او گون عباس نام آور اله فرمان جنگ آلدی
بالخلار گزلنوب دریاده میدانی نهنگ آلدی
سینوب روبه صفتلر شیر ثانی نین قباقینده
قاچان قاچدی قالانلار محو اولوب آتلار ایاقینده
قویوب شام اهلی نین حیرت الین حیرت دوداقینده
ایدوب میدان جنگی شیر تک اشراره تنگ آلدی
آچوب عنقای قدرت شهپرین قاف شجاعت ده
سالوب کرکس لری قدرت فضاسیندن او ساعتده
فتوحت پرچمین نصب ایتدی کوه استقامت ده
بلندی گاه عشقی گوئیا بیر یوز پلنگ آلدی
اَنور فالخور گوگه عباس الینده تیغ برق افشان
قوشون بیر حالدا دور هیچ کیمده یوخ قاچماخلقا امکان
توکور برگ خزان تک باشلاری مرتد بویونلاردان
گورورسن هر محلی برق مثلی بی درنگ آلدی
سران لشگر بی آبرو چون صبح عاشورا
امام الدورمگین طرحین توکوب قورموشدیلار شورا
ابوالفضلین امانسیز جنگنی بولموردیلر گویا
حقوقین هر کیم عباسین حسابیندن قشنگ آلدی
موکللر فراتین دوره سیندن ال چکوب قاچدی
همان یول باغلیانلار قورخودان عباسه یول آچدی
علمدار ایله که فتحین لواسین القمه ساچدی
لبالب دولدوروب مشگین اله بیر شوخ و شنگ آلدی
چخوب نهرین سویوندان سو یترسین فوج اطفاله
سو قولی ورمشیدی چونکه بیر عده لب عطشانه
فلک سالدی یولین اول شیر مردین جنگلستانه
اوزینه صفحهٔ تاریخدن بیر نام ننگ آلدی
او نخلستان که لشگر گیزلنیب اولموشدیلار پنهان
بدنلر هم ایاقلار هیبت عباسدن لرزان
اورکلر کینه لی اللرده شمشیر و دمیر قلخان
الیندن گزلننلر انصافین آتدی خدنگ آلدی
کمین ایتمشدی بیر شیاد روبه خسته جان شیری
سخاوتدن خبر یوخ الده اما قانلی شمشیری
ویربدور غفلتی قولسوز قویوب عباس دلگیری
سارالدی گل کیمی گل صورتی رنگ وردی رنگ آلدی
همان دم بیر تبسم ایلدی قرآن علمداری
دیشینه قبضهٔ شمشیری اما یرده قولاری
هجوم ایتدی آجخلی شیر تک بیر دشمنه ساری
اونی السیز گورن تک اللی لر چنگاله سنگ آلدی
بو غملی ماجراده قلبمی غم نیشتری سوکدی
قدر بام قضادن عالمه خاک عزا توکدی
بیر اوچ پر اوخ وزیره دگدی شاهین قدینی بوکدی
امیر لشگر الدی سیندی تیپلر طبلی هنگ آلدی
عجب سودادی ای دل شمعنی پروانه آغلاتدی
اورک قانیله اشک چشمی شاه انس و جان قاتدی
آدین مسلم قویانلار دیننی وجداننی ساتدی
"امینی" یاز بهشتی بیر نفر اهل فرنگ آلدی
- یکشنبه
- 24
- مرداد
- 1400
- ساعت
- 18:43
- نوشته شده توسط
- یوسف اکبری
ارسال دیدگاه