ای خدا زندانیده محبوس بی تقصیره باخ
جان وئرن وقتیمده بو بوینومدا کی زنجیره باخ
شاهد اول سن گور نئجه هارون منی مظلوم ائدوب
بیر اوزون مدّتدی بو زندانیده مغموم ائدوب
عاقبت مین جور و ظلمیله بو گون مسموم ائدوب
جانیمه زهر عداوت ایلین تآثیره باخ
شکر اولا درگاهیوه ای خالق ربّ جلیل
سن کریم پروردگار و منده بیر عبد ذلیل
قالمیشام اولادیمه حسرت اؤزوم زار و علیل
گوشۀ زندانیده احوال عبد پیره باخ
سالدی زندانه منی اول ناکس بی شرم و عار
مین جفائیله ائدوبدور محنت هجره دچار
خلقه اسلامیّتین هر لظه ایلر آشکار
بی حیا هارونیده بیر حیله و تزویره باخ
دمبدم هارون الیندن یوز وئرور ذلّت منه
آرتوری ظلم وستم هر لحظه هر ساعت منه
حلقۀ زنجیر و کنده اولدی هم صحبت منه
آه آتشباری گور بیر نالۀ شبگیره باخ
هجر معصومه خدایا منده قویموب اختیار
گوزلریم یولدا قالوب یوخ بیر غمین و غمگسار
بی کسم توپراقلار اوسته ایمدی ئولّم خوار و زار
کنده و زنجیر ظلمه باغلانان نخجیره باخ
هر بلا گلسه رضایم وار بو جانه منّتی
لیک چوخ دلتنگ ائدوب اوغلوم رضانون فرقتی
نوش قیللّام دمبدم جام و بلا و محنتی
ملک جسمیمده سپاه غم ائدن تسخیره باخ
عرض ائدوب راز و نیازین حضرت معبودینه
عاقبت ائتدی وفا اؤز وعدۀ معهودینه
تاپشوروب جان نقدینی اولدی بو سودا سودینه
قتلینه هارون بی دین ایلین تدبیره باخ
جان وئروب زندانیده گر چه امام هفتمین
دفن ائدوب نعشین سلیمان دوتدی ماتم دلحزین
جانو ئرنده کربلاده تشنه لب سالار دین
هر زمان سویلردی یارب گردش تقدیره باخ
عهدیمی باشه یتوردوم ای خدای مهربان
من خریدارم اؤزوم هر ظلم ائدللر کوفیان
ایمدی وئرّم خنجر برّان دمینده تشنه جان
بارالهی پیکریمده زخم تیغ تیزه باخ
گرچه یوخ بیر رحم ائدن ای خالق ربّ رَئوف
دیدۀ زینب کیمی آغلار جراحات سیوف
مین بئله یاره دگه هرگز دئمم بیر کلمه اوف
خاک و خون ایچره دوشن اعضانی گور تخمیره باخ
راضی ام شمر ستمگر زینب غم پروری
قولّاری باغلی دولاندیرسون پیاده چوللری
چخماسون دیندن کناره جدّیمون امّتلری
عاصیان ، غم دفترینده ایلین تحریره باخ
(کهنمویی) قورتولاندور نچّه گون عمرون یقین
دوت حضور قلبیله موسی ابن جعفر دامَنین
مطلع اشعاریوی یاز بیرده آخرده غمین
بارالهی حبسده محبوس بی تقصیره باخ
- دوشنبه
- 8
- شهریور
- 1400
- ساعت
- 23:45
- نوشته شده توسط
- یوسف اکبری
- شاعر:
-
مرحوم سیّد حسین کهنمویی
ارسال دیدگاه