دوشدی خیالیمه گینه بر بزم غمفزا
شرم ایلورم او بزمین ایدم شرحنی ادا
سال یادیوه او وقتی یزید ستم شعار
بر بزم عیش و نوش ایدوب چیده برملا
کُرسیلر اوسته روم و فرنگ ایلچیسی تمام
امر ایلدی حضوره گَله آل قُل کَفی
امر یزید دونیله باغلاندی قولقولا
آل رسولی حاضر ایدوبلر او بزمه تا
تخت اوسته اَگلشوب اوزی کبر و غروریله
بسکه هوای سلطنت ایتمشدی بد هوا
امر ایتدی ساقیلر گتوره باده مجلسه
هم مجلس اهل هم اوزی مست شراب اولا
مست اولدی اول لعین چخوب هوشی باشدن
آچدی زبان نحسنی اول شوم بیحیا
ایتدی نظر حسین باشنا ایلدی خطاب
آلدیم قصاصیمی گجه من قویمادیم قالا
آچ بر او قانلو گوزلریوی باخ سکینه وه
ساخلاتمشام قباقدا نجه گور برهنه پا
اُلدورموشم شبیه پیمبر جوانوی
لیلا باخور اوقانلو باشا چوخ یانا یانا
پوزدوم تفاقوی ولی ال چکرم حسین
وُرّام آقاج بو لبلره زینب باخا باخا
عباسیون هاردادور یتشه دادیوه سنون
گورسون وُراندا باشوی اول معدن وفا
اول دیدیم سنه منه گل بیعت ایتگیلن
سن ایتمدون قبول ایا سبط مصطفی
دورموش قباقدا گورنه حقیرانه زینبون
هردم باخور بو باشوه سویلور که وا اَخا
دوشدون بو فکره سن قویاسان تاج سلطنت
فکرون خطا گیدوب ایلدون اوز اوزون فنا
اما هزار حیف حسین تیز قوجالموسان
قاندان بو آق محاسنوه یاخموسان حنا
باخ بر علیل اوغلوا زنجیره بسته دور
دورموش قباقدا بویننی زنجیر ایدوب یارا
قرخ منزلی ایاقلاری باغلی گتورمشم
غول تک برابریمده دوروب زار و بینوا
بر سوز گلور خیالیمه گر فاش ایدم اونی
جنتده وار یری که آنان ساچلارین یولا
فکریم بودور که فاطمه نی من ویرم کنیز
تا زینبون دوباره یانان قلبی اودنا
بو فکر خامیدی ولی آگاهیدی اوزی
اولماز کنیز معدن ناموس کبریا
مقصوده نایل اولمادی اول زاده رنا
آچدی دوباره سرزنشه دل او بیحیا
سویلوب حسین بو باشون الیمده بو خیزران
ورسام نقدر کیمسّه ایدنمز منی اِبا
بر ظلم ایلدی که دل عاجزدی شرحنه
مقتلده وار همین خبره طرُفه مبتدا
جلاد هاردادی دیدی بیماری الدوره
قطع ایلیم بونسلی گرک قویمیام قالا
اویناتدی خیزران آقاجین الده قوزیوب
وردی اوقدر تا بویانوب خیزران قانا
دوردی ایاقه اصغر آناسی او وقتده
سسلندی ورما سن اوباشی ایله برحیا
فوراً اوزین یتوردی او ناموس معدن
گوتدی او باشی اپدی خانم باسدی باغرینا
ال چکمدی معاویه اوغلی عنادیدن
چوخ ظلملر او باشه ایدوب دشمن خدا
برده بروزه ویردی او ظالم شقاوتین
عذر ایسترم ایدم بو سوزین شرحنی ادا
دُخت علی او حینده گَلدی تکلّمه
ورما دیدی او باشی حَرَملر ایدر نوا
باخ بر خدایه ایله حیا ای شقی اوتان
شل اولسون اللرین ایلمه بو قدر جفا
سن خیزران وراندا اوسولموش دوداقلّارا
اطفال بویلانوب باخار اول نازنین باشا
آخر ندور جزاده جوابون پیمبره
ایتسه سئوال سندن اگر موقف جزا
آیا نه ایلمشدی حسین ابن فاطمه
ایتدون شهید او شاهی ذبیحا ًِمن القفا
غیظه گلوب یزید دونوب باخدی زینبه
بر سوز دیدی که شرحنی من ایتمرم اَدا
زینب ایشتدی اول سوزی دوندی دیدی یزید
قطع ایلسون خدا دلون ای زاده زنا
شاهلار اسیرله بیله رفتار ایلمز
سبّ ایلماق اسیری دَگُل شاهلارا سزا
بزم یزیدی یازما (شهابا) بس ایتگیلن
اجرون ویرر جزاده سنون خالق علا
- جمعه
- 5
- شهریور
- 1400
- ساعت
- 12:7
- نوشته شده توسط
- یوسف اکبری
ارسال دیدگاه