اذن آلدی شه کرب و بلادن اله قاسم
سرعتله یتوردی اوزینی مقتله قاسم
سالدی قوشونین قلبینه بیر ولوله قاسم
سسلندی قوشون سیز نقدر ضد بشرسوز
خیرین قاپوسین باغلادوز آخر نجه شرسوز
سینسین ایاقوز وادی ظلمتده گزیرسوز
عقبانی قویوب چهرهٔ دنیانی بزیرسوز
کفریله وروب ال اله ایمانی ازیرسوز
فکر ایلمسوز درده گرفتار اولاجاقسوز
انسانلقی خوار ایلمسوز خوار اولاجاقسوز
اوضای خطرناک ده عامل به شر اولدوز
همرنگ و هم آهنگ گروه کُفَر اولدوز
باشدان ایاقا دین مبینه ضرر اولدوز
دین اهلی مگر دینیلن ایمانی ایاقلار
قرآن اوخویانلار نجه قرآنی ایاقلار
گمراه ایلیوبدور سیزی شیطان زمانه
اوز شیطنتیندن وروب اورگتدی بهانه
ظلمین تخمین اکدوز او اندازه جهانه
سولدوردوز عدالت باغی نی خاریله لشگر
دولدوردوز ایله یار ایوین اغیاریله لشگر
میدان آراسیندا دایانیب عصرین امامی
ارشاد ایله سین لشگر و سرلشگر شامی
گر آلمیاسیز شاه جهاندان بو پیامی
دنیاده نقدر عمر ایله سوز خوار اولاجاقسیز
السَز ده جهنم ده گرفتار اولاجاقسیز
آگاه اولون ای قوم جفا پیشه ایشوزده
اولسون گرک اولده بیر اندیشه ایشوزده
لازم دگول اوخ نیزه تبر تیشه ایشوزده
منطق له گلون پرچم حریته ساری
یاندیرمیا تا آتش ذلت سیزی باری
من نابغه سرباز شه ملک ولایم
بی واهمه رزمندهٔ صحرای بلایم
فخریم بودی پروانهٔ شمع شهدایم
عشقیم منی الان یتروب حد کماله
جان نقدی الیمده گیدورم بزم وصاله
قاسم دی "امین " عاشق ممتازی حسینین
غیرتلی دلیر عشقیلن سربازی حسینین
هم رنگ و هم آهنگ و هم آوازی حسینین
عشقین اوتونا یانسادا اوندا سونوم اولماز
عاشق ده الوم آیه سی واردی دونوم اولماز
- یکشنبه
- 24
- مرداد
- 1400
- ساعت
- 16:33
- نوشته شده توسط
- یوسف اکبری
ارسال دیدگاه