من حسینم جانیمی جانانه قربان ائیله رَم
خالصانه عشقیمه، عشاقی حیران ائیله رَم
کربلادن عالم امکاندا طوفان ائیله رَم
بیر گون عاشورانی کلّ ِ دهره سلطان ائیله رَم
هر تیکانلیق قلبی گلزار و گلستان ائیله رَم
من حسینم حشره جان تاریخیده پاینده یم
آسمان عشقیده بیر کوکب تابنده یَم
اؤلموشم اللّه یولوندا، زنده لردن زنده یَم
هم گذشته هم ابد هم حال و هم آینده یَم
طرفه العینیله هر آن طّی ِ دوران ائیله رم
دین حقدن سرفرازانه حمایت ائیله رم
حق طلب انسانی هر یئرده حمایت ائیله رم
سهل دیر دنیا، قیامت ده قیامت ائیله رم
واردی اذنیم هر گنهکاری شفاعت ائیله رم
هر ایکی عالمده انسانلاره احسان ائیله رم
من حسینم اولیا و انبیانین اوغلویام
جدّیم اول خیرالبشردیر مصطفانین اوغلویام
فاتح خیبر آتامدیر مرتضانین اوغلویام
حضرت زهرا(س) آنام خیرالنّسانین اوغلویام
خامس آل کسایم خلقه اعلان ائله رم
من حسینم چون یقینیم واردی وحدانیّته.
ائتمه رم بیعت یزید ضد انسانیّته.
گئتسه باشیم وئرمه رم اَل کان حیوانیّته.
ائتمیشم بو نهضتی برپا بیر عالی نیّته.
عاقبت آلوده دنیانی گولوستان ائیله رم.
نهضتیم قویماز کی کفر وکینه آلسین عالمی.
اولدورنمَز جاهل آخیرده امام اعلمی.
عاقبت برپا اولار حق و عدالت پرچمی.
منتقم مهدی(ع) گَلَر ائیلر قیام اعظمی.
کربلا دن نهضت مهدینی بنیان ائله رم.
کربلا عرش معلّا ذوالجناح اولموش براق.
عترتی قان آغلادیب آخیر وداعیمده فراق.
حق یولوندا ایسلانیب صحراده چوخ توزلی یاناق.
قوی سوسوزدان پارچالانسین ایستی دن یانسین دوداق.
بو لب عطشانه هر دریانی عطشان ائیله رم.
من حسینم مدعی درک ائیله مز احساسیمی.
دوتماز عالمده منیم دنیا طلب لر یاسیمی.
حق طلب عارف بولر وئردیم نه اوسته قاسمی.
یا نه دن نهر اوسته قولسوز ییخدیلار عباسیمی.
حشره جن ایمانی ثابت کفری بطلان ائیله رم.
من حسینم حقه خاطر یاوریمدن گئچمیشم.
سویلویوب اللّهُ اکبر اکبریم ن گئچمیشم.
بیر اوزون قول سرو قد سر لشکریمدن گئچمیشم.
آلتی آیلیق شیرخواره اصغریمدن گئچمیشم.
اصغرین قانیله من آفاقی الوان ائیله رم.
من حسینم سربه سر حقّ و حقیقتدی سوزوم.
گورمَز اللّهین یولوندا ما سوی اللّهی گوزوم.
هر بلایه واردی بو صدپاره قلبیمده دوزوم.
زینبه باخماقه یارب یوخ منیم اما اوزوم.
آغلارام احوالینه افلاکی گریان ائیله رم
کربلاده اوز امامین کوفیان دشمن سانیب.
هم سینیب قلبیم الهی هم فراق ایچره یانیب.
بو اوغلسوز سینه سی دوت مین اوخیلا اوخلانیب.
سینه م ایچره قلبیم اللّه پاره-پاره دوغرانیب.
دوغرانان قلبیله کاخ ظلمی ویران ائیله رم.
قوی اوزوم اوسته دوشوم دالدان کسیلسین حنجریم.
چاپسین آتلار قوی داغیلسین پاره-پاره پیکریم.
گئتسین اَلدن ظلمولن بارماقیله انگشتریم.
قوی جیداده ائیله سین قرآن تلاوت لب لریم.
نیزه باشینده گینه تبلیغ قرآن ائیله رم.
چوخ بویوکدور بو رقیّه م باخمئیین آز یاشینه.
گر چه باخماز اول شقی، شمر دنی گوز یاشینه.
ویرسا سیلی صورتیندن چالسا قمچی باشینه.
حق یولوندا بیر بئله صبر و دوزوم پاداشینه.
هر مریضه ایسته سه عالمده درمان ائیله رم.
زینبین گر قمچی لردن اولماسا یول-یول قولی.
حشره جَن پاینده قالماز دین اسلامین یولی.
قیزلارین باغلانماسا کسگین طنابیله قولی.
قلب لر اولماز داخی مهر و عطوفت دن دولی.
دین اسلامی #عزیز ِ کل ادیان ائیله رم.
- شنبه
- 6
- شهریور
- 1400
- ساعت
- 23:23
- نوشته شده توسط
- یوسف اکبری
- شاعر:
-
کربلایی عزیز خانشی
ارسال دیدگاه