دیوانه حسینم درمانه حاجتیم وار
چون هر گئجه دخیلم زنجیره عادتیم وار
اورگشمیشم بو رمزی عرشون ملک لریندن
ال چکمرم حسینون قانلو اتک لریندن
فطرس تک حاجت آللام پرخون بیلک لریندن
اصغر کیمی قاباقدا اعظم وساطتیم وار
فرمایش ایلیوبدور جعفر امام صادق
هر کیمسه نون حسینه ایمانی اولسا لایق
قلبینده شبهه قالماز الهام اولور حقایق
بو باره ده یازیلمش بی حد روایتیم وار
سنگر گورر گوزومده مژگان چشمگیری
ئوز گوزلرینده گورمور اما سه شعبه تیری
بی جا مذمت ایلور بو عاشق حقیری
بیلمز نقدر حسینه عشق و ارادتیم وار
ایمان ایچینده در نورافکنیم حسیندور
ظلماتیده چراغ شب روشنیم حسیندور
عکس حسین بهشتیم هم گلشنیم حسیندور
هر گونده منزلیمده باغ زیارتیم وار
ای مدعی عزیز ذات خدا حسیندور
هر گوز اونی گورنمز شمس الضحی حسیندور
صبحه صفا حسیندور ظهره ضیا حسیندور
اول نوریدن اورکده شمع هدایتیم وار
گوگدن یاغان یاغیشلار یک رنگ و یک صدادور
داغدا آجی تیکاندور باغدا گل صفادور
نام حسینده مثل باران پر بهادور
سن بیر آجی تیکانسان من گل طراوتیم وار
ای مدعی دخیلم گودال قتلگاهه
یوز قویمیشام اوزاقدان شش گوشه بارگاهه
یانمیش چوله سپیلمیش خرگاهه خیمه گاهه
مصنوعی شیعه لردن قلبیمده نفرتیم وار
یا مظهر العجایب یا مظهرالغرایب
سال باشیم اوسته سایه سنسن بو باشه صاحب
سن اهل فهمه ظاهر سن اهل جهله غایب
شور محبتوندن باشدا علامتیم وار
دنیاده بیر غریبم الله منیم پناهیم
بیر بنده فقیرم دینیمدو تکیه گاهیم
هم تربت حسیندور طاعتده سجده گاهیم
حمد ایلرم خدایه روح عبادتیم وار
من ریزه خار خوان پر زیور حسینم
پروانه تک نثار نور سر حسینم
هم خاک پای مولا خاک در حسینم
قوم بنی اسدلن ارحامی نسبتیم وار
وقتی کی جان ویرنده گوزدن چکیلدی پرده
ظاهر اولور حقیقت سیمای خیر و شرده
تصدیق ایدرسن اوندا گرداب پر خطرده
آیا نیه حسینه دنیاده خدمتیم وار
زنبور انگبینم هر گلدن آلمارام بار
برگ محمدیدن قلببیمده شبنمیم وار
یدی کتاب نوحه قویدوم ئوزومدن آثار
عباسقلی آدیم دور" یحیوی "شهرتیم وار
محشر گونی آقامدا چشم شفاعتیم وار
- چهارشنبه
- 3
- شهریور
- 1400
- ساعت
- 19:47
- نوشته شده توسط
- یوسف اکبری
- شاعر:
-
حاج عباسقلی یحیوی
ارسال دیدگاه