باشسیز بدن ای پیکری عریان آنام اوغلی
ایوای منه جانیم سنه قربان آنام اوغلی
الله بولوری نعشیوی نه نوعیله تاپدیم
بو حالتیوه خون دلی اشگیمه قاتدیم
کشتی کیمی گرداب محنده گله باتدیم
اوز وئردی منه قورخولی طوفان آنام اوغلی
چوخلی یارا وئردی سنه بو فرقهٔ اوباش
اوخ نیزه قلج یاره سی حتی ویریلب داش
بند اولدی یارا یاریه باجون ئوله ایکاش
بو سینه یاراسی وئروری قان آنام اوغلی
تز تز سوروشور قالدی بابام هاردا رقیه
قورخوم بودی گورسه سنی بو حالدا رقیه
روحی چخا تندن وئره جان بوردا رقیه
بو قیزدی منیم جانیمه جانان آنام اوغلی
واردور خبرون شامی نجه من سحر ایتدیم؟
صبحه کیمی جاری یوزه اشک بصر ایتدیم
هر دم که او قورخان بالالاره نظر ایتدیم
تنگ اولدی منه گردش دوران آنام اوغلی
بیر قاعده دور قورخسا اوشاق صبح زمانی
آخشام یاتا بولمز اوجادار داد و فغانی
غارتده دونن ئولدی ئولن قورخدی قالانی
اولموشدی بالالارون هراسان آنام اوغلی
یانمیش چادرا جمع ائلدیم آل ترابی
الله بولوری چکدیم او دم من نه عذابی
سس دوشدی قوشون آشدی اخا سد اولان آبی
ایتدی حرمی سو سوزی نالان آنام اوغلی
اصغر آناسین سالدی او سو آیری بیر حاله
حسرتله سویا باخدی قالوب الده پیاله
اصرار الدیم ایچدی دونوب ایلدی ناله
صود گلدی اونی ایتدی پریشان آنام اوغلی
ال سینه ده سسلردی علی هاردا یاتوبسان
اولدوز کیمی برج محن و غمده باتوبسان
علت ندی گوزدن بو غریبی سن آتوبسان
او نالیه اولدوق هامی گریان آنام اوغلی
ای کرببلا شاهی اولان سید ابرار
دنیاده ائدر " حیدری" دردین سنه اظهار
سنده نظر لطف ائله قویما بونی آغلار
بیزده بولر اوز دردینه درمان آنام اوغلی
- جمعه
- 29
- مرداد
- 1400
- ساعت
- 11:0
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه