ای حسن قارداشیمین مظهری قاسم
اکبرین همدل و هم سنگری قاسم
(برگردان)
الیوه سلاح آل اوغلوم
بوینوا کفن سال اوغلوم
گیدوسن شهادته
سن منیم نور دو چشمان تریم سن
قارداشیمدان صورا نور بصریم سن
دیزلریم طاقتی قلبیم هنریم سن
قلبیم از بس که گورورسن دولی قاندی
خیمه باشدان باشا آه و الاماندی
ایندی بیر شربه سویون قیمتی جاندی
دردیوی هر اورگیندن قانان آغلار
حالیوه من کیمی قلبی یانان آغلار
وای اوغول سسلر الونجن آنان آغلار
سعدین اوغلوندا اوغول عاطفه یوخدی
قلبی آهندی اونون کینه سی چوخدی
اوستوه حمله ایدن نیزه دی اوخ دی
کربلا دشتی دولی درد و الم دی
ایندی همدم عمو وه غصه و غم دی
دشمنیم چوخ کمکیم عده سی کم دی
ختم پیغمبره بنزر بالام الدی
دلده قرآن کیمی ازبر بالام الدی
لیلیه بند دل اکبر بالام الدی
بلبولوم آیری دوشورسن بوداقوندان
ناله لر قوزانور عرشه اتاقوندان
گَل اقلّی اوپوم اول گُل دوداقوندان
من دیدیم بیر سنه طوی حجله سی قورام
مجلسونده آتا بهریندن اوتورام
نیلمک چاره ندور سینمه ویرام
غملی دیوانین "امینی" یازار آغلار
ذکر ایدر آدیوی اشکین یوزه باغلار
صبح و شام سینهٔ پر دردینی داغلار
- یکشنبه
- 24
- مرداد
- 1400
- ساعت
- 17:56
- نوشته شده توسط
- یوسف اکبری
ارسال دیدگاه