بو نجه عشقدی عشق عالمین آباد ائلیوب
بیر سوسوز طفل خدایا اونی بنیاد ائلیوب
کوی عشقی او سوسوز لبلره میعاد ائلیوب
شرمدن دجله ده سو ناله و فریاد ائلیوب
سس دوشوب شط فراته اودا هی داد ائلیوب
گنجۀ عشق حسین ایچره قالان توشیه باخ
هاردا وار بیر بله عاشق گئدوب هر گوشیه باخ
عشقه باخ اصغره باخ باده و مدهوشیه باخ
اوچ پر اوخدان بوغازیندا اکیلن خوشیه باخ
بیله شور و شرری قیس نه فرهاد ائلیوب
آدم حیرتده قالوب بهت آپاروب موسانی
نوح بوعشقی گوروب ترک ائلیوب دریانی
عیسی مبهوت باخوب ترس دوتوب ترسانی
متحیّردی خلیل هم ئوزی هم قربانی
انبیانی نجه بو صحنه گور ارشاد ائلیوب
باخوب آغلار بله بیر صحنیه داغلار تپه لر
دجله ده باشه ورار سلسله پیچان لپه لر
لعن ائدوب آب فراته ئوز ایچینده شپه لر
گوتورور یل قومی سو باشینه هرآن سپه لر
نجه بیر ظلمدی ظالم اونی ایجاد ائلیوب
گوز یاشین حیرتیلن داغ توکر درّه توکر
انجم و شمس و قمر اشکینی بالمرّه توکر
گون مداریندن انوب یر یوزینه ذرّه توکر
آسمان گوز یاشی هر لحظه بله شرّه توکر
آب و خاک و فلک و آتش و هم باد ائلیوب
لا دئموب قالوا بلی ده او شه باده پرست
تاپدی پیروزی بلی سویله جگین روز الست
ائله سرمستیدی عشقنده او پیمانه بدست
مست ائدوب مستی مستانه سی شش ماهه نی مست
ائله سرمستی نه فرزین و نه فرزاد ائلیوب
نجه بی پرده گوروب پرتو روی یاری
جذب اولوب یاره طرف ترک ائلیوب اغیاری
عشقون الدن گئدوب اوندا محک و معیاری
قویوب حیران فلک و ثابت و هم سیّاری
عشق بیر لحظه ده ترک هامی ابعاد ائلیوب
دگمیوب اصغره اوخ بلکه دگوب ذات حقه
نیلیور دگسه اگر تیشه اوزی گل ورقه
اصغرون قانی چیخوب زینت اولوبدور شفقه
آناسی آهین اوجالدوب فلک نه طبقه
آهی هر خانۀ اهریمنی برباد ائلیوب
کسوب اصغر بوغازین اوخ نجه قدّاره کسر
گوردیلر حرمله ئوز ایلدیگی ظلمه اسر
طفل شش ماهیه باخ شور بدل عشق ائیلر
اوچ پر اوخدان پرآچوب اوچماقا امّا تلسر
تلسر چونکه قفسدن ئوزین آزاد ائلیوب
یتیشوب باش باشا پیمانه لر و پیمانلار
یاتشوب یان یانا شوریله سوسوز قربانلار
قاریشوب قان قانا شوقیله وفالی قانلار
چاتشوب جان جانا میدان مناده جانلار
کوی عشّاقده خوش منظره رُخداد ائلیوب
اکبرون قانی سوزولموش یوزینه هاله کیمی
خنجرون یاره سی باشدان گل آچوب لاله کیمی
رنگ و رخساری اولوب لیلی نون آلاله کیمی
گوزلرین یاشی یاناقلاردان آخوب ژاله کیمی
دوشوب هر قطره یوزه اکبر آدین یاد ائلیوب
درک ائدوب بو غم جانکاهی او دم تازه گلین
آغلادی گوز یاشی آخدی او پرآوازه گلین
آز قالوب روحی گله قوش کیمی پروازه گلین
هاردا گورمشدی مگر ظلمی بو اندازه گلین
بله بیر ظلمی نه فرعون نه شدّاد ائلیوب
گوردی شه نهر فراتی صورا بیراهه یولی
گه اوجا نخلی گهی سرو قدی گاه خولی
آیریلان نخل بدندن کسیلن صاق و صولی
کسیلنده کسوب امیّدین او قوّتلی قولی
قدینی خم ائلین فرقی گنه یاد ائلیوب
گوردی اوندا او ره آورد شهامت یخیلوب
پوزولوب سرو تناور قد و قامت یخیلوب
معدن عشق و وفا کان صداقت یخیلوب
یخیلوب قولسوز آت اوستن نجه راحت یخیلوب
قارداشیندان او زمان سسلیوب امداد ائلیوب
اوچ پر اوخ سانجلوب آلنین ائلیوب چاک یاتوب
سینه سی خنجرو زوبینیله حکاک یاتوب
قوللارین بذل ائلیوب عشقه فرحناک یاتوب
آهنین گرز دگنده باشینا پاک یاتوب
او وفا کانی وفا کلمه سینی شاد ائلیوب
پیلتن آتلی پیاده سپه ِ گمراهی
رُخ شطرنجیده مات ائتدی وزیرسیز شاهی
یازارام قرخ ایل اولار بو محن جانکاهی
دِیون هر یرده بو" بیضایه" حسین اللهی
زاهد و عابد اگرچه منه ایراد ائلیوب
- چهارشنبه
- 3
- شهریور
- 1400
- ساعت
- 17:42
- نوشته شده توسط
- یوسف اکبری
ارسال دیدگاه