عاشقم پروانیم پروانمه پر یولداشی.
عشقیده قارداشیمون اولام برابر یولداشی.
عارفم عشقیمده یوخ بیر ذره نقصانیم منیم.
موبمو اجرا اولا آحاد پیمانیم منیم
واردی تقدیم ائتمگه بیر جفت قربانیم منیم
تا اولام منده برابر اول برادر یولداشی.
وادی وحدتده اولام محو جانان قورخمارام
اولموشام چونکه ازل گون تارک جان قورخمارام
سرزنش لر ایلسه خار مغیلان قورخمارام
گوهر و مرجان اولار دریای احمر یولداشی.
کربلا میثاقینون سیز شمعی من پروانه سی
شوق وصلون اولمیشام تعجیلیلن دیوانه سی
هاجر و اسمائیلون یاددان چیخار افسانه سی
زینبه هاردان اولار همپایه هاجر یولداشی.
تابع پیر مغانم حق یولون درک ائتمیشم
مست میراب حسینم هر نه وار ترک ائتمیشم
مظهر عشقه ایکی قربان وئروب ارک ائتمیشم
سالک عشاقون اولسونلار دلاور یولداشی.
بو یولی سیر ایلیون اوغلانلاریم اصلان کیمین
سینوزه قوی اوخ دوزولسون دلربا مژگان کیمین
آلسون آغوشه سیزی شمشیر و خنجر جان کیمین
هر ایکوز با هم اولون شمشیر و خنجر یولداشی.
باخمیون سیز ای گوزل جیرانلاریم گوز یاشیمه
گلمدیم بو دشت غم افزایه من اوز باشیمه
جانشین اولدوم ازل گون من حسین قارداشیمه
البلا و للولا مجذوب ائدر هر یولداشی.
کوی وصلتده رضایت وئرمیشم روز ازل
عنچه لر گول آچمامیش یاپراقلاریم اولسون خزل
شاهد عشقیم اولوبدور لا مکان و لم یزل
راضییم چون اولمیشام خلاق داور یولداشی.
زینبم زینت بابام بیلدی منی اوز آدینه
کیم آلوب بو امتیازی هدیه اوز میلادینه
گلمیشم چوخ افتخاریلن بلا میعادینه
چاتمیشام عالی مقامه اولموشام ذر یولداشی.
عاشق جانبازم اما عشقیمه اندازه یوخ
طائر قدسم ولیکن فرصتیم پروازه یوخ
محرم رازم نیازیم قدرت اعجازه یوخ
طالب میخانه ام مشتاق ساغر یولداشی.
بو همان میعاد عشقیمدی کی شاهین پر توکر
خاتم مرسل گلنده جبرئیل شهپر توکر
عترت طاها باشیندان رد ائدر معجر توکر
تار گیسولر اولار مقتلده معجر یولداشی.
لن ترانی جلوه گاه عشقیده اولموش عیان
در دل زینب مکان دارد نگاه لا مکان
گورمیور اما تجلاسین دل لایبغیان
خر موسی جلولندی اولدی اخگر یولداشی.
ایلرم حقی محقق کوفیان ایلر سکوت
علم القرآن بیانیمده ائدر شائنین ثبوت
گوسترور تصویرینی مرات حی لایموت
تا اولار جاری دیلیمدن در و گوهر یولداشی.
منزلیم اولسون خرابه من خرابات اهلییم
بالشیم خاکستر اولسون صبر و طاعات اهلییم
نیلورم ویرانه سقفین چون مناجات اهلییم
جنت الاعلاده گورم حور و احور یولداشی.
مفتی دوران دیور "بیضا"حسین آللهیدور
عابد و زاهد دیور گمرهلرون گمراهیدور
عارفم ایمانیمه الله اوزی آگاهیدور
سسلرم صدقیله یا هو روز محشر یولداشی..
- دوشنبه
- 1
- شهریور
- 1400
- ساعت
- 13:7
- نوشته شده توسط
- یوسف اکبری
ارسال دیدگاه