ائتموسن عزم ایندی که میدانه بسم الله اوغول
لطف رحمن الرحیم اولسون سنه همراه اوغول
گئت اوغول بو گئتمگه الحمدالله ایلرم
ذکر الرحمن ائدوب بو هجری دلخواه ایلرم
شکر رب العالمین و حمد لله ایلرم
یارحیم عرض ایلرم یارون اولا الله اوغول
ال چکوب سندن بوگون سالدوم یولا ای مه جبین
حافظ اولسون مالک و مملوک شاه یوم دین
بو عبادتدور قبول ائتسه اگر جان آفرین
سویلرم ایاک نعبد روز و سال و ماه اوغول
هم و ایاک دیوب ذکریم اولور هم نستعین
اهداناً تا هم صراط المستقیم وار یقین
آتش هجرون اولاندا شعله ور اولسون معین
بیر بله گفتاریمه آگاهیدور والله اوغول
گه صراط الذینی ایلرم ورد زبان
گاه انعمت علیهم کلمه سین قیلام بیان
غیر مغضوب علیهم دور مقالاته لسان
حاش لله بو ولاالضالین اولا دلخواه اوغول
ایسته بسم الله رحمن الرحیم اولسون مدد
قوی قدم بو کارزاره قل هوالله احد
اول مقابل اشقیایه سویله الله الصمد
لم یلد ورد ائت و لم یولدده چکمه آه اوغول
ائت ولم یکن له کفوا احد وردین بیان
شمر الینده خنجر کینه سنان الده سنان
دانماسون حقون علی محشرده قوم کوفیان
قتلوه آماده دور بو لشگر گمراه اوغول
سن ذبیح حق سن من هاجر دوران علی
شاه لب تشنه خلیل اللهیدور الان علی
گئت بو کوی عشقده وئرم سنی قربان علی
کربلادور حضرت معبوده قربانگاه اوغول
توکمگه قانون مصمم دور بو گون بو سلسله
راضیم منده بو امره ائتمرم اصلا گله
تاب ائدر هانسی آنا آیا اوغول بو مشگله
تشنه لب قربان اولا سن تک ذبیح الله اوغول
فاخرانه باتماقون قانه اوجالدار باشیمی
باشوه بو آغ هوروکدن یولارام شاباشیمی
قویمارام عمون گوره بو دیده خونپاشیمی
اولمارام شرمنده سن اولسون فنا فی الله اوغول
رسمیدور تز ئولدوروللر گر گوزل اولسا شکار
دلخوشام بو خیمه لرده چکمرم چوخ انتظار
بیر زمان بیلم گتوردی خیمه گاهه یاری یار
سن بیلورسن که آنونداوار دل آگاه اوغول
هر غم و هر درده کل من علیها فان اولور
شبه احمد باش وئرنده گل کیمین خندان اولور
سن کیمی شایسته قربان لایق جانان اولور
سوز و ساز عشقدن اخذ ایلر عز و جاه اوغول
پاکباز اولسا اگر "بیضا" تاپار قلب سلیم
تک حسین شانینده نازلدور عن النباء العظیم
غبطه ایلر بیر بئله شخصه مسیحیلن کلیم
مرحبا اولدون حسینیلن بو گون همراه اوغول
- سه شنبه
- 2
- شهریور
- 1400
- ساعت
- 14:49
- نوشته شده توسط
- یوسف اکبری
ارسال دیدگاه