الموشدی ایچیب آب حیات
لیل مبعث که اونی احمد و محمود گوروب
بیر عنایاتیدی که مخلوقینه معبود گوروب
امت اول واقعه دن گور نقدر سود گوروب
شاد اولوب یاخشی مسلمانلاری مسعود گوروب
افتخار ایلدی هر ساجدی مسجود
گوروب
اشرف ما خلق اللهه وروب رب جلی
کل آیات کتاب الله و زهرا و علی
لیل مبعث ده جهان طُرفه گلستان اولدی
مکه مانند خود جنت رضوان اولدی
انبیا اشرفی دنیایه سلیمان اولدی
گیتدی معراجه حق داوره مهمان اولدی
قهرمانیدی دوشوب دللره دستان اولدی
سالدی دلدن دله دستانی "امینی" بو قدر
انتظارین چکور ایتسین اونا اربابی نظر
- یکشنبه
- 24
- مرداد
- 1400
- ساعت
- 14:15
- نوشته شده توسط
- یوسف اکبری
ارسال دیدگاه