برج حیا و عصمتین زینتی کیمدی فاطمه
مکتب حجبه آرتیران عزتی کیمدی فاطمه
عالم خلقتین ازل علتی کیمدی فاطمه
نوری منور ائیلین جنتی کیمدی فاطمه
فاطمه یعنی مطلقا نور خدای لم یزل
اوندان اوتور یاراتدی بو عالمی خالق ازل
فاطمه نین گوزلیکی جنتی ائیلیب گوزل
جمله یارانمیشین بلی شوکتی کیمدی فاطمه
خلق اولونوبدی ماخلق تک اونون احترامینه
رتبه ده انس یا ملک چاتماز اونون مقامینه
باغ جناندا حوریلر عطرین آلیر مشامینه
گلشن و باغ جنتین نشاءتی کیمدی فاطمه
فاطمه نین رضایتی مطلقا حق رضاسیدی
ملک حجابی ساخلیان فاطمه نین حیاسیدی
همسر شاه لافتا اون بیر امام آناسیدی
صاحب عصرین ای بشر نسبتی کیمدی فاطمه
فاطمه یعنی فاطمه ختم رسل عزیزیدی
داغ پدرده روز و شب گوزلری اشک ریزیدی
عزته باخ که آسیه مریم اونون کنیزیدی
خاک بقیعه آرتیران قیمتی کیمدی فاطمه
رد ائلیر خدا مگر فاطمه نین دعاسینی
چوخلی مریضیلر آلوب فاطمه دن شفاسینی
طوی گونی ائیلین عطا سائله طوی لباسینی
حقه گوره اولان فقط نیتی کیمدی فاطمه
ثبت ائلیوب مورخان بو سوزی واردی صحتی
بخت ائوینه گئدن زمان عمده بویدی نیتی
محشر اولاندا شیعه لر نئیلیجک او ساعتی
یاد ائلین او لحظه اول ساعتی کیمدی فاطمه
بنت رسول خانه بخته گلین گئدن زمان
دوردی یول اوسته گئتمه دی اولدی آتاسی ناگران
وار سوروشوب نه نیتین ائیله قیزیم منه عیان
اوندا بیان ائدن بئله صحبتی کیمدی فاطمه
عرض ائلیوبدی آی بابا واردی بو سئرین حکمتی
یوخدی سوزوم عم اوغلوما باغلامیشام ارادتی
بوردا دایانماقین ولی واردی بیر آیری علتی
شرح ائلین بو سئری بو حکمتی کیمدی فاطمه
دوزدی بو گون اولور منیم یوم مسرتیم بابا
ثبت اولا مهریه مده وار بیر بئله نیتیم بابا
حشریده شیعه لر ائده اخذ شفاعتیم بابا
ایستین اوندا بئله بیر حاجتی کیمدی فاطمه
وحی گتیردی جبرئیل جانب حقدن اول زمان
عرض ائلیوب پیمبر اکرمه مختصر بیان
مهریه دور شفاعت شیعه بتوله ائت عیان
عالمین اهلی قوی بیله آیتی کیمدی فاطمه
فاطمه ختم مرسلین جاندان عزیز امانتی
مهریه سینده قید اولوب شیعه لرین شفاعتی
اوندا که امتین یئتر محکمه قیامتی
نار جحیمیدن چکن امتی کیمدی فاطمه
فاطمه بنت مصطفی شیر خدا عیالیدی
قربان اولوم جلالینه ماخلقین جلالیدی
صاحب عصر ایندیده فاطمیه عزالیدی
حدیدن آرتیق هر غم و محنتی کیمدی فاطمه
اهل عدوات اونداکی گتدی بروزه کینه سین
سالدیلا رنج و محنته حجب و حیا خزینه سین
درگهی یاندی میسمار ائتدی خراش سینه سین
دست ستمله صلب اولان طاقتی کیمدی فاطمه
همت ائدیردی یانماسین باب کرم او خونجگر
سالدی نفسدن اول بلا خسته سینی فشار در
غش ائلیوب دوشوب یئره قوش کیمی چالدی بال و پر
تاب ائلین بو دردی بو شدتی کیمدی فاطمه
سسلدی زینب اوندا وای گول کیمی تئز سولان ننه
سیلی دگن عذارینه قان گوزونه دولان ننه
صدمه یئتن وجودینه محسنی سقط اولان ننه
درک ائلین قیزیندا بو رقتی کیمدی فاطمه
وای نئجه بخت و طالعی قاره چیخیلدین آی ننه
قول قانادین گوروب بئله صدمه یخیلدین آی ننه
یارلی قوش کیمی دوشوب یئرده سیخیلدین آی ننه
باخ بو یانیقلی سوزلرین بابتی کیمدی فاطمه
یازما داخی بو نوحه نی ختم ائله بسدی قنبری
الده سیزیلدایب قلم نالیه گتدی دفتری
بو غم و محنت آغلادارحشره کیمی پیمبری
حزن و ملال و محنتین علتی کیمدی فاطمه
- یکشنبه
- ۳۱
- مرداد
- ۱۴۰۰
- ساعت
- ۱۸:۳۴
- نوشته شده توسط
- یوسف اکبری
- شاعر:
-
اکبر قنبری تیکمه داش
ارسال دیدگاه