یتیشدی قتلگاهه دختر شیر خدا زینب
باشیندا اللری، دلده صدای وا اخا زینب
بسان زاده عمران یتوب طور حقیقتده
دلینده کلمه ارنی، دایاندی حال حیرت ده
تجلای جمال حق اولوب ظاهر او حالتده
ایدوب لن کلمه سین تفسیر، او دارای ولا زینب
گوروب اول وادی عشقی، ایله پرشور و غوغادور
قورولموش عرصه محشر، او چولده حشر برپادور
ولی حشره قیاس اولماز، او صغرادور بو کبرادور
اولوب مستغرق حیرت، او بانوی وفا زینب
دوروب ازل قدمده، حربگاهه بیر نظر سالدی
اونی بیرجه خدا بولدی خانم نه حالته قالدی
حسینی گورمدی اما، اوزاقدان عطرینی آلدی
گولون عطرین آلان بلبل کیمی ایتدی نوا زینب
گوزونده خون دل، دلده نوا، باشدا حسین شوری
او شور عشق، سرگردان دولاندیردی او رنجوری
نقدری گزدی صحرانی اله گلموبدی منظوری
قالوب حیرتده بولمزدی خدا گیتسون هارا زینب
محبت جذبه سی آخر او حیرتدن امان ویردی
او حیرت مرده سین احیا ایدوب، بیر تازه جان ویردی
حسینون مصرعین اوز دلده کی عشقی نشان ویردی
ایتیرمیشدی اوزون، تاپدی گوزل بیر رهنما زینب
گمانی گیتدیقی سمته چکوب دلدن فغان گیتدی
گوتوردوقجا قدم گوز یاشنی ایتدی روان گیتدی
یتنده بیر یره دیز تتردی، تاب و توان گیتدی
دیزینده اولمادی قوت، گوتورسون بیرده پا زینب
باخاندا بیر چوخور یرده یارالی بیر بدن گوردی
او پیکرده نه ال سالم، نه باش نه پیرهن گوردی
قلج اوخ نیزه داش خنجر، ووروب هر بیر یتن گوردی
بولوب قارداشیدی دلدن دئدی واحسرتا زینب
اوتوردی اوخلاری چکدی کناره بیر به بیر آتدی
توکوب خون جگر گوزدن، حسینون قانینه قاتدی
بویادی قانیله زلفین، نه بیر تک اللری باتدی
آغارمشدی باشی گویا، یاخوب قاندان حنا زینب
قلج اوخ پاره سین ازل، کنار ایتدی او دل خسته
آپاردی اللرین نعشین، قوجاقه آلدی آهسته
یخلمشدی اوزی قویلی، چوووردی آرخاسی اوسته
اوتوردی باشلادی نوحه، قوروب بزم عزا زینب
یاخاردی چشمه اشگین یوزه پیوسته باغلاردی
ایله لحن حجازیلن خانم اوخشاردی آغلاردی
آخاردی آتلارین اشگی، دل اعدانی داغلاردی
گلوردی نالیه دشمن، دئنده وا اخا زینب
او مظلومه خانم دلدن دوشوب، اولموشدی بی طاقت
دئدی آخر وداعنده حسینیم ایتدی بیر رافت
قویوب ال سینمه، ویردی بو خسته قلبیمه قوت
بو فکره دوشدی بیرده ایلسون درده دوا زینب
اله قارداش الین آلدی، که قویسون سینیه بیرده
گوروب ال یوخ، بلک قانلی، گلوب فریاده بی پرده
اولیدی ساربانی شل، گتوردی زینبی درده
ووروب باشه دئدی قارداش، ئولیدی بی نوا زینب
گر چه پیکرونده تیغ و خنجر یاره سی چوخدی
نقدری جستجو ایتسم، منه بیر بوسه گه یوخدی
منه مشگل اولان قلبونده کی اوچ شعبه لی اوخدی
ئولنجه حقی وار یاده سالوب قارداش یانا زینب
(شهاب) ایستر اوپه قبرون، ولاکن اولموری قسمت
نولور بیر ایل احبانی منی، سن ایلسن دعوت
آدیم نوکر اوزوم اما خانم پابوسوه حسرت
خانملار نوکرین آیا بئله گوزلله یا زینب؟.
- جمعه
- 5
- شهریور
- 1400
- ساعت
- 12:11
- نوشته شده توسط
- یوسف اکبری
ارسال دیدگاه