گرک اهل ولا عمرینجه عالمده بلا گورسون
سوور خالق ولا اهلین بلایه مبتلا گورسون
محبت اهلی بیگانه گرکدور عیش دنیادن
اوزین اهل ولا ، لازمدی درده آشنا گورسون
جلال و عزتندن ال گوتورسون راه جاناندا
بقای جاودانی درک ایدوب ، عمرین فنا گورسون
رموزات محبتده نکات عشقده دارا
اولا هر کیمسه شایق ، کاملاً اهل وفا گورسون
بصیرت دیده سین آچسین بلا صحراسینه باخسون
مقام عشقده دارا اولان اهل ولا گورسون
غلطدور سالک راه حقیقت ، ذکر ایدم آدین
باخوب عشاق عالم راه عشقه رهنما گورسون
آدی ام المصائب ، مخزن غم ، حضرت زینب
اونون تک کیمدی اثبات محبتده جفا گورسون
گورون وار بیر باجی ، قارداش یولوندا دار دنیاده
نقدری محنت و غم یوز ویره نفسین رضا گورسون
هامی غم بیر یانا غارتده اما اوزگه بیر غم وار
نجه شمرین النده معجرین کان حیا گورسون
سوروشدوم بیر نفر عالمدن اوضاع قیامتدن
اشاره ویردی غارتدن ، گوز ایستر برملا گورسون
دیمه غارت قیامتدن علامتدور ، نه سوزدور بو؟
او صغری دور بو کبری ، باخان وار مطلقا گورسون
عیال مصطفایه مین قیامت اولدی غارتده
مسلط اهل علم ایستر ، خبرده مبتدا گورسون
النده تازیانه آلدی لشگر زینب اطرافین
خبر ویر ای صبا گلسون قیزین خیرالنساء گورسون
یوزی اوسته دوشوب غش ایلدی زینب او حالتده
بو اوضاعی گلوب ایکاش ختم انبیا گورسون
سکینه گوردی بو حالی ، پوزولدی حالی بی طاقت
دئدی بو حالی یارب هاردادور شیر خدا گورسون
باخوبدور اهل بیت عصمته سسلندی یا اختا
روادور بیر نفر عورت بیله بیر ابتلا گورسون؟
رقیه دور ایاقه عمه مین سال باشنا قاره
مبادا عصمت کبری جمالین اشقیا گورسون
دوگولر عمه می ، آز قالدی ئولدورسونله کافرلر
دئن یوخ اهل شام و کوفه آز ظلمی روا گورسون
تاپولمور بیر نفر شمرین الیندن عمه می آلسون
نجه بو خفتی بولمم عیال هل اتی گورسون
گویردی قولاری ، چگنی ، یارالاردان آخار قانی
هانی بیر رحم ایدن ؟ دورسون تدارک بیر دوا گورسون
آغارمیش زلفینی اوز باشنون قانی خضاب ایتدی
یاخوندور سرپرستین غرق خون ، آل عبا گورسون
ئولنجه بو یارالار وای منه مرهم قبول ایتمز
خبر ویر باجیسین گلسون عموم صاحب لوا گورسون
دیسم زیبنده دور سس گلدی درگاه جلالتدن
مقدردور حبیبم بیله غملی ماجرا گورسون
چکون اما ابوالفضلین یارالی نعشنه پرده
مبادا شمر النده باجیسین بی اقربا گورسون
الی یوخدور دوروب شمرین الندن زینبی آلسون
او غیرت کانی مشگلدور بو حالی برملا گورسون
به حق عصمت زینب اوزون لطف ایله معبودا
(حسینی) بو مرضدن بیرده عالمده شفا گورسون
اورکده حسرتی واردور ازل گیتسون خراسانه
اجل درک ایتممیش بیرده مقامین کربلا گورسون
- شنبه
- 6
- شهریور
- 1400
- ساعت
- 23:32
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه