آنا زیارتنون شوقی زینبی گتوروب
بقیعه یوز چووروب تا گلوب اوزین یتوروب
ازل سلامیله ویردی اجازه گوز یاشنا
دوروب دولاندی شتابیله قبرینون باشنا
دوشندی حسرتیله روضه مطهرینه
بلالی باشنی آچدی ال آتدی زلفلرینه
گلوب تموجه بحر محبت ایلدی جوش
لقای وصلی دوتوب قالدی بیر زمان مدهوش
اورک دویونمه سی قویموب قالا او حالتیلن
آیتدی زینبی گتدی مقاله رقتیلن
دئدی آنا گوزون آچ ، ختم اولوب زمان فراق
دوباره محضریوه گلمشم گوزوندن ایراق
قدیم خمیده لنوب ، قاره ساچلاریم آغاروب
گوزوم دوشوبدی ایشقدان ، بو گل یوزوم سارالوب
بو مشهور بیتی رحمتلیخ مرحوم آصف ، مدینه احوالاتیندا بویوروب ، خانم زینب(س) آناسینین قبرینده عرض ایلیر:
یتنده غم منه هر یرده گزلین آغلامشام
اوجادان آغلاماقی من بو قبره ساخلامیشام
او زینبم که منی عزتیله بسلردون
یاتان زماندا گلوب رافتیله سسلردون
آچوب گوزیمی باخاردیم سنه گینه بیر آز
یاتوب اویانمازدیم کیم سنه ایدردیم ناز
نه نوعی عرض ایلیم هانسی غمی گورممیشم
بو قدر وار آناجان ، ساقدی جانیم ئولممیشم
نجه بیانه چکوم ، چکدیقیم جفا چوخدور
دینمورم هاموسین چونکه طاقتیم یوخدور
ایلیم قبیلم الیمدن گیدوب ، ایویم یخلوب
گوزوم باخا باخا بیر بیر کمک لریم قریلوب
قاریشدی کرب و بلاده گوزوم یاشی قانه
یتشدی هر نه که غم وار بو بیر قوری جانه
او یرده من ایکی نورس جوانیدن گچدیم
الیمله یتمیش ایکی قامته کفن بچدیم
یاناندا خیمه لریم منده چوخ باخوب یاندیم
علی الخصوص گوروب بیر یتیمی اودلاندیم
دوتوب اتکلری اود ساق صولا باخور دولانور
گهی قاچور یخلور سس چکور دورور دایانور
منی باغشلا آنا چونکه غفلت ایلمشم
گلنده شام غریبانه من گورنممشیم
بو قدر ظلمیله اعدا یتشمیوب کامه
که عاقبت آناجان یولادی بیزی شامه
باخاندا نیزه ده من قارداشیم حسین باشنا
دونردی قانه سرشگیم آخاردی اوز باشنا
سنق کجاوه اوزوم خسته ، قولاریمدا طناب
گون ایسی سی یول اوزاق آج سوسوز اورک بی تاب
گورنده آغلامیشام قاداشیم اوشاقلارینی
که گورسه دوردیله هر دم قابار ایاقلارینی
بیری دیر قولومی ایپ کسوب آچان یوخدور
بیری دیر ئولورم هیچ منه باخان یوخدور
بیری دوشوب دوه اوستن یره منی چاغرور
بیری دیردی امان عمه جان باشیم آغرور
بو حالی شمر گوروب باخمازیدی گوز یاشما
گینه ویراردی عداوتله قمچیلر باشما
دوتوبدی شور سنی (آصفا) یازوب خامه
بو شام وقتی سوز آچدون مدینه دن شامه
- جمعه
- 5
- شهریور
- 1400
- ساعت
- 23:12
- نوشته شده توسط
- یوسف اکبری
- شاعر:
-
مرحوم آصف تبریزی
ارسال دیدگاه