جواد آل پیغمبر اولوب مسموم جان وئردی
حسینین سو دیوب جان وئرماقین عینا نشان وئردی
ز بس غم وئردی یوز چکدی همیشه ناله جانکاه
محاقه مایل اولدی چرخ عزتده اولان بیر ماه
چکوب طول مصائب رشته عمرین ایدوب کوتاه
جوان وقتینده جان اول شهریار انس و جان وئردی
ایرمی بش ایل عمرین ایلیوب اهل خبر مرقوم
بو آز عمریله اولدی اول شه دین لیک چوخ مظلوم
ایدوبلر عاقبت غربت ولایتده اونی مسموم
یانوب دلدن اونا هر لحظه یوز سوز نهان وئردی
خزانه تا بهارین صرصر بیدادی دوندردی
قضا گلچینی باغ عمرینین عشرت گلین دردی
سارالدی گلشن دینین عطشدن نو گل وردی
اونون باده صفاسین آفت باد خزان وئردی
اورکده سوز زهر کین , جمالینده ئولوم گردی
یانوب دلدن یره ئوز سینه سین حسرتله سورتردی
باخاردی صاق صولا گه گه او شاه دین سو ایستردی
دیدیقجا العطش جام جگر بیر کاسه قان وئردی
کنیزی گوردی بو حالی بیر اوزگه حالته قالدی
گیدوب بیر جام سو گتدی امامین گویلونی آلدی
سو جامین آلدی ام الفضل غیظیله یره چالدی
سوسوز ئولماقینه فتوا او بد عهد زمان وئردی
گوزی یولدا چکردی آه , بو عنوان مقتلدی
دیردی ای خدا حسرت اوخی بو سینه می دلدی
نه وار جان اوسته بیر همدم , نه بیر اوغلوم علی گلدی
سسیمه سس ئولن دمده , نه اول شیرین زبان وئردی
اولان ئوز عهدینه عشق عالمینده بند و وابسته
چکردی انتظارین اوغلونون جان اوسته دلخسته
سو جامی الده حاضر اولدی ئوز اوغلی باشی اوسته
آتائیله بالا دل دردینه شرح و بیان وئردی
آتادان گلدی آخر دم اوغول جویای حال اولدی
آتا گوردی جوانین سینه دن زایل ملال اولدی
حسینی جان وئرنده درک ایدن اما هلال اولدی
اورکدن اودلانوب احوالینه نی تک فغان وئردی
گوروب بیر زخمدار آهو کیمی دوشموش او دلخسته
چالور قان ایچره دست و پا , وورالار زخمی زخم اوسته
باخور حسرتله سویلور العطش آهسته آهسته
هلالین قلبینه رقّت بو اندوه گران وئردی
خیال ائتدی ئوزینه حق یولوندا آبرو وئرسین
گل مقصود زهرایه او چولده رنگ و بو وئرسین
او یالقیز بی کس و لب تشنیه جان اوسته سو وئرسین
نشان ئوز همتین گزلین مرام اوسته عیان وئردی
گیدوب سو گتدی سیراب ایلسین اول شاه عطشانی
گلنده گوردی یولدا شمر شوم و نامسلمانی
گوزی یاشلی , الینده قانلی خنجردن آخار قانی
دیدی گیتمه حسینه خنجریم آب روان وئردی
دیدی یوخسا بساط ظلم و کینه قورموسان ظالم
حسینی ئولدوروب زهرا گلین سولدورموسان ظالم
ندن بس اشگویله گوزلرین دولدورموسان ظالم
دوباره دانه اشکین توکوب رخساره سان وئردی
دیدی قان ائتمیشم دوزدور بو چولده قلب زهرانی
بو گون رحم ائتمیوب ئولدورمیشم معنای قرآنی
ولی بو ناله و فریادیمین وار اوزگه عنوانی
دولاندی قانیله دولموش چوخور بیر یر نشان وئردی
باخوب گوردی او یرده بیر اوجا قامت خانم عورت
دوتوبدور خیرداجا بیر قیز الیندن سینه ده حسرت
وورور باشسیز جنازه باشینه دوره او خوش فطرت
دیور قارداش سنون تک هانسی بیر مظلوم جان وئردی
باجون اولسون اورکده قالدی چوخ گزلین سوزون قارداش
دلینده العطش باخدی سویا حسرت گوزون قارداش
آتان ساقی کوثر, تشنه جان وئردون ئوزون قاراش
سنه قان سو یرینه تیغ تیز جانستان وئردی
عزادار حسین (فکری) ائدوب ترغیب اولوب بانی
چکوبدور نظمه (تائب) بو قضایای غم افزانی
نصیب ائت قبرینی یارب دیاق اوردا بو عنوانی
جواد آل پیغمبر اولوب مسموم جان وئردی
- یکشنبه
- 7
- شهریور
- 1400
- ساعت
- 22:54
- نوشته شده توسط
- یوسف اکبری
- شاعر:
-
صادق تائب
ارسال دیدگاه