ایدون سرشکوزی جاری مدام ابوالفضله
سَبیل اشک ایلیون تشنه کام ابوالفضله
اجازه گوز یاشینا سیل تک تمام ویرون
او غملی روضه سینی یاد ایدوب سلام ویرون
همیشه گوز یاشین حسرت گوزیله جویا دور
سوور آخان سویی هر یرده اولسا سقّادور
سکینه دن سو خصوصینده گر چه خجلتی وار
خدا یانیندا ولکن بیوک جلالتی وار
او گونکه امر خداوندیله قیامت اولور
ایکی کسیک الی سرمایۀ شفاعت اولور
آناسی فاطمه ائیکه اُمید امّت دور
دیر شفاعته عبّاس الی کفایت دور
نقدر فکر ایده سن عزّتین محال اولماز
اولوم جلالنه قربان بئله جلال اولماز
تصوّر ایله رعیت ده بیر جلالته باخ
مقام و مرتبه سین سیر قیل رعیّته باخ
اوزی رعیتدی گور نه قدر جاه آپاروب
امام کرب و بلاده اونا پناه آپاروب
او هانسی ساعتیدی عالمین پناهی حسین
پناه آپاردی ابوالفضله سیّد حرمین
همان او وقتیدی باتمشدی قانه انصاری
قالوردی بیر علمی بیرده بو علمداری
اسوردی تا نقدر اَلده پرچم علمی
یوخیدی فاطمه قیزلارینون مَلال و غمی
ولیک اوچ گونودی خیمه لرده سو یوخودی
بو باره دن حرم عصمتون غمی چوخودی
دولیدی شیونیلن خیمه و جلال حسین
سیزیلداشوردی سوسوزدان تمام عیال حسین
سوسوز بالالار اَلنده گورنده بوش جامی
دولوب پیالۀ چشمی کسیلدی آرامی
گلوبدی خاطری درده حرم نواسیندن
توکندی صبر دلی العطش صداسیندن
غَیور طبعینه گنجیده اولمادی باخسون
سوسوزلوق آتش اطفالی یاندیروب یاخسون
مشّرف اولدی حضور امامه چوخ دلتنگ
چوخ عِجز قیلدی که بلکه آلا اجازۀ جنگ
امام ویرمدی اذن جدال عَلمداره
بویوردی سنسیز ایدیم من بو چولده نه جاره
منیم بو گون بو بیاباندا سن پناهیم سن
رئیس لشگر و سر کردۀ سپاهیم سن
منیم بو گون علمیم پایدار دور سنیلن
بو خیمه لر بو حرم بر قراریدور سنیلن
کُمکلریم کیمی یتسن شهادته سَنده
اولور منیم داخی جمعیتیم پراکنده
دوباره عرض ایدوب عبّاس که ای امام زمان
نجه گوروم سنی یالقوز اولوم سنه قربان
اجازه ویر منه یوخدور حیاتمه هَوسیم
دوشوبدی کثرت غمدن شماریه نفسیم
نجه روادی فراتین یولونی باغلیلر
سوسوز قالوب بالالار خیمه لرده آغلیلر
نجه روادی منیم قولّاریم سلامت اولا
دوروب باخام سوسوزوندان سکینه رنگی سولا
اگر چه دامنوه بیرده بیر اَلیم یتمز
بله حیاتی ندیم غیرتیم قبول ایتمز
شهیدلر یری بزم قتالیده خوشدور
غمیم زیاده دی چونکه منیم یریم بوشدور
قوروبلا مجلس شورا قوجا جوان یکسر
کَسیک باشیله صباح ایلسونله شامه سفر
ویروبله رأی تماماً چوخ اکثریت وار
بو گون اورا اِیده رم منده ده بو نیّت وار
مرخّص ایله گلن عشق بیدقین گوتوروم
گیدوم او مجلسه منده مرامیمی یتوروم
مگر بو قدر غمیله دایانا بوللّم من
مرخص ایلمسن غیرتیمدن اوللّم من
امام عصر گلوگیر گوردی عبّاسی
گَلوبدی لرزیه تترر تمام اعضاسی
یاخیندی آیریلا روحی غم و مصیبتدن
علی کیمی قیزاروب گوزلری حَمیتدن
اجازه ویردی علمدارینون آچوب یولونی
ولیک بو سوزیلن باغلادی ایکی قولونی
بیوردی ایمدیکه آماده سن گیدورسن گیت
سوسوز بالالاریما بر ایچیم سو تحصیل ایت
گُتوردی بیر علمی بیرده بر قوری مشگی
فراتدن قباق ایسلاتدی مشگنی اشگی
وداع قیلدی هامی اهلبیتی فرداً فرد
سکینه سوزشنی سو سوزیله ایلدی سرد
ویروب سو وعده سی اول مه جبینه آیریلدی
آلوب او مژده نی آخر سکینه آیریلدی
قلجین ایتدی حمایل اولوب عقابه سوار
سوروب عقابنی فرزند حیدر کرّار
یتشدی لشگر اعدا برابرینده دوروب
ابوتراب کیمی نیزه سین ترابه وروب
ازل رجز اوخیوب آشکار ایدوب حَسَبین
نشان ویروب اولارا بیر به بیر حَسَب نَسَبین
بو قدر ظلمه بیوردی ندور سبب ای قوم
حسین قالوب بو گون اوج گوندی تشنه لب ای قوم
اوزی حرملری خوردا اوشاقلاری یانوری
علاوه بیر سود امر اوغلی وار الولانوری
گلون ویرون آپاریم بیرجه مشگ خیمیه سو
ترحّم ایلیون آخر پیمبر اوغلودی بو
امامدور بو سیزه سیز اگر مسلمان سوز
ایدون ملاحظه قرآنی اهل قرآن سوز
تمام سوره آیاتین ایلیون تفسیر
گورون گلوب کیمون حقّنده آیۀ تطهیر
همان حسیندی بو جدّی مصطفادی بونون
آناسی فاطمه قارداشی مجتبادی بونون
روا دگول آخا آب فرات ای لشگر
سوسوزدان اودلانا اطفال ساقی کوثر
او سنگ دللّره هر قدر ایتدی موعظه لر
جماد تک اولا را ایتمیوب نصیحت اثر
اَلینی قبضۀ شمشیر جانستانه قویوب
علی کیمی قلجین فرق شامیانه قویوب
ایدوب فراته طرف حملۀ دلیرانه
توکوب چو برگ خزان باشلاری بیابانه
حیات خرمننه دشمنون شرر سالدی
بضرب تیغ آچوب یول شریعه نی آلدی
اوزونی سالدی فراته نهنگ بحر و بطا
قباقجا مشگینی دولدوردی تشنه لب سقّا
بو فکریلن که یولون گوزلوری سوسوزدی حرم
ایدوب شتابیله چگننده مشگی بیر محکم
گوزونده آینه تک بیر فرات جلوه لنوب
عطش هجوم ایلیوب تشنه لیق علاوه لنوب
سویون او جلوه سی گُل عارضنی سولدوردی
هر ایکی اوجنی بی اختیار دولدوردی
یتوردی لبلرینه ایستیوب اولا سیراب
پیمبر اوغلونی یاده سالوب اولب بیتاب
ملامت ایلدی اوز نفسین اول وفا کانی
سو ایچمدی داخی گویا بو اولدی عنوانی
حسین سوسوز قالا آیا نجه روادور بو
ایچه دَمادَم اُلوم شربتین ایچم من سو
جهاد اکبر ایدوب نفس بیدقین یخدی
سویی بوشاتدی الیندن سودان سوسوز چخدی
خیامی قصد ایلدی مقصده اولا نایل
کسوب خیام یولون دسته لر اولوب حایل
اوجالدی هلهلۀ گیر و دار میدان دان
خدنگ لر قویولوبدور کمانه هریاندان
وروبلا تیر ز بس هر طرفدن هر دسته
پر آچدی پیکری عَنقا کیمی عُقاب اوسته
او قومدن ابداً ایتمیوبدی باک چو شیر
آچوب النده علم پرچمین چکوب شمشیر
صفوف دشمنی طومار تک آچوب بوکدی
بویاندی صفحه میدان او قدر قان توکدی
اولاندا هر طرفه حمله ور قاچاردی سپاه
نجه که شیر گورنده فرار ایدر روباه
وراردی هر کسه که بر قلج او کان غضب
دوشردی توپراقا دوت پارچا راکب و مرکب
رشادتین ایدوب اظهار ایله جنگ ایتدی
او قوم روسیهه روزگاری تنگ ایتدی
نه قالدی میمنه و میسره نه فوج و نه تیپ
ویروبدی کشتۀ دشمنله پُشته لر ترتیب
دیر او وقتیده راوی تمام وحشتیلن
او چولده منده قاچاردیم قاچان جماعتیلن
صدای الحذر اوج ایلمشدی نُه طاقه
اَلیدی باشیدی پیکر دوشردی توپراقه
او قدر گچمدی گوردوم دیر قاچان لشگر
قیتدی اوز یرینه جمله باغلانوب صفلر
یاتان علملر اوجالدی صدای بهجتلن
چالولا طبل فرح شامیان بَشارتیلن
دیدیم نه وار دیدیلر گور حسین علمدارین
باخوب درست نه گوردوم سالوبلا قولارین
گینه چناه آپاروب قولّارین بقیه سینه
باسوبدی بیدقینی جان تک اوخلی سینه سنه
تمام همّتینی واگذار ایدوب علمه
علم مباد یاتا وحشت اوز ویره حرمه
بولوردی محشر اولور خیمه لرده یاتسا علم
تکوبدی گوز علمه قرخادین کنیز حرم
ایدردی بیرده سو مشگین محافظت چوخ چوخ
یوزون قباقه ویرردی گلنده هر بیر اوخ
گنه آت اوسته دایانمیشدی بو خیالیلن
خیامه بلکه آپارسین سویی او حالیلن
اگر چه یول یوخدی گتماقا واریدی شتاب
باخاردی حسرتیله دشمنه ایدردی خطاب
جماعت ایلمیون عرصه گاهی تنگ منه
یارالیم بو قدر ویرمیون خدنگ منه
وجودیمه دگه گر یوز مین اوخ گوارادور
نقدر شهپر آچا شاهباز زیبا دور
یوخومدی واهمه چشم پُر اشگمه دگسون
ولی هراس ایدرم اوخ سو مشگمه دگسون
حسین حضورینه فکریم بودور سلامه گئدوم
یولومی باغلامیون بیرده بیر خیامه گیدوم
خیامه گیتماقی لازم ایدن بو سودی منه
حسین یانندا بو سو خیلی آبرودی منه
سو اوسته چکمیشم ال من هر ایکی دستمدن
گوتور مَسونله بو سقّالیق اسمین اوستومدن
بو منصبی منه چون سرور مدینه ویروب
همین بو مشک که چِگنیمده دور سکینه ویروب
آلوب سو مشگنی سوز ویرمشم که سو آپارام
نقدر وار نفسیم من اوز عهدیم اُسته وارام
باشیمی کسماقا جهد ایلیسوز اوزوم بولّم
گیدوب ویروب بو سویی خیمیه گینه گَللّم
مدیر عشقدن اثبات عشقه مشقیم وار
حسین یولوندا بو گون اُلماقا چوخ عشقیم وار
حسینه وقفیدی جانیم پناه گاهیمدور
او اللّری که بو گون ویرمیشم گواهیمدور
داخی حیاتیمه پابند اولوم اولان دگولم
گئدوبدی سلسلۀ عشق من قالان دگولم
گلنده رزمگهه جانیمه دویوب گلدیم
حسین بالالارینی چون سوسوز قویوب گلدیم
تمام خورداجا قیزلار یولون کنارینده
سو جامی الده دوروبلار سو انتظارینده
نجه روادی جماعت دولی فرات آخسون
سکینه تشنه قالوب بوش سو جامنه باخسون
او وقته پیک اجل تک پر آچدی بیر پیکان
هواده آلدی علمداریدن قرار و توان
گلوب دگوب ایلدی مشگی پاره سو آخدی
اَل اولمادی سویی حفظ ایلسین دوروب باخدی
امیدینی داخی کسدی مرامه یتماقدان
خیالی منصرف اولدی خیامه گیتماقدان
گلوب دوباره بیر اوخ شامیان سپاهندن
مروّت ایلمدی دگدی سجده گاهندن
اوخی الیله چخاتماقه بس یوخیدی الی
نجه چخاتدی او پیکانی یادگار علی
همین مصیبتین عرض ایتماقا او سردارون
اوزوندن ایسترم عذر اول غیور علمدارون
یازولار دیزلرین ایتدی بلند عقاب اوسته
سالوب اشاقه مبارک جبینین آهسته
ایکی دیزینده دوتوبدور اوخی همین خبره
تکان ویرنده باشندان عمامه دوشدی یره
آچلدی باشی آخوبدور اوخون یریندن قان
یوزی گوزی بویانوب قانیله اولوب الوان
یتوب او الیده بیر سنگدل علمداره
وروبدی قلبنه ازّل دلیله بیر یاره
دیدی هانی او اوزون قولّارون شمادتله
نولوب شجاعتوه دورموسان بو حالتیله
بویوردی حضرت عبّاس کی زنازاده
شجاعتیم هامیا کشفدور بو صحراده
قولوم اولاندا گلوب گورمدون شجاعتمی
نشان ویریدیم او وقته سنه رشادتیمی
او بیحیا دیدی عبّاس یاخشی ساعتدی
سنون یوخوندی منیم اللریم سلامتدی
الین هوایه آپاردی عمود آهنیلن
الینی قویدی بلینه حسین شیونیلن
دمیر عمود آچوخ باش ویران سام پرور
نه عرض ایدم که نه احواله دوشدی اول سرور
همان او ضربتیلن قانی دولدی گوزلرینه
گلوب علمله علمدار کربلا یرینه
بو رسمدور یخلاندا بیری اوجا یردن
ازل قباقه ویرر هر ایکی الین بیردن
یوخیدی اللّری اعضانی حفظ ایدن اَلدی
یتنده صَدمه یوزی اوسته توپراقا گلدی
دوشه دوشه یره گوزدن توکوب یوزه قانیاش
یوزون خیامه دوتوب عرض ایدوب حسین قارداش
بلالیم منی درک ایت بلالی قارداشیم
اماندی گل باشیم اوسته کَسلممش باشیم
آلوب خیامیده قارداش سَسین امام زمان
دیدی دایان گلیرم قارداشون سنه قربان
او وقته زینب عُلیا جنابدندی خبر
حسین آت ایستدی گوردوم که دیزلری تِترَر
اوزون گتوردوم آتین قارداشیم سوار اولسون
حُسینه باخ بِله دنیانی تارمار اولسون
ایاقنی گوتوروب حَلقۀ رکابه قویوب
دیزینده اولمادی قوّت گِنه رکابه قویوب
همین بو طرزیله اوچ دفعه ایلیوب رفتار
سوار اولانمادی اول شهریار بی غمخوار
خانم دیور خبر آلدیم حسین بو حال ندور
نه صبر دور بو نه تأخیر دور خیال ندور
سوار اولوب نیه قارداش شتاب ایتمورسن
قالوب کمکسیز علمدار داده گیتمورسن
بیوردی هیچکیم آنام باجی حالمی بولمور
ایدوم نه چاره سوار اولماقا بلیم گَلمور
سسی خیامه گَلنده بلیم بوکولدی باجی
بلیم بوکولماقین عبّاس اوزوده بولدی باجی
علاقمی اوزی یاخشی بولوردی ازّلدن
او دور که قویمازیدیم قارداشیم گِئده اَلدن
بدنده روحیمیدی آیرلوب گیدوب زینب
گِدن زمان منی بی صبر و تاب ایدوب زینب
ایدوب امامین او احوالی کایناته اثر
مخدّرات حرم نالیه گلوب یکسر
بیری رکابنی دوتدی ملال و محنتیلن
بیری یاپوشدی الندن کمال حسرتیلن
گِروبله قولتوقونا شور و شینلن باجیلار
ایدوبله مرکبه اول بی پناه امامی سوار
الی بلینده جگر داغلی آه و زاره گلوب
تاپا او قولسوز علمداری کار زاره گلوب
دلنده قارداش آدی گوزلرینده قانیاشی
گزردی هر طرفه آختاروردی قارداشی
دیردی ویر سسیمه بیرده سس امان قارداش
هرایه گلمشم عبّاس هارداسان قارداش
یتنده بیر یره ناگاه مرکبی دایانوب
اونون دایانماقنا قلبدن علاوه یانوب
دگولدی جای تحمّل وظیفه یانماقیدی
شتاب وقتیدی یعنی بو نه دایانماقیدی
امام بولدی که بیر محنت مفصّل وار
یره باخاندا گوروبدور ایکی کسیک ال وار
گوتوردی قارداشنون اللرین فغانیلن
باسوبدی باغرینا جان تک او خسته جانیلن
یتوردی السیز علمداری مقصد دلینه
آلوب محبّت اوزیله ایکی الین الینه
النده قارداش اَلی آختاروردی چاره سنی
دولاندی گزدی تاپوب نعش پاره پاره سنی
گوروبکه دشمن آلوبدور آرایه قارداشنی
توانی یوخدی چاغیرسون هرایه قارداشنی
کسولّه باشنی یوخ اللّری قباقه ویره
باشین دولاندیروری بلکه قارداشنی گوره
داغتدی دشمنی دور بَر برادردن
یارالی باشین او مظلومین آلدی اللردن
اولوب پیاده آتندان باشون آلوب دیزینه
گلوب محبّتی جوشه باخان زمان یوزونه
بیوردی آچگوزون ای صاحب علم قارداش
وفا یولوندا اولان قولّاری قلم قارداش
گوز آچگیلن گور اولوبدور نجه خمیده قدیم
بو چولده قویما کمکسیز منی نقدر دیدیم
اوزون گیدوب منی قویدون کمکسیز آخرده
ایدوم نه چاره ابوالفضل بو چاره سیز درده
منیم بو چولده نه بیر یار مهربانیم وار
نه قارداشیم و نه اوغلوم نه دادخواهیم وار
بو غربت اُلکده سن مایۀ گُمانیمدون
بِلیمده قوّه میدون دلده کی توانیمیدون
نقدر سن واریدون اهلبیت راحتیدی
حرملرین داخی بوندان صورا قیامتیدی
یاتان زماندا ابوالفضل جفائلن عَلمون
اسیرلیق غمی دولدوری قلبنی حَرمون
سنون دوشنده قولون گلدیم آه و فریاده
الیم کَسیلماقنا مَنده اولدوم آماده
بو گونده حقّنی قارداش لیقون ادا ایلدون
فدا اولوم سنه من جانوی فدا ایلدون
وصیّتون وار اگر ایله مهربان قارداش
اورکده ساخلاما درد دلون نهان قارداش
دالونجا گَلملیم گر چه بو یولی منده
دگول منه داخی سنسیز حیات زیبنده
گلوب تکلّمه عبّاس آه و زاریلن
حسینه عرض ایلیوب چشم اشگباریلن
واریمدی بیر نچه عرضیم بیانی لازم دور
بیان راز بو فرقت زمانی لازمدور
ازل جمالوی چوخ مایلم گورم قارداش
گوزوم یوزونده سعادتدی جانویرم قارداش
ندیم که چاره یولی ایمدی باغلدور یوزومه
گورنمرم یوزووی قان دولوب ایکی گوزومه
بو آیرلیق گونی بو باره دن غمیم چوخدور
سیلنمورم گوزومون قاننی الیم یوخدور
دُنوب بو حسرتیلن قانلی گوز یاشیم سیله
سن اوز الونله گوزومدن بو قانی پاک ایله
باخوم جمالوه جان بذل ایدوم من آسوده
نه خوشدی قارداشی قارداش یتورسه مقصوده
آپارما خیمیه بیرده منی ملالیم وار
سکینه دن سو خصوصینده انفعالیم وار
سو وعده سی ایلمشدیم مه مدینوه من
خیامه گیتسم اگر نه دیوم سکینوه من
بو قانلی مشگی آپار ویر سکینیه گورسون
حرارت عطشین مشگیمیله سوندورسون
بو مشگی گورسه بولر من قصور ایتمه میشم
خجالتیم واریمیش که خیامه گیتمه میشم
علاوه برده بو نکته گیچور خیالیمدن
کمال معذرتیم وار بو عرض حالیمدن
منیم یخلماقمی چوخلاری هله بولمور
هله جسارت ایدوب اُستوه گَله بولمور
یارالی نعشیمی گر خیمه گاهه حمل ایتسن
گوروب جنازه می جرئت تاپار سنه دشمن
وفالی قارداشا باخ گور نه نوعی خدمت ایدور
اُلوم زمانیده قارداشنا حمایت ایدور
او نچه کلمه سوزونده مرامین آندیردی
حسینی تک یولا سالدی خیامه یاندیردی
یارالی قارداشین اوز مقتلینده قویدی امام
دوروب ایاقه گوزی یاشلی ایتدی عزم خیام
سکینه دورموشودی خیمه لر قباقینده
عموییله بابا فکرینده سو سراقنده
گوروب باباسی گلور هر قدمده داده گلور
عموسی گلموری یالقوز گلور پیاده گلور
دیزینده قوّه سی یوخدور یواش یواش گلوری
گهی گلور دایانور گاهی گوز یاشین سیلوری
یِریدی کَسدی باباسی قباقین اول گُل یاس
سؤال قیلدی بابا بس هانی عموم عبّاس
سو وعده سی ایلمشدی منه او تشنه جگر
اوزی سو ایچدی یادندان منی چخاتدی مگر
جواب ویردی قیزیم کشف قیلما سو آدینی
منیم یانمدا گَتورمه داخی عمو آدینی
سنون عمون او وفاده دگولدی دنیاده
اوزی گِیده سو ایچه سالمیا سنی یاده
اُلونجه اشگیله دولدور بو چشم پُر نَمُوی
یولونی گوزلمه اُلدوردولر رشید عموی
هامی کنیز و حرم تا ایشیتدی بو خبری
تمام چولقادی شیون صداسی خیمه لری
حرمسرای امامتده ایله وحشت اولوب
قارشدی بیر بیره اهل حرم قیامت اولوب
گلوب امام اوزوده وارد اولدی خیمه سینه
یغوب حَرملری خُرد و کُبار دوره سینه
بیوردی اوخشیون عبّاسی بیرجه شیونیلن
صدا صدایه ویرون سیزده آغلیون منیلن
آناسی یوخدی یانندا اورکده نسگلی وار
بر اوخشاسین آنا تک هر کیمون آنا دلی وار
بو گون منیمده مصیبت له خاطریم دولودی
اوزومده آغلارام البتّه بو وفا یولودی
همیشه غملی زمانیمده یار و یولداشیدی
اولوم وفاسنه قربان وفالی قارداشیدی
بو گون وفاسنی عالملره نشان ویردی
سو ایچمدی سو کنارینده تشنه جان ویردی
اَلی اَلیمدن اوزولدی بِلیمده قالدی اَلیم
اُلونجه وار یری قارداش دیوم فغانه گَلیم
نه دل دوتور دانیشام نه گیدم بِلیم گَلوری
منیم بو حالتمی قارداشی اُلن بولوری
نظرده جلوه لنور قامت دل آراسی
اوزون قولی قَدِ موزونی شکل زیباسی
برابریمده دوران حالتی مجسّم اولور
محبّتیم گلوری جوشه اوزگه عالم اولور
ایشیق گونوز گوزومه تار اولوبدی شام کیمی
مصیبتی منی اودلاندیروب آتام کیمی
گرک دِیَم که صلابتده حیدریم قارداش
آتام نشانی شجاعتلی یاوریم قارداش
(شهاب) اگر چه یازار خامه سوز سوزی گَتورر
سنون دگول سوزی سوز صاحبی اوزی گَتورر
ترحّم ایلمسه اوزلری یقین اولماز
کلام اوز اوزونه بیله دلنشین اولماز
بو جزئی خدمت علمدار اوچون هدر گِتمز
شه آستانیدی خُدّامی نا امید ایتمز
نصیب اولا او نظرده اولانلاریله تمام
دوروب ملول ایده سوز غملی روضه سنده سلام
- جمعه
- 5
- شهریور
- 1400
- ساعت
- 11:44
- نوشته شده توسط
- یوسف اکبری
ارسال دیدگاه