میدانه گئدور تشنه علمداری حسینون
ظاهردی یوزونده ئولوم آثاری حسینون
گون تک اونا روشندی سر و کار و مآلی
گر گئتسه ابوالفضل ، گئدر جاه و جلالی
دشمنلر الینده قالی پیغمبر عیالی
آخر پوزولور ظلمیله پرگاری حسینون
کسمیشدی ولی سو یولونی فرقۀ عدوان
خوردا بالالار خیمده قالموشدی لب عطشان
غنچه کیمی لبلر قوروموشدی سو سوزوندان
سولموشدی عطشدن گل گلزاری حسینون
گوردی که چخوب اهل حرمدن گویه ناله
سولموش سوسوزوندان بالالار رنگی چو لاله
باخجاق بئله اوضاع باتوب درد و ملاله
غملندی بو غمله دل غمخواری حسینون
سرعتله حسین محضرینه گلدی پریشان
چوخ عجز قیلوب بلکه آلا رخصت میدان
وئرموبدی ابوالفضله اجازه شه دوران
سن سن دیدی بو چولده هواداری حسینون
عرض ایلدی عباس دوباره شه دینه
قارداش نه روادور قالا لب تشنه سکینه
کسسونله فراتین یولونی لشگر کینه
باخسون بئله اوضاعه علمداری حسینون
بو باره ده ازبسکه ابوالفضل ایدوب اصرار
وئردی سو طلب ائتماقا رخصت شه ابرار
گتودی علم و مشگین ، عباس وفادار
تا رزمگهه گلدی سپهداری حسینون
ائتدی او وفا سیزلره هر قدر نصیحت
گوردی که قبول ائیلموری قوم ضلالت
بو نکته داخی اولمادی گنجینۀ غیرت
عطشان قالا اطفال دل افگاری حسینون
ال قبضۀ شمشیره قویوب حیدر ثانی
دشمنلره تنگ ائتدی او وسعتله فضانی
دولدوردی قوشون ناله سی او دشت بلانی
پوزدی داغیدوب صفلری سالاری حسینون
هر اوخ کی گلوردی باسوب آغوشینه جان تک
جسمیندن آخاردی یره قان آب روان تک
برهم ائیلیوب صفلری بیر شیر ژیان تک
یوز قویدی فرات اوستونه سرداری حسینون
طاقت گتوره بیلمدی لشگر هامی قاچدی
اولدی سووا مالک علمین پرچمین آچدی
اسلام علمین آب فرات اوستونه ساچدی
کفّاری داغتدی او وفا داری حسینون
دولدوردی ازل مشگینی تا چیگننه سالدی
تشنه ایدی ز بس باخدی سو آرامنی آلدی
طاقت کسلوب گئتدی توان صبری آزالدی
حیرتده قالوب دلدن او دلداری حسینون
دولدوردی ایکی اوجونی اول عشق فداسی
یاد ائتدی حسینون عطشین آرتدی نواسی
توکدی سووا قویموب سو ایچه مهر وفاسی
چیخدی سودان اول محرم اسراری حسینون
خشگیده دوداقیله سودان چیخدی همان دم
سو مشگینی چیگننده ازل ائیلدی محکم
سو خیمیه بلکه آپارا اولدی مصمّم
آرام دل پر شرر و زاری حسینون
بو حالی گورن وقتیده او فرقۀ باطل
کسدیله خیامین یولونی اودولا حایل
ویردی ایکی ال تا اولا مقصودینه نائل
صد حیف بو حسرتده قالوب یاری حسینون
اوخدان پر آچوب گر چه او شهباز حقیقت
ائیلردی سو مشگین ولی چوخ حفظ و حراست
بو نکته دن آگاهیدی اول پیر طریقت
گوزلور یولونی عترت اطهاری حسینون
بیر اوخدا گلوب دگدی ائدوب مشگینی پاره
سو گئتدی یره گوردی که یوخ دردینه چاره
ساق و صولا ائیلردی چوخ حسرتله نظاره
راضی اولوب اوز مرگینه سرداری حسینون
بو حالیده نا گه یتوب او بی کسه نوفل
بیر آهن عمود الده اولیدی ائله ال شل
دوشدی یره آتدان دیدی قارداش ئولورم گل
بو سسله دولوب خیمه زر تاری حسینون
تا سرور دین خیمه ده قارداش سسین آلدی
سست اودی ایکی دیزلری گل رنگی سارالدی
سسلندی بئلیم سیندی داخی چاره م آزالدی
سولدی ستمیله گل گلزاری حسینون
میدانه قویوب یوز جگری داغلی پریشان
حیران دولانوردی او چولی سرور عطشان
سسلردی ابوالفضل اولا جانیم سنه قربان
سن سیز داغیلور لشگر و انصاری حسینون
جان گلشنینه صرصر درد و غم اسیلدی
تاپجاق یارالی نعشینی آرامی کسلیدی
اگلشدی یره گوزارینون قانینی سیلدی
قان یاشلا دولوب دیدۀ خونباری حسینون
آهسته دیزی اوسته باشین آلدی اوغلسوز
گورجاق یارسین یاندی چکوب آه جگر سوز
سویلوب دور اماندور منی قویما بئله یالقوز
قالموبدی داخی قوّت و گفتاری حسینون
ای باب الحوائج آقالیق ائیله بو زاره
«عاصی» بو قدر قویما توکه اشگین عذاره
بیر عمریدی حسرتدی او ششگوشه مزاره
بو وقفنی ایسته اولا زوّاری حسینون
- یکشنبه
- 31
- مرداد
- 1400
- ساعت
- 17:30
- نوشته شده توسط
- یوسف اکبری
- شاعر:
-
مرحوم حسن عاصی تبریزی
ارسال دیدگاه