زال عفریت جهان اوینادی چوخ جانلارینان
پنجه لر نرم ایلدی رستم دستان لاریلان
کامینه چکدی سلیمانلاری میلیان لاریلان
فرصت زور و توانایی ویروب هر احده
کله سی اوسته ییخوبدور اونی زیر لحده
بو همان هیوره دنیادو زنی هرزه روان
اونون اوستونده توکولدی یره هر دوره ده قان
توپ فوتبال کیمی چوخ باشلارا ویرمیش جولان
بشرون اوسته آتم بمبی توکن پنجه لری
هضمه ویرمیش قره تپراقدا گورونمز اثری
یوخدی تاریخی نی بو کهنه سرانون اوخیان
صحنه سینده سینما پرده سی دور دور زمان
مختلف شکل لر اول پرده ده ایلر هیجان
نئجه آیینه ده انسان نظر ایلر ئوزونه
گورسنن پرده ده کی شکلدو عکسون گوزونه
ایاق آلتدا قاریشوب تپراقا اعضای فنا
مغز سلطان و زبان وزرا دست گدا
استخوان علما پیکر مردان خدا
قیندوب شیر ژیان لار اورگین ریگ تراب
اریدوبدور سوموگون شیره سین ایلوبدی مذاب
نئجه ماشین دوزلور پیکره آهنیدن
خلق اولوب جوهر و تپراقیدن اعضای بدن
یل دور اود دور سو دور انسانی ماشین تک یریدن
روح راننده سی دور روحسیز انسان یریمز
صانعی ذات خدا ویرمسه فرمان یریمز
ئوزوه گر باخاسان یاخچی حسابه گیده سن
اسکلت اوستن اتیلن دری نی رد ایده سن
گوروسن اوندا نئجه گولملی بیر شکلیده سن
خواهشون غرق ایدوب بار کثافت ده سنی
روشون گمره ایدوب شوق ریاست ده سنی
نازنین لر کی دوتوب جامه کرباس حقیر
قو توکی دی تشکی گیدیگی اطلاس و حریر
مرغ و ماهی یدیگی ایچدیگی فالوده و شیر
بوکولوب گور نئجه کرباسه بگنمزدی اونی
توکولوب آغزینا کافور یینمزدی اونی
جاهلا مجلس عیشونده کیچن لذته باخ
عارفا صوم و صلاتونده اولان زحمته باخ
عوضینده ویریلن دوزخه باخ جنته باخ
نه قالور جاهله لذت نه قالور عارفه غم
بو آلور لذته نیران بو قویار عدنه قدم
حظ نفسه عظمت لو یروی ساتما بشر
دست بازیچه ده ایمانوی اویناتما بشر
سرمه غفلتی چکمه گوزوه یاتما بشر
قبر تاریکیده والله اویانارسان یوخودان
نفسوه اوندا بیلرسن کی ویروبسان نه زیان
- سه شنبه
- 2
- شهریور
- 1400
- ساعت
- 15:1
- نوشته شده توسط
- یوسف اکبری
- شاعر:
-
حاج عباسقلی یحیوی
ارسال دیدگاه