ایتدی اثر چو زینبه تاثیرِ آفتاب
یوز دوتدی آفتابه او خاتون ایدوب خطاب
ای گون بوگون نه گوندی که آرتوب حرارتون؟
بنزر قیامتون گونونه هر علامتون
اوز حرکتونده ایلموسن حدّ اِنکساح
گوررم جدا بویی بیزیله وار مسافتون
غمدن دوتولموسان ؟ ایلیوبسن و یا کسوف
مخسوف ماه تک قیزاروب رنگِ صورتون
حالوندا آشکاریدی آثارِ روزِ حشر
یوخسا بو گون سنونده قوپوبدور قیامتون
کوکب کیمی یوزه توکوسن گوزدن اشکِ تر
موجه گلوب فرات کیمی اشکِ حسرتون
هر بیر دمیله یاندیروسان خلقِ عالمی
گرمیّته دمادم اولور سعی سرعتون
ای گون بو گون زواله یتوبدور منیم گونوم
بولمم سنون ندندی پریشاندی حالتون
ای گون قوجاقلیوبسان حسینی بو حالیله
یوخسا واروندی دلده خیال زیارتون
کرب و بلا دیارینه بیرده نظاره قیل
ای گون مگر آچوخ دگو چشم بصیرتون؟
توپراقلار اوستونه یخیلوب شاهِ مشرقین
عریان قالوبدی پیکری شمسِ امامتون
آغوشه آلموسان یارالی قانلی نعشینی
یوخسا سنونده واردی حسینه محبّتون
آهسته دوش یاراسینا ای گون ترحّم ایت
بولمم سنون نقدر واروندور جسارتون
نه دفن ایدن تاپولدی ، کفن ممکن اولمادی
سن اول کفن حسینه ، گر اولسا لیاقتون
ای گون حسین حالینه دقّتله قیل نظر
آخر قیامتون گونی اولسون شهادتون
اهلِ جفا حسینیمی اولدوردی تشنه لب
ساخلا یادوندا ظلمونی اهلِ شقاوتون
ای گون اماندی دوشمه علمدار نعشینه
گیچسون اهل بیته بو یرده حمایتون
ایلوبله قوللارینی قلم چوخدی یاره سی
باشین سوسوز کسوبله او کانِ شجاعتون
گَل دوشمه نعشِ اکبره گلدن لطیفیدور
گر چه سنون گلیله واروندور رفاقتون
بو گُل او گل دگول آچیلار لاله زاریده
بو گلعذار ، بلبلیدی باغ جنتون
قاسم اولوبدی آتلار ایاقیندا پایمال
دوشرسن یارالی سینه سینه وار مذمّتون
گویلوم دولوبدی دردیله ای گون گلوب دیله
بو نیسگلی دیسم سنه آرتار مصیبتون
(خازن) ویروبدی دم سنه بیر عندلیبِ غم
اولموش اودور فصیح بو نوعی بلاغتون
- یکشنبه
- 7
- شهریور
- 1400
- ساعت
- 13:18
- نوشته شده توسط
- یوسف اکبری
ارسال دیدگاه