عاشق سرمست چون سیر خرابات ایلدی
درک ائدوب بی پرده یاری عشقین اثبات ایلدی
عاشق واحد احد دن کسب ائدوب شان وجود
ساجد و مسجود بیرشدی تمام اولدی سجود
جان جانان جمع اولوب وحدتده قالدی تار و پود
تار و پود وحدت وجودینده مساوات ایلدی
دور گردوندا اثردن دوشدی جبر و اختیار
قالمیوب دور ما و من ممذوج اولوب دلداره یار
واصل جانان اولاندا وحدت اولدی برقرار
وصل اولوب جانانه جانی ترک طاعات ایلدی
اوج ائدیب یئر آسمانه تاپدی ناگه اتصال
صورت دلداریدن گورسندی نور ذوالجلال
یوخ لیاقت بو بشرده ایلیه توصیف حال
کیم دییر ناقص دیلیلن بیر اشارات ایلدی
عاشق واله اولوب بیر سمتیده مجذوب یار
بیر طرف میدانیده سرگرم جنگ و کارزار
لافتا الاعلی لاسیف الا ذالفقار
سسلنوب گویده ملکلر چوخ مباهات ایلدی
جذب اولوب معشوقینه شه عرصه ی پیکاریده
تیریلر شمشیریلر اوینار فضای تاریده
عاشق پیکارگر محصور اولوب اغیاریده
گورمدی اغیاری عشقیندن اطاعات ایلدی
سویلدی ظاهر ده هل من ناصر هل من معین
ایلدی نازل جوابین فوری رب العالمین
انقریب انا فتحنا یا حسین فتحا مبین
گردش سیاره لر تاخیر ساعات ایلدی
اوندا بیر تیر سه شعبه پر آچوب خرسند اولوب
سجده گاه عاشقی مامن گوروبدور بند اولوب
مسجد مسجودی اوچ یئردن دلیب پیوند اولوب
قان آخاندا سجده گه دن کشف رازات ایلدی
آلنینی منشق ائدوبدور تیری اول بیر آهنین
گوزلره قان دولدوروب ناگه او تیر آهنین
گوزلرین قانین سیله چون قوزادی پیراهنین
قلبی اوستی تا گوروندی سیر مرات ایلدی
ناگهان اوچدی کماندان اوندا بیر اوچ شعبه اوخ
بیر مناسب یئر تاپا فکر ایلیوب اول تیر چوخ
گوردی قلبیندن سورا اگلشمگه محدوده یوخ
اگلشیب قلبینده فورا اوخ مناجات ایلدی
جلوه گاه عشق آچیلدی تا گوروندی کوی یار
پرده پرده قوزانوب اوج ایلدی گیسوی یار
دولدوروبدور عرش و فرشی بوی یار و جوی بار
عرضه غبطه اول زمان کل سماوات ایلدی
عشقین ابلاغی گوروندی اوخ دلن دیواریدن
جنتین باغی گوروندی سینه ی دلداریدن
اکبرین داغی گوروندی جلوه گاه عشقیدن
جوهر آیریلدی عرضدن عشقین اثبات ایلدی
سیلدی رخسارین گوزون یوخ متکی آرنجیده
گوردی بو حال و هوانی قالدی لشکر رمزیده
موج ائدیب آتلی پیاده عرصه ی شترنجیده
پیلیدن سالدی وزیری شاهی شهمات ایلدی
جلوگاه عشقیده نهر اوسته بیر یول گوردیلر
نهریدن بیر آز قیراخدا سایه سیز خول گوردیلر
وصله ی تندن جدا بیر جفت اوزون قول گوردیلر
گورجگین کروبیان هیهات هیهات ایلدی
گوردولر شش ماهه اصغر قان ایچیب سیراب اولوب
حلقینه اوچ شعبه بیر اوخ سانجیلیب سیراب اولوب
قان آخوب نازیک بوغازدان صورتی مهتاب اولوب
انس و جن و آدمی بو صحنه لر مات ایلدی
چکمز ال صادق حسیندن بو جهان فانیده
چون حسین سر مستیدور نقصانی یوخ ایمانیده
گورمدی "بیضا"صداقت بو چتین دورانیده
هر کیمه دل باغلیوب حالین مراعات ایلدی
- دوشنبه
- 1
- شهریور
- 1400
- ساعت
- 12:35
- نوشته شده توسط
- یوسف اکبری
ارسال دیدگاه