اولی دفن میت اول بئله دور قراری شیعه
نه کفن اولوب حسینه نه سحر مزاری شیعه
قالوب ایستی قوملار اوسته بدنی هنوز حسینون
یوخ او پاره جسمینی دفن ائدنی هنوز حسینون
نه حنوط وار نه عسلی کفنی هنوز حسینون
نه مقامه گور حسینون یتیشوبدی کاری شیعه
بدن شریفی دوشموش قوری یئرده پیرهن سیز
دولانور جدا باشیندا باشی ظلمیلن بدن سیز
شهدای کربلانون بدنی قالوب کفن سیز
سویله قبر کن تاپیلماز قازالار مزاری شیعه
ستمی هنوز شمرون کی یتیشمیوب تمامه
قولی باغلی اهل بیتی آپارور پیاده شامه
باش آچوخ عروس قاسم نئجه بزم خاص و عامه
گئده نه روادور آخر بئله گلعزاری شیعه
داخی زینبون خانملیق گونون آلدی شمر الیندن
قدی هم کمانه دوندی شه کربلا غمیندن
آغاروبدی قاره زلفی غم و درد دشمنیندن
نیه بیلمرم بو چرخون بئله دور مداری شیعه
چکیلنده قنلگاهه او زمان قطار زینب
نه گوروب یئر اوزره دوشمیش تن شهریار زینب
داخی قالمادی الینده او دم اختیار زینب
گله جک نوایه نی تک دل داغداری شیعه
بلشوبدی قانه گوردی کیم او شاه کم سپاهی
دئدی دور ایاقه قارداش داخی زینبون پناهی
اسرای کربلانون گویه چیخدی سوز آهی
کی خزانه دوندی چرخون او زمان بهاری شیعه
بیزی شهر شامه ایلر بو زمان روانه سن سیز
گئده بیلمرم حسینیم ائله بیر مکانه سن سیز
سالیرام غم فراقون اوتونی بو جانه سن سیز
بئله یاندورور بو جانی اودوون شراری شیعه
گوتوروب حسین قانیندان ائلدی خضاب زلفون
سالوب عارضینه ائتدی او زمان نقاب زلفون
ائلدی یوزینه معجر یئرینه حجاب زلفون
سویله کیم گوروب جهاندا بئله خوار و زاری شیعه
سوله نه روادور آخر گل و گلشن مدینه
قولی باغلی ناقه اوسته گله نالیه سکینه
بو ستم بو غم گراندور بلی شاه مشرقینه
کی تیکان الینه دوشموش گولون اختیاری شیعه
بو عزای غم فزاده گلو چون فغانه "بیضا "
سالو نسگیلین دمادم دل آسمانه "بیضا"
گئجه گوندوز اوخشار آغلار بلی عاشقانه "بیضا"
کی همیشه اهل عشقون بیله دی قراری شیعه
- دوشنبه
- 1
- شهریور
- 1400
- ساعت
- 13:37
- نوشته شده توسط
- یوسف اکبری
ارسال دیدگاه