ای جسمی اولان گول كیمی صدپاره حسینیم
بیر جسمده اولماز بو قَدَر یاره حسینیم
ای ناطق قرآن و حبیب شه لولاك
قرآن كیمی شیرازه دن اولموش بو تن پاك
ثاراللَّهی ظلمیله تؤكوب فرقه ی ناپاك
صاحبدی خدا بو تؤكولن ثاره حسینیم
بو قانی تؤكنلر بولوری خون خدادی
«اِنّی دِیَتُك» حق بویوروب،ذاتی بهادی
الله قانینی ظلمیله توكماق نه روادی
لعنت ائله بیر قوم ستمكاره حسینیم
گَلدون بو مرامیله برادر بو دیاره
تا بوردا یارالی گئده سن محضر یاره
هر زخمون اولوب ذبح عظیمه بیر اشاره
مصداقدی فرمایش داداره حسینیم
قانون دوشوب هر قطره یره،یرده یازوب حق
الحق سنیدون حقّ سوزون حقّیدی مطلق
وئردون نه گؤزل دینه بو گون قانیله رونق
وار حشره كیمی رونقی همواره حسینیم
كشتی نجات عالمه مصباح هُداسن
اصحاب وفا رهبری شاه شهداسن
الله ایله ائتدون نه گؤزل بیع و شرا سن
گَتدون هامی سرمایه وی بازاره حسینیم
ظلمیله سنی قانیوه غلطان ایلیوبلر
قانه بویانان نعشوی عریان ایلیوبلر
بو ظلم كی بو فرقه ی عدوان ایلیوبلر
شایسته دییل مُلحِد و كفّاره حسینیم
داش،نیزه،قلج یاره سی چوخدور بدنونده
هر زخمدن آرتوخ اولان اوخدور بدنونده
بیر بوسه یئری زینبه یوخدور بدنونده
آسان دَیی بو غصه،منِ زاره حسینیم
سندن سورا بو دشتیده اولاد پیمبر
كُفّاره اسیر اولدی جفائیله برادر
رحم ائتمدی،شرم ایلمه دی شِمر ستمگر
زنجیر ووروب عابد بیماره حسینیم
باشسیز بدنون یئرده،باشون نوك جداده
گوردوقجا گلور آل علی ناله و داده
اؤلدوردی سنی اهل جفا یتدی مراده
مأموردیلر بیر بئله آزاره حسینیم
نورانی باشون بنزیری قارداش گونه آیه
ناقصدی بو تشبیه،یوخ آی گونده بو پایه
قرآن اوخوسان نیزه ده سن آیه به آیه
منده تؤكرم گؤز یاشی رُخساره حسینیم
- چهارشنبه
- 3
- شهریور
- 1400
- ساعت
- 19:35
- نوشته شده توسط
- یوسف اکبری
ارسال دیدگاه