گل حسین جانی چخور مام بلا زینبوین
اِحتضار عالمی دور قلبی یارا زینبوین
قوش کیمی سالدی نفسدن باجوی، دام، غمی
نقطه تک دوره‌لدی زینبی ایّام غمی
کربلانون غمی یا کوفه غمی شام غمی
قامتین ایتدی کمان قدّی رَسا زینبوین
منیدیم شهر پیمبرده خانملار خانمی
چکدی دوران اسارت داماریمدان قانمی
ویرورم قابض الارواحه یورولمش جانمی
شُکر اولا غمدن اولور جانی رها زینبوین
گُلی پَرپَر ایلین صَحن چَمنده دولیدی
تازیانه یری جسممده منیم‌ده دولیدی
گتدیگم یول بُلورم حضرت زهرا یولیدی
قمچیدن جسمی اولوب نیلی نما زینبوین
جام محنت نقدر ویردیلر آلدیم قارداش
چوخ یامان گونلره سَندَن صورا قالدیم قارداش
شرزه بیر شیریدیم افسوس قوجالدیم قارداش
کِچلوبدور سوموگی غرقِ عزا زینبوین
وار یادیمدا ایلدی ابن زیاد حمله منه
هیجان گتدی علی قانی بو یورقون بدنه
گاه ابوالفضلمه باخدیم گهی مجلسده سنه
سسینه ویرمَدوز اَفسوس صدا زینبوین
حَمله‌وَر اولدوم اونا عَزم و ارادمده قوی
دیدیم اگلش یره ای مردک رذل اَموی
اَلووی سال یانووا سن اَموی من عَلوی
باشی قانلیدی هَله آبله پا زینبوین
جان ویرنده گیجه‌لر یا که گونوزلر باجیلار
گتورر دیل دوداقا غصه‌لی سوزلر باجیلار
گوزلری یولدا قالار قارداشی گوزلر باجیلار
گوزلری یولدادی گل بختی قرار زینبوین
اوزوگون قیمتی آرتار نجه زیبا قاشیلان
پیکرین وارلیقی معلوم اولی یا که باشیلان
باجی لاریندا ایله عزّتی وار قارداشیلان
قارداشی یوخدی باشی اوسته اخا زینبوین
یولداشا لازمه دور یاده سالا یولداشنی
کاش گلوب زینبون عرشه یتوریدون باشنی
قبریمون باری یازیدون سن اوزون باش داشنی
قدری آرتوردی غریب ئولکه ده تا زینبوین
سن شهادتله حسین ائتدون عمل پیمانووا
زینبون اولدی اسارتله مدافع قانووا
دردون ئولدوردی منی آند اولا مظلوم جانووا
عشقوه آدینی ثبت ایله فدا زینبوین
شمع تک یاندی وجودیم اریدی اولدی فنا
شُعلَمَه فخر ایلدیم یاندوقجا صبح و مسا
دردی ویردی منه عمروم بوئی طراح بلا
نیلیوم اولمادی قسمتده دوا زینبوین
اورگیم داغلیدی دل داغلیانیم یوخدی حسین
باشیم اوسته باش آچوب آغلیانیم یوخدی حسین
نگران گوزلریمی باغلیانیم یوخدی حسین
یتشوب گور ایشی آخرده هارا زینبوین
آخرین لحظه ده قویدوم لبمی حنجریوه
یوخوما گل دیدیم ای شاه فدا گوزلریوه
گلمدون سن یوخوما من گلورم محضریوه
جان آلان گلسه تاپار روحی صفا زینبوین
شمر نامرد علینون ایوینی ایتدی خراب
آغاران خدیوه اولدی باشوین قانی خضاب
من اوگوندن گیجه گوندوز یاشادیم دیده پر آب
گورمیوبدور آغاران زلفی حنا زینبوین
ئولمدیم کرب و بلاده ایلیم اخذ مُراد
سن یاتان یرده منی دفن ایلیه زین العِباد
حسرت تربت مَعطُوروَم ای پاک نهاد
یازی سیندا یوخومش خاک شفا زینبوین
قبریوه حل ایلین وقتده سجاد سنی
تاپمیوبدور بُلورم شأنووه لایق کفنی
بوریاده قویا ای کاش بالون قبره منی
پیکری پیکریوه اوخشیا تا زینبوین
دیل دیدی بو سوزی اولدی گِنه برهم حالِم
حالوه یوخدی اولان من کیمی قارداش عالِم
من سنه اوخشامارام سن یارالی من سالِم
پیکریندن باشی اولموبدی جدا زینبوین
- دوشنبه
- 8
- شهریور
- 1400
- ساعت
- 22:16
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه