وجود موجدی موجود چشمِ جویایه
عیاندی انفس و آفاق ، کونیده آیه
بصرتیله بو عدلینه ایلینده نظر
جمال شاهدین اولماز نیازی اخفایه
صراحتا اودی قرآندا منزل قرآن
همین بو مطلبه نازل ایدوب نچه آیه
کمالِ مرحمتیله کمالِ توحیده
ارائه راه ایلیوب شاهراهِ پویایه
گورن بو آئینه ده عکسِ جلوهء یاری
سالار تعشّق دل تک ، جمال زیبایه
دیمز مگر اولی ذکری همیشه یا محبوب
ایدر عاشقی ارشاد ، روحی احیایه
همین بو خوانِ محبت عموم ایچون دوشنوب
گلوب رقیمهء دعوت بشر مسمّایه
بونیله بیله که یوخ دعوتنده اِستثنا
گنه چوخ آز یتیشن وار بو فیضِ عظمایه
تاپان موافقِ میزانِ عشق مشهودی
تاپوب مدارجِ عالیّ عشقیده پایه
خلیل اولوب اود ایچینده دلنده یا معبود
اودا مخاطب اولوب ، حقدن سلامایه
و یا اولوب ذکریّا دلنده یا محبوب
یتوب او موهبتِ بی بدیل ، یحیایه
مراسمِ ادبیله کلام ایجازی
باخ اَنبیای طریق ولایه پیمایه
فقط مراتبِ اعلای عشقِ اعلاده
یتوب پیمبرِ اکرم ، مقامِ والایه
او قدر مرتبهء عشقینه ویروب ترفیع
که مایل اولدی تقرّبده قربِ ادنایه
دالنجه اون ایکی بر حق وصی سی نسبتیله
مه و نجوم اولوب شمسِ عالم آرایه
هامی پیمبره تک تک هاموسی وارث اولوب
آتوبلا صورتی پابند اولوبلا معنایه
کسوبله علقهء دل ، جمله ماسواللهدن
سالوبلا شوق فقط وجه ربّ اعلایه
ایناموسان گذر ائت، حبس گاهِ بغداده
نظاره قیل او محبسده کی زوایایه
وجودِ حضرتِ موسی ابن جعفره بیر باخ
وار ابتلاسی نه چوخ محنت و بلایایه
بویوندا سلسله، کُنده ایاقدا، اون بیر ایل
لوای حمدی سرافراز اولوب ثریّایه
دیر همیشه خدایا بو گرشهء وحدت
چوخ آز نصیب اولوب عالمده چوخ اَخِلّایه
سپاس بی حد و پایان اولا جلالتوه
یتورموسن منی اَنعَم و عطایایه
گوزومده گوشهء زندان، تمامِ دنیادور
خوشام رضایتویله ها می قضایایه
حقیقتا عجبا دور چرخ وارونه
عجب علاقه سالوب اهلِ عشق ایذایه
ایدور جفائیله مالک رقابی زندانی
ویرور تسلّطیله تاج و تخت ، ادنایه
سالور او حالته موسی ابن جعفری هارون
غمی مؤثر اولور ، قلبِ سنگِ خارایه
او گونکه چرخ دولاندی مراد هارونه
لوای بخت سالوب شوم فرقینه سایه
مرتّب ایلدی بیر مجلس ملوکانه
که نفس خواهشی بستیدی بیرجه ایمانه
گلوب او مجلسه ارکان دولتی یکسر
حضوره امریدی چون جمله پیر و برنایه
باخوب او مجلسه چشم نشاطیله دوشدی
غروریله دولی باشی غریبه سودایه
دیدی او باده ی وجد و سروریدن سرمست
وار احتیاجی بو بزمین ابوعطاهایه
گلیدی شعر اوخییدی سروریم آرتیدی
یتیدیم عمریده بو گون هامی تمنّایه
ابوعطاهیه هارون زمانی شاعریدی
حکیم و عالمیدی فرض ایتمه ادنایه
اولیدی هر نجه بیر مجلس ملوکانه
اونی ایدردیله احضار او بزم کبرایه
کیدوب گتوردوله هارونیدن اولوب مامور
همان او بزمه برازنده شعر و انشایه
بداهتاً نچه اشعار ایلدی ایراد
که محتویدی او اشعاری چوخ مزایایه
دیدی خلیفه نه قدری بدنده روحون وار
یته بولرسن هامی عیش و نوش دنیایه
اولوب بو شعریده خندان و شادمان هارون
اورکدن ایلدی تحسین او نطق گویایه
ادامه ویردی کلامه او مرد روشندل
ایکیمجی شعره ایدوب پند مرگی پیرایه
ولی او وقت او که روحون بدندن آیریلدی
قویالّا جسمیوی ظلمات تحت غبرایه
اولار یرین حشراتی انیس قبر سنه
گیدر وجودیوین اعضای نرمی یغمایه
خلیفه اوندا بولرسن جهاندا نیلموسن
هدر کیدوب بو گرانمایه عمر سرمایه
دگیشدی حالینی فوراً بو شعر هارونین
چکوب سس آغلادی، آخدی سرشکی سیمایه
دیدی بو شعریوی ایله دوباره سن تکراری
دوادی دلده کی بیر درد بی مداوایه
دوباره سویلدی، آغلوب گینه او دل مرده
گوروب او ناصحی زیبنده بذل و اعطایه
دیدی نه ایسته سن ایسته عطا ایدوم سنه من
ولو خلافتیم اولسون دل آچمارام لایه
جواب ویردی که دنیانی ویرسن ایستمورم
ولی بو عرضیمی قویسون خلیفه اجرایه
نه وقته جان قالاجاق بو غریب زنداندا
نه قدری صبر ایده جاق ظلم تاب فرسایه
ایدوبدی گوشه ی زندانی اون بیر ایل منزل
بو مدّتی نه گوروب گون نه بیر باخوب آیه
ووروبلا بوینونا زنجیر، ایاقینه کونده
روا دگل بو ستم جسم بی توانایه
قالوب بیر عمردی حسرت عیالینون یوزینه
باخار بویونداکی زنجیره کونده ی پایه
مرخّص ایله گیدوب بیر بالالارین گورسون
بو امر خوش گلی پروردگار دانایه
جواب ویردی عجب امری یادیمه سالدون
رضای حقدی یتورّم سنی تمنّایه
صباح گل یازارام محبسه که موسانی
خلاص ایدوب سنه ویرسونله یولّا بطحایه
دیر او شخص قییتدیم کمال وجدیله
که توشه سالدیم اله رستخیز کبرایه
دیردیم اوز اوزیمه چوخ بویوک سعادتدور
نصیب اولوب منه، جای ثنادی یکتایه
پیمبر اوغلونی محبسدن ایلسم آزاد
یتر باشیم ایکی دنیاده عرش اعلایه
خلاصه صبح آچیلدی فریضه ایتدیم ادا
گیدردیم عهد خلیفه یتیشسون ایفایه
خیال خامیله من رهسپاریدیم ناگاه
مصادف اولدوم عجب وقعه ی غم افزایه
ساتاشدی گوزلریمه یولدا دورت نفر حمّال
که دوردی حاملیدی بیرجه نعش بالایه
قویوب جنازه نی بیر نردبان کوتاهه
او حالیله که اولار شرحی خجلته مایه
دیدیم خدا گوره سن هانسی بیر غریبدی بو
دیار غربت آرا رحلت ایلوب عقبایه
آدین سوروشدوم اولاردان بیری جواب ویروب
غریبدی اوزی، لیک آدلاناردی موسایه
بو قدر بیز بولوروخ اصلیده مدینه لیدور
همان مدینه که منسوب اولوبدی طاهایه
دیولّه گوشه ی زنداندا جان ویروب بو غریب
الی یتیشمیوب اهل و عیال و قربایه
دیدی سیزون دیدیقوزدان پیمبر اوغلودی بو
بتر حسب نسبی ، مرتضایه زهرایه
علاوه اوز اجلیله وفات ایلمیوب
ویروبله زهر جفا بو غریب و تنهایه
قویون یره سیزی تاری جنازه سین باری
گیدون خبر آپارون شهریده احبّایه
گلوب اماملرین عزّتیله دفن ایده لر
روا دگل بو اهانت بو شاه والایه
دونوب صبایه طرف سویلدی او مرد حکیم
که ای پیام آپاران شهرهای دنیایه
صبا مدینه ده زهرانی گیت خبردار ایت
نه خواب نازدی بغداده گل تماشایه
یتوب شهادته اوغلون اوزون نمازینی قیل
همی خبر ویر آناسی بتول عذرایه
گلوب اوغول باشی اوستونده باشینی آچسون
نیازمند اولی چون هبر غریب ، ثکلایه
همین خبر بو قدردی یازوبدی (ذهنی زاد)
عیاندی کسر خبرده ، خبرده دانایه
- دوشنبه
- 8
- شهریور
- 1400
- ساعت
- 23:30
- نوشته شده توسط
- یوسف اکبری
ارسال دیدگاه