منی تنگه گتیرمیش بو دل ویرانه ای عمه
غم ایامدن قلبیم دونوبدور قانه ای عمه
مریضم خسته دور جانیم دوشوب تنگه نفس عمه
قنادسیز بلبلم سان که سیخور آهن قفس عمه
ندوم چاره ندور یوخ بیر کس و بیر دادرس عمه
کیمیم وار ایلسین چاره منِ نالانه ای عمه
اوزوم شهزاده یم اما سینوب بال و پریم عمه
اسیر دشمنم باغلی طنابه اللریم عمه
سحر آخشام گوزتلیردیم که گلسین اکبریم عمه
ملاقات ایتماقا بو غصه لی زندانه ای عمه
دوامیم یوخ قوری تپراقلار اوستونده یاتام عمه
گوزوم یاشین اورک قانیله لازم دور قاتام عمه
چخوب عمروم باشا باشدان داخی چخماز آتام عمه
اولوب قلبیم ایوی مدتدی بیر غم خانه ای عمه
اگر بو نصف شب دیداره گلسه دلستان عمه
اونا نقل ایلرم شاماتیدن بیر داستان عمه
دولانام باشینه بیر باش الیمده نقد جان عمه
دیسونلر میزبان قربان اولوب مهمانه ای عمه
بابام گلسه واریمدور دلده بیر عالم سوزوم عمه
بولورسن قالمیوب هجران چکم ذره دوزوم عمه
اوزومه گونده مین یول ایسترم المک اوزوم عمه
بوشالمش صبریلن سرشار اولان پیمانه ای عمه
یانور قلبیم منه سن ور بابامدان بیر خبر عمه
محبتلی آتا اهلین سالار گوزدن مگر عمه
دگول ممکن بیزی باشسیز قویوب ایتسین سفر عمه
گلردی ایندی گیتسیدی یقین هریانه ای عمه
چخوب دست قضادن قلبیمی بیر اوخ اویوب عمه
محبت جامه سین تندن بابام اولما سویوب عمه
اجل پیکی گلونجه گلمسه مندن دویوب عمه
بودور چاره م توسل ایلیم قرآنه ای عمه
بو منزل نامناسب دور گونوزلر گون شاخور عمه
اوتورام کوچه ده قزلار حقارتلن باخور عمه
اورکدن آغلورام اوز حالیمه اشکیم آخور عمه
مرتب دانه دانه داشلانیر دامانه ای عمه
اگر دوزگین دوشیدی سیره چرخ کج مدار عمه
ایتیرمزدی محبت عالمینده یاری یار عمه
"امینی" نوحه خوانلق عشقین ایلور آشکار عمه
گلور دیلده آدیم هی ناله و افغانه ای عمه
- یکشنبه
- 24
- مرداد
- 1400
- ساعت
- 17:58
- نوشته شده توسط
- یوسف اکبری
ارسال دیدگاه