قویدی اکبر اوندا که کونه قدم
آچدیلار شادلیق کتابین دم به دم
دم ظهور ایتدی داغلدی درد و غم
گوردی هرکس مه جمال اکبری
یاد ایدوب صلواتلن پیغمبری
شرق یثرب دن گوتورلندی حجاب
ایلدی چهره نما چون آفتاب
شاد و خرم دی هامی شیخیله شاب
اکبری الله اکبر پای وروب
حضرت عباسه الحق تای وروب
خلقتین گنجینه سینده درّ ناب
مایهٔ مافوق آل بوتراب
خَلقاً و خُلقاً خود ختم مَآب
غیرتاً مولا علی المرتضی
خصلتاً عیناً امام مجتبی
ای گوزوم قیل بیر نظاره اکبره
اوخشیور سیماسی دوز پیغمبره
شکر اولا مینلرجه بنده پروره
خلق ایدوب خلاق عالم نوریدن
حُسنی گورجک دور ملک دن حوریدن
احسنت آئینه سینده صاف نور
شرق یثرب دن او نور ایلوب ظهور
هیکلی باشدان باشا شور و شعور
لیلی نین باشین اوجالدیب گوگلره
فخر ایدور لای لای دیَنده اکبره
صورتی آئینهٔ ایزد نما
قلهٔ حریت اوستونده هما
راه عشقه عاشقانه رهنما
حق اونی ورمیش حسینه بیر صله
رهروان جنته سر قافله
چوخلی شاهلار ایلیوبلر آرزو
نهر القم دن گلوب آلسین وضو
بوینی چیگنینده دایانسین روبرو
صدقلن عرض ارادت ایلسین
مرقد پاکین زیارت ایلسین
حی داوردن عنایت دور علی
حضرت یزدانه آیت دور علی
ابن سلطان ولایت دور علی
روح با ایمان دی فرزند حسین
رتبه ، شهزاده حسینه نور عین
چیگنینه آلمشدی قرآن بیرقین
قاف حریتده قالسین اهل دین
ایندی ده رزمنده لر ایلور یقین
کربلاده اول همان بیرق اسور
ریشه دن کفرین جیلون پیلور کسور
اول جوان الحق شجاعت کانی دور
جسم قرآنین ثمرلی جانی دور
جدی کانون شرف ارکانی دور
کربلاده قد و قامت ایلیوب
قدینه احسن قیامت ایلیوب
چون علمدار حسین عباس دور
اهل درک و فهم دور احساس دور
فوق العاده دینینه حساس دور
پادشاه کربلایه یار اولوب
عاقبت پیغمبره زوار اولوب
سن "امینی" ایلیورسن افتخار
صاحب عصره چکورسن انتظار
تا گلوب ایتسین عدالت برقرار
سیر قیلسین کربلا میداننی
اکبرین آلسین عدو دن قاننی
- یکشنبه
- 24
- مرداد
- 1400
- ساعت
- 14:26
- نوشته شده توسط
- یوسف اکبری
ارسال دیدگاه