حلق اصغردن اوپن اوچ شعبه پیکان آغلادی
عرش و فرش و لوح و کرسی حیّ ِ سبحان آغلادی
بیر کسه درد دلین ابراز قیلسون یوخ دلی
اصغرین عطشان بوغازین اوپدی آچسون اوخ دلی
آچمادی دل زخمدار ایتدی ولیکن چوخ دلی
اوپجاق اوخ اوّلده اصغر گولدی اوندان آغلادی
یتدی حا میمین قیروب اوچ شعبه پیکان رشته سین
محکماتین ایلدی مستحکم اما مهره سین
پخش ایدوب دنیایه قرآن مجیدین خوشه سین
منزل قرآنی محزون گوردی قرآن آغلادی
من شه نبا العظیمم یوخدی منده کیف و کم
قتلیمه شورا ایدوبسوز بلموسوز من اُلمرم
کل شیئ هالک الّا وجه ربک هو منم
بو ندای زنده نی شمر ایتدی اذعان آغلادی
باغ وصلتدن دروب گل شاد اولوب رب الفلق
محضر جانانه گوندردی او گلدن بی طبق
لطفیوه عرض ایتدی یا رب مستحقم مستحق
بیمناک اولدی بدادن شاه خوبان آغلادی
مست عین و شین و قافم مست وصلم مست یار
اکبره اکبر فدا ویردیم اولام پیوست یار
شهسوارانه اولوبدور اکبریم پابست یار
کوی عشقی سیر ایدوبدور گوی چوگان آغلادی
جزر و مدایلور گوروب اطفالی بحر رنجیده
ماته دوشدی شه پیاده عرصهء شطرنجیده
سرّ کنتُ کنز مخفی گورسنوب شش پنجیده
فیلیدن دوشجاق وزیری، کنز پنهان آغلادی
سینسا جان پیمانه سی سینماز بیلون پیمان عشق
محو اولور روز وصالیله شب هجران عشق
بلبلین گورسه آچار گل، غنچه خندان عشق
غنچهء خندان گل آچدی اولدی خندان آغلادی
عالمه افشا ایدوب (بیضا) ید بیضاسینی
ویردی صیقل شعریله تیز ایتدی طبعین داسینی
ارتحالینده ملک لر دوتدی گویده یاسینی
مجلس ترحیمینه گلدی حریفان آغلادی
- یکشنبه
- 7
- شهریور
- 1400
- ساعت
- 14:23
- نوشته شده توسط
- یوسف اکبری
ارسال دیدگاه