دور یاتما گلوب شامه گیدن قافله قارداش
هیهات باجون قبریوه بیرده گَله قارداش
مدّتدی منیم واریدی قلبیمده بو حسرت
بو قبرِ شریفون بیر اولییدی منه قسمت.
چوخ شکر ایدورم اولدی حسین یاخشی سعادت
مقصوده یتوب گَلدی مرامیم اَله قارداش
گوردوم بدنون شامه گئدنده من کولباش
عریان یارالی ، آخدی گوزومدن یوزه قان یاش
کیم قبر قازوب کیم کفن ائتدی سنه قارداش؟
کیم قبره قویوب زینبون ای کاش ئوله قارداش؟
هر قدر جفا یتدی دوزوب صبره چالیشدیم
آخیرده شرار ِ غمیله یاندیم آلیشدیم
صبریم کسیلوب کوفه ده محملده دانیشدیم
حقیّتون اثبات ائله دیم باطله قارداش
ظلم آتشینه کوفه ده یاندوخ ایکیمیزده.
بیر گونده همان شهری دولاندوخ ایکیمیزده
باشدان باجون ئولسون یارالاندوخ ایکیمیزده
سن نیزده من ناقه ده گلدوخ دیله قارداش
خولی گتوروب کینه ی دیرینه ظهوره
بیر باش کی او باش مصدریدی آیه ی نوره
شرم ایلمیوب قویدی کول اوستونده تنوره
گوردوم بلشوب قانلی جمالون کوله قارداش
مرجانه نین اوغلی دیل آچاندا من ِ زاره
ایلوردون اوزون حالتیمه اوردا نظاره
گوردون نجه ووردی یارالی قلبیمه یاره
رحم ایتمدی اصلا من ِ خونین دله قارداش
سِیر ایتماقا شاماتی گیچیب نیزیه باشون
ارکانِ سماواتی سالوب لرزیه باشون
برپا ائلدی دِیریده بیر تعزیه باشون
ارواحِ رسل گَلدی همان محفله قارداش
یوللاردا ائدن وقتیده هر بیر چولی مسکن
یغدیم باشما باشسیز عیالون او زمان من
رحلتده گَله قویمادیم اطرافینه دشمن
میندیردیم اوزوم قیزلاریوی محمله قارداش
قول باغلی بیزی چکلدیله دروازهء شامه
دوندی گونوزوم شامه گیرَن وقتیده شامه
اللرده دف و دایره چیخمیشدیلا بامه
بو حال گوروب زینبون ئولموب هله قارداش
قدّیم بوکولوب زولفوم آغاردی بو سفرده
شام اهلی گتوردی ولی چوخ قلبیمی درده
حالی سن اوزون من چکورم مطلبه پرده
وار لیک یزیدین ستمیندن گِله قارداش
بیر مجلسِ عشرت ایلدی شامیده چیده
امر ائتدی نماینده لره گلدیله دیده
قیزلار دیده گریان ، زینبیوون رنگی پریده
انصافیدی باخدوخجا فرنگی گوله قارداش؟
مجلس نجه مجلس نه دیوم شرم ائدورم من
طشت ایچره گوروردون یارالی باشویلن سن
اول مجلس شُربی ائلییوب باده مزّین
حسرتله باخوب عصرون امامی ایله قارداش
ویرانه ده یر ویردی بیزه آل امیّه
گُل تک سارالوب سولدی قیزون نازلی صفیّه
گوردون قوری یرده نجه جان ویردی رقیّه؟
یانّام من ئولونجه ایله بیر نسگله قارداش
جدّون اوزینه یازمیش (حسینی) سنی سرباز
آز یاز ، ولی جهد ایله یازان وقتیده سوز یاز
چوخ سوز یازیلار لیک بونون مثلی یازیلماز
دور یاتما گلوب شامه گیدن قافله قارداش
- یکشنبه
- 7
- شهریور
- 1400
- ساعت
- 23:20
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه