گل زینبیم یوبانما
اوخلاندی شیرخواریم
قاندان گئیوبدی کوینک
سرباز نامداریم
آل سینون اوسته ساخلا
من جان وئریم سن آغلا
لایلای دی بلکه یاتدی
ششماهه گلعذاریم
ئولمیشدی تشنه لیکدن
دشمن بیر آز تلسدی
خنجر کیمین بوغازین
اوخ سینم اوسته کسدی
آچدی گوزین اویاندی
باخدی بیر آز هراسان
جان چیخمینجا پیکر
قنداق ایچینده اسدی
گوردوم بالام چالیخلور
قلبیم کیمی آلیشیم
گوز یومدوم اصغریمدن
محکم اوخی یاپیشدیم
اوچ شعبه اوخ چیخینجاق
من اسدیم اصغر اسدی
کوسمیشدی خیمه لرده
نازین چکوب باریشدیم
لایلای چالوبلار اوخلار
اوغلوم یامان یاتوبدی
اصغر دئمه سینمده
بیر پارچا قان یاتوبدی
پیشوازه تلین اوسته
چیخسا اگر رقیه
اصغر دئنن عزیزیم
چوخدان اینان یاتوبدی
الله بیلور نه حاله
میدان ایچینده قالدیم
ماتملی یاره سیندن
بیر غملی بوسه آلدیم
اکبر ئولنده والله
بو حاله قالمامیشدیم
دشمن گولنده زینب
فکر ایلدیم قوجالدیم
جانیم چیخاندا بیر یول
اکبر ئولنده بیلدیم
اصغر ئولنده اما
مین یول ئولوب دیریلدیم
دشمن گولوردی منده
گوز یاشیمی الیدیم
الله بیلور کمان تک
غم غصه دن اگیلدیم
مندن بو روضه زینب
بیر شرح بی قلمدی
گوردوم گلور بیر عورت
دریای درد و غمدی
آلدی بالامی مندن
فکر ایلدیم کی سن سن
عطشان بالامی مندن
گوردوم آلان ننمدی
امکانوز اولسا زینب
بیلدیرمیون ربابه
اوخ سالدی شیرخوارین
بیر نوعی پیچ و تابه
باشین یاپیشماسیدیم
پیکردن آیریلاردی
آتش ووراردی دردی
مهتاب و آفتابه
مندن دئنن ربابه
بوردا بلا چوخیمیش
سهمون سنون بو چولده
اوچ شعبه بیر اوخیمیش
محسن ئولنده بیر یول
من چکمیشم بو دردی
یاددان چیخاردا بیلسون
فکر ایله هیچ یوخیمیش
- جمعه
- 29
- مرداد
- 1400
- ساعت
- 10:55
- نوشته شده توسط
- یوسف اکبری
- شاعر:
-
استاد حسین غفاری اردبیلی
ارسال دیدگاه