قلم کتابت ایدن دمده حال زهرانی
اولور روانه گوزومدن یوزه جگر قانی
اوزونده گوردی او گون ، ظهر وقتی حال اجل
چاقوردی خدمتینه اوز کنیزی اسمانی
بویوردی گل یریمی رو به قبله سال که منیم
خزان یتوبدی سولوب عمریمون گلستانی
فلان محلیده کافور وار بیر مقدار
اونیدا حاضر ایله باشیم اوسته بو آنی
قتیفه چک یوزیمه ، تا بیر استراحت ایدوم
نچه دقیقه قوی اوز حالینه بو نالانی
مخاطب ائتگیله ویرسم اگر جواب سنه
ملال قلبوه یول ویرمه ای وفا کانی
جواب گلمسه بول حقّنه چاتوب زهرا
پیمبرین قیزی ترک ایلیوب بو دنیانی
ایدوبله بیله روایت اوزوندن اسمانین
قویوبدی موقع اجرایه امر زهرانی
نچه دقیقه گچوب هر نه قدری ایتدی ندا
جواب ایشتمدی آرتوب غم فراوانی
خطاب ایلدی دور ای عزیزۀ دوران
او یوخلیان گوزوون کائنات قربانی
نه خواب وقتیدی گلسه اگر حسین و حسن
سنی بو حالتیله گورسه باشلار افغانی
دور ای جهاندا یوزی گلمین مصیبتدن
ایدن خمیده قدین جور دشمن جانی
سنان قولی در و دیوار آرا ، دوشن مدهوش
جنینی سقط اولان ، اعضاسنون آخان قانی
نقدری سسلدی اسما گوروب که یوخدی جواب
ویروب فنایه النده اولان شکیبانی
کنار ایدنده یوزوندن قطیفه نی نه گوروب؟
بیر اوزگه جلوه دور حالت پریشانی
که یعنی روحی بدندن کسوب علاقه سینی
او حالتی گتوروب درده کون و امکانی
آچوبدی باشینی زلفون یولاردی آغلاردی
توکردی اشگ گوزوندن چو ابر نیسانی
گوروب او دمده گلور حسین و حسن ناگاه
دوروب ایاقه که مستور ایده قضایانی
سیلوب سرشگنی ، تغییر ویردی حالتینه
چاقوردی رأفتیله اول ایکی دل آرانی
دئدی طعام گلون میل ایدون یاتوبدی آناز
اویاتمیون یوخودان دخت میر بطحانی
حسن دئدی آنامیز بیله وقتیده یاتماز
محال ترک ایده راز و نیاز جانانی
خیال ایلمه بیز بولموروق ئولوب آنامیز
ایدوب بیزی بیله افسرده درد هجرانی
بابام مزارینه قصد شفائیله گیتدوق
یتوردولر بیزه بو رمزیله معمّانی
بو سس اوجالدی رسول خدا مزاریندن
کنار اولون گلوری فاطمه یتیمانی
سالوبلا ئوزلرینی جسم پاک زهرایه
بیان ایدوم نجه بو قصّۀ غم افزانی
حسین ایاقلارینا یوز قویوب ، دیردی آنا
حسینوم منی دیندیر سنی حسن جانی
حسن دیردی بیزی تاپشوروب کیمه گیدوسن؟
گوروم خراب اولا بو روزگار دورانی
سنون کیمی بیزی کیم بیرده دیندیرر آنا جان؟
دور آل کناریوه بو ایکی دیده گریانی
ز بس که گلدی یتیمان فاطمه شوره
دولوبدی شور و فغانیله عرش دامانی
قویوبدی مسجده یوز بیر نفر کنیز اول دم
بتول رحلتینه واقف ایتدی مولانی
قویوب شتابیله یوز دودمانه سرور دین
عیان ایدوبدیله نه گوردی حشر کبرانی
دئدی نه وار دئ ، گورورم بیله مو پریش سیز
فلک الیمدن آلوب یوخسا دخت طاهانی
یتوب نه گوردی بلی جان ویروبدی دخت نبی
وصال باشه یتوب باشلانوبدی هجرانی
جنازه یرده قالوب ، ئولدورور اوشاقلار ئوزون
گتوردی درده همان حال شاه مردانی
وصیّت ائتمشدی نصف شبده دفن اولونا
او نعش ایچون یوخیدی دفن اولونماق امکانی
باخاردی حسرتیله فاطمه جنازه سینه
توکردی اشگینی ، ناله ایدردی کتمانی
خدا بولور نه چکوب نصف شب اولونجا علی
ایدنده حقّه سپرده او بی توانانی
جدا ایدردی حسینی ، حسن قوجاقلاردی
او نعش پاکی ، توکردی یوزه جگر قانی
گلردی نالیه دیردی وای آنا وای
وفاسنی سنه گوستردی عالم فانی
عزا دوتولمشدی مصطفی’ عزیزه سینه
او بزم ماتمه اولموشدی مرتضی بانی
ایدردی موج حسینون سرشگی سیل کیمی
واریدی اشگینون آغلار گوزینده طغیانی
چخوبدی باب کرمدن او لحظه ده سلمان
بیوک کیچیک هامیه ایلدی بو اعلانی
دئدی که فاطمه نون دوشدی دفنی تأخیره
علی صباح ایده جاق دفن دختئ طاهانی
گیدوب هامی اولوب اغیاردن او یر خلوت
او وقت اولوب ایده لر دفن او نعشی پنهانی
او دم گتوردوله تابوت حاضر ایتدیله سو
گوروم خجل اولا دوره سینده دورانی
چکوب سس آغلادی توکدی عذاره گوز یاشین
سزادی آغلادا اول حال سنگ خارانی
سؤال ایتدی ندن آغلوسان بو شدّتیله؟
بو داد و شیونوین نه سببدی عنوانی؟
فراق فاطمه دور آغلادان بو نوعی سنی؟
نه وار علاجی بو دردین نه وار درمانی
بویوردی ناله ایدم هر نقدری حقّیم وار
بو دردیمون بولورم یوخ جهاندا درمانی
ولی قولوندا الیم دگدی قمچی یرلرینه
ایدوبدی ظلمنی تکمیل دشمن جانی
خلاصه ویردیله غسلون گوتوردولر یردن
که راحت ایلیه لر خسته دور او نالانی
نه گوردیلر که حزین آغلاماق سسی گلوری
نه سس که سلب ایدوری طاقت شکیبانی
باخوب نه گوردیله بی خانمان قالان زینب
گلور جنازه آردونجا دلده افغانی
دوتوبدی یوز حسن مجتبایه سرور دین
دایانما قیتر زینب پریشانی
بو یرده یاندی قلم ، دوشدی جانیمه لرزه
گرکدی کشف قیلام من بو سرّ عظمانی
آیا ولیّ خدا دوزموسن بونا زینب
گله دالونجا دل شبده اول وفا کانی
بو فکریله که اولا بین رهده نامحرم
باشیندا چادر عصمت گوره او نالانی
گلنده قتلگهه کربلاده هاردیدون؟
سر عبورینی کسمیشدی دشمن جانی
بو سهلدور یته قویمازدی قارداشا باجی
ویراردی باشینه قمچی زمانه دونانی
قویاردی هر طرفه یوز گورردی یول یوخدی
دوتوبدی اهل جفا عرض طول میدانی
گهی قاچور یخیلور ، گه دورور گینه گیدور
اوزون حسینه یتورسون او مریم ثانی
دوتوب او وقتیده وقّاص زادیه یوزونی
مخاطب ایتدی او دم ابن سعد نادانی
بویوردی قارداشیمون نه گناهی وار ظالم؟
باخا باخا من ، عدو ئولدورور بو عطشانی
بیر اوزگه حالیله سعد اوغلی زینبی گوردی
یاخوندی یاندیرا دنیانی آه سوزانی
دئدی آچون یولی ، قارداشینا یتورسون اوزون
بو آخر عمریده گورسون او قانه غلطانی
یتوب نه گوردی حسین مصرعی قیامتدور
چیخاتدی یاددان اوزون تا گوروب او غوغانی
نه اوخ ویران قویوری جانستانه جان ویرسون
باخور نه نیزه ووران جسمنون آخور قانی
گوروب حسینه بیر کیمسه یوخ حمایت ایده
دولوبدی دشمنله کربلا بیابانی
بو یرده «حامد» الون ساخلا قیل سوزون اتمام
یتور نهایته بو قصّۀ غم افزانی
- یکشنبه
- 31
- مرداد
- 1400
- ساعت
- 17:53
- نوشته شده توسط
- یوسف اکبری
- شاعر:
-
مرحوم حامد تبریزی
ارسال دیدگاه