سن ئولمسیدین اوغول حسرتینده یانمازیدیم
تنورِ خولیده اَل سینده دایانمازیدیم
یارالی فاطمییم منزلون مبارک اوغول
بیلورسن آیری مکاندا گئدیب قالانمازیدیم
آلوب سراغیوی گلدیم بو نانجیب ائوینه
وگرنه آیری مکاندا سنی تاپانمازیریم
همیشه هرگجه لایلای دییَن گلوب گوزون آچ
کی یاتماسیدون اگر بیرگجه یاتانمازیدیم
بحسبِ عادت هر شب، سو ایچمیسن بو گجه؟(۱)
بیلورسن ایندیده من فیکریوی آتانمازیدیم
او قدری عاشقیوم بیلمیرم گئدیم هایانا
یارانماسیدون اگر، من اوغول یارانمازیدیم
سنی دویونجا گوروب دویمادیم تئز ئولدوم عجب
وگرنه حشره کیمین سندن آیریلانمازیدیم
فراقیوه اوجادان آغلیرام بهشتیده ده
گئدیب قراریم اَلیمدن وگرنه یانمازیدیم
سن ئولمسیدین اگر باشدا قاره ایندی گلوب
دوشوب بو چوللره نالان گزیب دولانمازیدیم
یارالیسان بیلورم منده یاره لی آنانام
بیر آیری غمده بو قدری من آغلیانمازیدیم
گلنده قتلگهوندن دونوب گذر سالدیم
یاران اوقدری چوخیدی قالیب سایانمازیریم
یارالینین یاراسین باغلیار اگرچه طبیب
سینونده‌کی یاراوی منده باغلیانمازیدیم
رقیّن آغلاماسِیدی جنازه وین اوسته
تنوره گلمَگه بیر لحظه‌ده یوبانمازیدیم
بیر آیری عالمیدی ساربان خراب ائلدی
وگرنه پیکرون اوسته یاتیب اویانمازیدیم
(۱)=اشاره به دوران کودکی سیدالشهدا..
- جمعه
- 29
- مرداد
- 1400
- ساعت
- 22:34
- نوشته شده توسط
- یوسف اکبری
- شاعر:
-
اصغر الماسی اهری
ارسال دیدگاه