وقت اولدی که مقصوده یته حجت داور
تپراقه دوشوب صاق یوزی اوستنده اوسرور
قویدی یوزینی تپراقا دلبند پیمبر
عرض ایتدی من ایفا ایلدیم عهدیمه یارب
قالدی سنون امیدوه زهرا قیزی زینب
اجرا ایلدیم امروی ای خالق منان
ویردیم بو گوزل دینوه یتمیش ایکی قربان
یانام سوسوزومدان قوتارام شیعه نی اوددان
بیر دفعه دیسون یوخدی سنون شیعوه پروا
مین اوغلوم ئوله آغلامارام دهرده اصلا
مین اوغلوم ئوله گر بو بیاباندا رضایم
مین یول اولام آغشته قزل قاندا رضایم
باشیم دولانا نیزه عدواندا رضایم
اما دگلم راضی اولاندا دم محشر
بیر ذره اولا شیعه لرون قلبی مکدر
مین اوغلوم اولا هر بیری اکبر کیمی زیبا
شهلا گوزی گل عارضی سرو قدی رعنا
مجنون اولا لیلالری من باخمارام اصلا
آدون گله گلبرگ خزان تک اسرم من
مین اوغلومی بیر آدوه قربان کسرم من
مین نازلی قیزیم اولسا یاپشسا اتگیمدن
مین اوخ ساچلوب قلبمه چخسا کوره گیمدن
مین دفعه باشیم ذبح اولا گر تشنه قفادن
عشقونده من ایوای دیمرم رسم وفادن
یارب بو سنق قلبیم اولوب وصلوه مایل
جبریلوه دی شهپرینی ائتمیه حایل
تا بلکه اولام مقصد و منظوریمه نایل
آخر نه ایدور عابد و معبود آراسندا
بیجا دایانوب شاهد و مشهود آراسندا
موسی دیئنی من دیمرم ای حق یکنا
ئوز گوردوگیمه نجه ارنی دئیوم آیا
فرض ایله منیم بو یارالی سینمه می سینا
بیر جلوه ایله محو جمال حق اولوم من
مشتق اولونان نوره گنه ملحق اولوم من
ناگه یتشوب هاتف غیبون بو نداسی
ای فاطمنون گوزلرینون نور و صفاسی
سنلندی منیم خلقتمون زیب و صفاسی
جنات سنون قصر سنون حور سنوندور
جناتی منور ایلین نور سنوندور
دین مکتبنی سن ایلدون قانیله ترمیم
قرآنی بو قانون ایده جک عالمه تعلیم
ارواح و ملک جن و بشر امروه تسلیم
سن باخما که اوخ نیزه قلج پیرهنوندور
نه حکم ایلسون روز جزا حکم سنوندور
زینت ویریلوب روضه رضوانه سراسر
حورای بهشتون گوزی هجرونده اولوب تر
جنتده آنون فاطمه الان سنی گوزلر
گل قانوی باجون حرمون زلفنه یاخسون
بیر قان که منم صاحبی ای شاه قوی آخسون
حلقوندن آخان قانوی گل عارضه یاخما
یوز عرشه دوتوب یاندیروب عالملری باخما
چوخ حسرتله آب گل آلودیه باخما
چک قرمزی قانیله قلم نقش حیاته
کوثر یولوی گوزلوری یالوارما فراته
مین اوچ یوز هشتاد بش هجری مه شعبان
بو شعری یازوب "منزوی"با دیده گریان
ذوق اهلی اوخوندوقجا ایدر حظ فراوان
چون روحی اولان سوز ویره جک روح اوخوناندا
کهنلمیه جک دست حوادث توخوناندا
- سه شنبه
- 2
- شهریور
- 1400
- ساعت
- 15:13
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه