امام او عرصه ده بیر نوعی کشف حال ایتدی
تمام دشمنی پیچیده ملال ایتدی
او سنگ دللره تاثیر ائدوب ز بس آهی
گتوردی شیونه آغلاتدی قوم گمراهی
اوجالدی ناله و شیون سپهره اعدادن
که آز قالوب اولالار منصرف او دعوادن
گوروب عمر قشون ایچره وار انقلاب اثری
گرک علاج ائده بو انقلابه مختصری
باخوب اویان بویانا غیظیله او بی ایمان
دوروبدی حرمله گوردی الینده تیر و کمان
چاغیردی حرمله نی اول لعین خانه خراب
دیدی دایانما داخی ویر گیلن حسینه جواب
یاخندی تفرقه سالسون بو گون جماعتمه
چوخ آز قالور دوشه اود خرمن ریاضتمه
اماندی قویما حسین حجّتین تمام ایتسون
او قدری قالموری زحمتلریم هَدر گِتسون
او وقته حرمله ال قویدی چشم طاعاته
ال آچدی ظلمه سالوب غلغله حجاباته
دیدی امیر بو دمده بیر اوخ کمانه قویوم
آتانی یا بالانی هانسینی نشانه قویوم
دیدی آخوبدی باشی اصغرین پریشاندی
بوغازی گورموسن آی قرصی تک نمایاندی
او داش اورکلی نظر سالدی بیر نشانگاهه
گلور نشانیه گوردی عجب او شش ماهه
دیزین وروب یره بیر اوخ قویوب کمان اوسته
تمام قوه سین ایتدی کمانه پیوسته
قوتاردی زوریله پیکان ظلمی دستیندن
پر آچدی دوشدی یولا اوخ که چخدی شصتندن
هواده سَسلَدی اوخ اصغری دایان گلدیم
منیم که منتظریم سن گوز آچ اویان گلدیم
یتن کیمی اویادوب حاله گتدی دیندیردی
چخاتدی پیرهنین قرمزی گیندیردی
بالامزین اولا بولدی که آتاسی سُووری
علاوه خوردا اوشاق قرمزی لباس سووری
بویادی قانیله قونداقنی خدنگ بلا
دگنده اوخ گوزونی آچدی هولیلن او بالا
باخوب آتا یوزونه شوق اوزیله یومدی گوزون
گوزون یومان کیمی زهرا یانندا گوردی اوزون
آتا گوروب که بالا ظلم الیله اوخلاندی
خدا بولور نجه یاندی نجه الولاندی
توکوب سرشگی گوزوندن او قانیلن قاتدی
چکوب بالا بوغازیندان اوخی یره آتدی
او قانی اوجنا دولدوردی آه و زاریلن
سَپوپ سَمایه طرف چشم اشگباریلن
دیدی الهی گواه اول منیم بو غملریمه
سو ایستدیم نجه گور ویردیلر سو اصغریمه
دونوب اولوب متوجه او غنچۀ ترینه
دوباره اوجونی دولدوردی یاخدی تِلّلرینه
گوروب بالاسنی قونداق ایچینده جان ویروری
قنادی باغلی قوشون اُلماقین نشان ویروری
قویوب یره بالانی اشگی سیل تک داشدی
بولنمورم نجه بند قماطینی آچدی
همینکه بند قماطین آچوب یره سالدی
آتا باخا باخا جان ویردی ال ایاق چالدی
توکوب سرشکنی درده گتوردی آفاقی
گوتوردی باغرینا باسدی او قانلی قونداقی
خیال ایدور آپارا خیمیه یوزی گَلمور
علاوه صبری گیدوب گِتماقا دیزی گلمور
قالوبدی اللری اوستونده یوخدی بیر آلانی
باخور یوزونه گهی باغرینا باسور بالانی
گلور محبّتی جوشه تِکور گوزون گوزونه
گهی یاراسین اوپور گه قویور یوزون یوزونه
گهی یرور دایانور گه توکور گوزوندن یاش
گه اکبرین چاغیرور سَسلوری گهی قارداش
نه اکبریندن اولور بیر جواب او بی یاره
نه قارداشندان اولور چاره او دل افکاره
گلور یاخونلاشوری خیمیه گینه قییدیر
حیا ایدور دایانور بر زمان تحمّل ایدور
گیدور آناسینا ویرسون گورور که خجلتی وار
دایانسین عرصه گه ایچره عدو شماتتی وار
بو مطلب ایتدی مقّید او شاه مظلومی
گلوب خیامه چاغیردی باجیسی کلثومی
دیدی ربابه دی گلسون بالا سنی آلسون
ایچوب سو راحت اولوب رختخوابنی سالسون
سو فکرینی داخی باشدان باجی آتوبدی بالام
اوجادان آغلامیون دینجلوب یاتوبدی بالام
بو بیر خبردی گتوردی خیامه اصغرینی
یتشدی سَسلَدی آغلار قالان حَرملرینی
ولی بر آیری خبروار یازاندا خامه یانور
بسان تیر شهاب اود سالور بو نامه یانور
او دمکه شاه شهید اصغری قوجاقینده
قیتدی خیمیه معناده جان دوداقینده
دیر که راوی باخیردیم او شاه خونجگره
گوروم نجه آپارور اصغرینی خیمه لره
اُلنده قانلی بالا دلده مین فغان آپارور
گوروب مهاینه بر لاله باغبان آپارور
گدوب دایاندی بیر آز یول قالاندا خرگاهه
خیامه گیتمدی سالدی یولونی بی راهه
فغان و شیونیلن لرزه مهر و ماهه سالوب
دولاندیروب یولونی پشت خیمگاهه سالوب
او حاله آغلیا عُمرومجه گوزلریم آزدی
بالانی قویدی یره قبرینی اوزی قازدی
سرشکنی یوزه غربال دیده دن اَلدی
او سود امر بالانی اوز الیله دفن ایلدی
بولوردی آت چاپاجاق قتلگهده قوم دَنی
بو ظلمدن اولا آسوده اصغرین بدنی
علاوه باشلاری اعدا کسوب جدایه ویرار
شراره بارگه عرش کبریایه ویرار
بو ظلم اولونمیه بلکه او مه لقا باشینا
عدو کسوب او باشی ویرمیه جدا باشنا
ولی گوزوندن ایراق اول امام ممتحنین
تاپوب چیخاتدیلا قبریندن اصغرین بدنین
او دم که ایمن اولوب ابن سعد هر یاندان
جداده باشلاری اعدا گچیتدیلر ساندان
ایدردی باشلارا بیر بیر جدا باشندا نگاه
اولوردی شاد او لعین ستمگر گمراه
تمام باشلارا دوشدی او کافرین نظری
دیدی نولوبدی حسینون هانی او سود اَمری
جدا باشندا بو باشلار که مهر رخشان تَک
سالولا شعشعه آفاقه ماه تابان تک
بو آیلارین یانیجا بیر ستاره لازمدور
بو طمطراقیمه زینت دوباره لازمدور
گرک بو گون تاپولا اصغرینده باشی گَله
منیم مرامیم او باش گلمینجه گَلمز اَله
سپاهدن بیری سالدی دل جهانه شَرر
ویروب قضیه نی سعد اوغلونا تمام خبر
دیدی او دمکه حسین حَربگاهدن گیتدی
آپاردی خیمه دالندا او طفلی دفن ایتدی
او کافر امر ایلدی نیزه دارلر او زمان
آپاردیلار او یره حمله اَللرینده سنان
ایدردی سبقت او بی شرملر بیری بیرینه
وراردی نیزه لرین وادی بلا یرینه
دم سنانیله دشت بلا که حَفر اولدی
هوا دوتولدی بولود تَک غباریلن دولدی
وراندا بیرده یره نیزه سینی بیر یاغی
چخاتدی نیزه باشندا او قانلی قونداقی
کسیلدی هلهله و هایهوی لشگردن
آیردیلار او بالانین باشینی پیکردن
وروب جدایه ردیف ایتدیلر حسین باشینا
او باعث اولدی ربابین اُلونجه گوز یاشنا
«شهاب» اگر چه مصیبت بیوکدی سوز چوخدی
بس ایله بو قلمین قابلیّتی یوخدی
بو طفلی واسطه قیل الده اولما چوخ مأیوس
اولور که قسمت اولا ایلیاخ مزارین بوس
- جمعه
- 5
- شهریور
- 1400
- ساعت
- 11:9
- نوشته شده توسط
- یوسف اکبری
ارسال دیدگاه