مظلوم کربلا انصارین آختارور
آل محمّدون غمخوارین آختارور
هر دم نظر سالور اطراف عالمه
ششگوشه قبرینون زوّارین آختارور
ایوان عرشدن اوچ منظره باخار
اوّل یخلدیقی قانلو یئره باخار
بیرده عزا دوتان مجلس لره باخار
بیرده ضریحینون حضّارین آختارور
عصرون امامینه بذل اولدی ذوالفقار
وترون قصاصینی آلسون او شهریار
أذن الهیه زهرادور انتظار
اوز أوغلینون گلن یولّارین آختارور
هر کیمسه نون حسین گورسه حقیقتین
ایلر روا اونون مقصود و حاجتین
لطفیله آرتیرور نور محبّتین
احبابینون دل بیدارین آختارور
هر یئرده تعزیه اولسا نوا گلور
آشفته قلبیدن محزون صدا گلور
فوراً او مجلسه صاحب عزا گلور
اهل حقیقتون دیدارین آختارور
هر دهه ی عزا زهرای دیده تر
بیر شیشه ی بهشت الده او خون جگر
نام حسین اولان مجلسلری گزر
آغلار گوزون دُر شهوارین آختارور
أمر اولدی شمر دون اودلاندی خیمه‌لر
یوز قویدی چوللره اطفال دربدر
اول وقته زینب نالانی گوردیلر
وارد اولوب اوتا بیمارین آختارور
پروانیه اونون اولموشدی اوخشاری
اوتدا تلاش ائدوب یاندى قانادلاری
گوردیله دوتدی یوز ناگه نجف ساری
امداده حیدر کرّارین آختارور
- یکشنبه
- 31
- مرداد
- 1400
- ساعت
- 18:9
- نوشته شده توسط
- یوسف اکبری
- شاعر:
-
حاج عباسقلی یحیوی
ارسال دیدگاه