به امر سید سجاد ، اهل بیت ملول
ایدوب حوالی یثربده بیر مقامه نزول
بویوردی تا ایده لر مجلس عزا برپا
او سرزمینده اولا تازه ماتم شهدا
او دم قورولدی سراپرده امام حسین
آچلدی ماتم ایچون چتر احترام حسین ع
گیدوب او خیمه پر شوره زینب نالان
بتول وارثی ام المصائب دوران
گتوردی ناله سی روح بتولی فریاده
بهشت عدنده اولدی فغانه آماده
بویوردی حاضر ایدون کربلا نشانه لرین
نظامیلن دوشیون آغلاماق بهانه لرین
یتوردی زینتینی مجلسده اتمامه
که قویدی صدریده بیر قانه باتمش عمامه
مرتب اولدی او یرده اساس ماتم و غم
گلوبله شیونه یکسر مخدرات حرم
ئولنلری هامی اوخشاردیلار به ناله و آه
نگوردوله که گلور پیشوازه عبدالله
یتوب کنارینه تا چادرون او کان ادب
ویروب سلام یویوردی هانی خانم زینب؟
ایشتدی تا بو سوزی زینبون قاچوب رنگی
مبدل اولدی بیر اوزگه هوایه آهنگی
او آغ ساچینه قرا معجرینه بیر باخدی
کمان قدینه دونوب باخدی گوز یاشی آخدی
بویوردی باجسینا اول بلاکش مظلوم
عم اوغلوموندی بو سس ، چاره قیل باجی کلثوم
منی بو حالتیله غفلتا اگر گورسون
مباد شدت غمدن اوزونی ئولدورسون
بو قاره معجری بو آغ ساچی ، بو قد کمان
اوزون قباقجه گیدوب بیر دلیله ایله بیان
اگر چه وحشتی چوخدور یواش یواش ایله رام
سنه باخوب منی گورسه بیر آز دوتار آرام
چیخوب قباقینه کلثوم با ملال و الم
ویروب جواب بویوردی سلام یابن العم
باخوب او غم زدیه چکدی قلبیدن بیر آه
گلوب کلامه بویوردی دوباره عبدالله
دئ بیر منه گوروم ای بانوی دیار تعب
هانی عراقه گیدن فاطمه قیزی زینب؟
ندندی من دیدیقیم گلمدی او کان وفا
بویور صریحنی یوخسا ئولوب او کان حیا
گجه گوندوز ایدرم ناله اشتیاقیندان
گوزتلورم گله بیرجه اوپم ایاقیندان
دئدی که صاقدی ولی آدی واردی بی جاندور
مدینه ده گورسن ایمدی چوخ پریشاندور
قبول قیل سوزومی دادیوه علی یتسون
یوخومدی تاب اگر صاقدی بیر گوروم گیتسون
قیتدی خیمیه کلثوم اشکبار و ملول
بویوردی زینبه ای دختر عزیز بتول
اگر چه ایمدی رضا ویرموسن سنی گورسون
ولی نه چاره عم اوغلون دیور اوزی گلسون
ایشتدی تا بو سوزی تازه دن اولوب بی تاب
کسلدی چاره سی آغلار گوزیله ویردی جواب
یانیمجا گل باجی کلثوم محنتیم چوخدی
دانشدیراندا منی ، سن دانش دلیم یوخدی
قرالیام نه دیوم من او زار شوهریمه
گیداخ یانیمجا باجی سن دانش منیم یریمه
هزار شرم و حیائیله زینب پر غم
چیخوب قباقه بویوردی سلام یابن العم
جواب ویردی علیک السلام، سن کیمسن؟
ندندی گلمدی زینب اولوم فدا اونا من
دئدی کناریده گزمه یاخوندی چون مطلب
گوتور حجابی یوزوندن یانوندادور زینب
دوشوبدی گوگلومه شرمنده لیق اودی یانورام
تانیمسان منی ، من بینوا سنی تانورام
تانمیسان منی بولمه فلک بیله دولانور
من ستم زده نی آغلیاندا شمر تانور
عمون علی قیزیام ، چوخدا ایلمه تکرار
منی بو حالیله چون گورمیوبسن عذرون وار
دئدی یقین که قالور دوست دوست یادینده
بو حال اوخونموری چون زلفوین سوادینده
عزیز فاطمه حیدر کیمی گلور نفسون
من آختارانسان اگر دوتقون اولمییدی سسون
هانی او چهره گلرنگ و عارض گلنار
هانی او طره شبرنگ و زلف عنبر بار؟
اولوبدی گل یوزون افسرده ایتمیسن ناله
مگر نولوبدی سنه ؟ قالموسان بو احواله
باشین سالوب اشاقه زینب حمیده صفت
جوانلارین طرفندن چکردی چون خجلت
دئدی عم اوغلی دیمه راه و رسمدن دورم
ایکی جوانون ئولوب منده خیلی معذورم
دئدی تکلم ایله ای نجیبه دوران
که باغریمی ایلیوب هجر محنتی القان
دئدی ندن گوزیوین نوری بو قدر آزالوب
دئدی گوزوم ایشقین آغلاماق الیمدن آلوب
دئدی ندندی اولوب گوزلرون بیله گریان؟
دئدی شهید اولوب قارداشیم حسین عطشان..
- جمعه
- 5
- شهریور
- 1400
- ساعت
- 23:14
- نوشته شده توسط
- یوسف اکبری
ارسال دیدگاه