مرحبا گوهر یکتادی حسینین باجی سی
درّ گنجینهٔ تقوادی حسینین باجی سی
عصمت الله قزی کانون حیا کامله سی
سینه پروردهٔ زهرا دی حسینین باجی سی
شیر زن شیر دلاور قزی زینب دی آدی
قالدی زینب آدنین هامی آغزلاردا دادی
رتبه ده شأن ده مریم دن او بانو اوجادی
نو گل گلشن طاهادی حسینین باجی سی
کوکب مهردی اسپهر وفا الدوزی دی
سفرهٔ مهر و محبت دادی دی هم دوزی دی
بیر خانم دور آناسی ختم پیمبر قزی دی
اوندان ارثیهٔ والادی حسینین باجی سی
اولاً حُسن و ملاحتده خانم تک یارانیب
دخت پیغمبر حق مثلی مبارک یارانیب
حُسن یوسف ندی اونداندا بو گورچک یارانیب
فخر یوسف نه زلیخا دی حسینین باجی سی
چون علی، زینب کبری ده ده غیرت واریدی
فاطمه مثلی بو مرحومه ده همت واریدی
استقامت واریدی روح قیامت واریدی
قهرمان یلیل هیجادی حسینین باجی سی
کربلا واقعه سینده که اولوب غرق بلا
بیر بلین باغلادی محکم اوزون آتدی قباقا
سسلنوب دور عُمَره باشیوی سالما اشاقا
گورموسن بی کس و تنهادی حسینین باجی سی
ساتموسان دینیوی دنیایه ریاست تاپاسان
یا که ری ملکی الونده قالا ثروت تاپاسان
قویمارام سن داخی بوندان بیله عزت تاپاسان
بول که سندن ده توانادی حسینین باجی سی
هرنه دن خاطر قرآنه الین اوزدی حسین
الدوروب سوز هامی انصارینی یالقوزدی حسین
گرچه بو عرصه ده یالقوزدی اوغولسوزدی حسین
لیک اوغولدان اونا اولی دی حسینین باجی سی
وردی رخصت دل طوفاندا خانم گوز یاشینا
گوزلرین تیکدی تعجب له حسین قارداشینا
اللرین قالخزوب آهسته آپاردی باشنا
گوردولر واله و شیدا دی حسینین باجی سی
آخرین لحظه ده میدانه شه ایلوردی شتاب
غصه دن دختر خیر البشرین قلبی کباب
قیلدی بیر نحویله بو جمله نی مخیمده خطاب
قوخمیون شیر دل آرادی حسینین باجی سی
نطق زینب له تاپوب قدرت حسینین اورگی
حق طرفداری علی مظهری قرآن کمکی
سویلیوب فاطمه ورمشدی بو نان و نمکی
عشق اولا صبرده دریادی حسینین باجی سی
بزم منطق ده یازیلار همهٔ اهل کمال
گلمیوب زینب کبری کیمی شیرین مقال
شیوهٔ نطق و بیان دا اوزینه آلدی مدال
دائماً حق سوزه گویادی حسینین باجی سی
بیر خانم دور که خانملار باشینا تاج اولوری
بیر خانم دور که خانملار اونا محتاج اولوری
صبر ایدوب هر نجه عظما غمه آماج اولوری
یاز "امینی" اوزی عظما دی حسینین باجی سی
- یکشنبه
- 24
- مرداد
- 1400
- ساعت
- 16:25
- نوشته شده توسط
- یوسف اکبری
ارسال دیدگاه