نقش اولونموش پیکری یر اوسته نقّاش آختارور
ظلمیله قولسوز دوشن قارداشی قارداش آختارور
مست و مخمور می سرزندۀ جام اجل
شاه عطشان مظهر ذات خدای لم یزل
حسرتیله سینه سی اوستونده بیر جوت قانلی اَل
سو کنارینده سینان ظلمیله بیر باش آختارور
گه گلور گاهی دورور گوزدن توکور اشک ترین
قلب عالم تک تَزلزُل ایلوری عرش برین
باغرینا گاهی باسور تشنه علمدار اللرین
چکماقا بیر باشه شاهنشاه دین باش آختارور
انبیانی وادی حیرتده سرگردان ایدوب
صبریله ایّوبی بو غمده اودور حیران ایدوب
تکتۀ عشقین بیان قرآندا الرّحمان ایدوب
دین و قرآنه اولان بیر باشه شاباش آختارور
گتدی ناگه گوشینه باد صبا قارداش سسین
گوردی سسلور داده تیزگَل ای شه باز و پسین
ویر کناره گوزلریمدن بو چولون خار و خسین
گُل جمالون دیدگان اشک خونپاش آختارور
عشقیده سیر ایتموشم چون تا به سرحدّ جنون
اولموشام توپراقلار اوستونده ستمله غرق خون
گَل سرافراز ایت منی ای مقتدای کاف و نون
شاه عشقی ارتش عشاقه بکتاش آختارور
ای وجود اطهری باشدان باشا آیات نور
ای ایدن موسی کلیم اللهی سر گرم حضور
باشیم اوستون ایت برادر مقدمنله رشک طور
دلده ارنی طلعتون قولسوز بو قارداش آختارور
من کیمی شیری ایدوب بو کوفیان بند کمند
ایلیوبلر جسمیمی ظلمیله یرده بندبند
گل ایکی دنیاده قوی اولسون بو شکسته سر بلند
سر شکست اولماق شکسته باشه اوباش آختارور
سرزمین عشقیده عشقونله من افسانه ام
شمع خلوتگاه سنسن من سنه پروانه ام
سن کیمی منده حسین دُردی کش میخانه ام
گَل که می ایچماقه بو دلخسته یولداش آختارور
عطریوی من آلموشام روز اَزَل پیمانه دن
مست اولوب اُفتان و خیزان چخموشام میخانه دن
ایمدی کسمه لطفووی سن من کیمی دیوانه دن
بیر بهانه اهل کین ایتماقه پرخاش آختارور
ناگهان عباسینی تاپدی شه کون و مکین
سسلدی توکمه بیله گوزدن یوزه دِرّ ثمین
آلدی سینموش باشنی دیز اوسته شاهنشاه دین
گوردی بلبل یاره لرگل تک آچوب باش آختارور
سیلدی اوّل حسرتیله قان دولان سقّا گوزون
گوردی تا قارداش یوزون قارداش ایتوردی او اوزون
صاق گوزون تاب ایتمدی گورسون یوموب فورا گوزون
بی سبب گوردی او صورتده اوشه قاش آختارور
صول گوزون آچدی او دمده تیر و پیکان خسته سی
گوردی دیز اوسته آلوبدور باشینی دلبسته سی
چون کمان امّا اولوبور قامت نو رسته سی
ویرماقا سر لشکره زیبنده پاداش آختارور
عرض ایدوب آی شهریار بی پناه قُل کَفی
واردی میلون گر منیله قول بویون الماقلیقا
اللریم یوخدی ولی سن االرون سال بوینوما
گیت سنی بیر عده ایمدی گوزده قانیاش آختارور
کوفه اهلی ظلمیله بیر مجلس شورا قوروب
سو یرینه مشکیمی ظلمیله قاندان دولدورب
الده سو جامی رقیّه ایمدی تَلّ اوسته دوروب
مشکیمی میداندا با آه شرر پاش آختارور
بیر غلام درگهون واردی «جوانشیر» شهرتی
بیرده مسعود قره گوز چوخدی دلده مِحنتی
نظم ایدوب «هادی» اودور بو قطعۀ بی قیمتی
اربعینی تَلّ زینبده بو اوچ باش آختارور
- شنبه
- 30
- مرداد
- 1400
- ساعت
- 22:22
- نوشته شده توسط
- یوسف اکبری
- شاعر:
-
مرحوم هادی تبریزی
ارسال دیدگاه