خدایا اِذن ویر تا حجّت ارض و سما گلسون
عدالت پرچمی اَلده وصیّ مصطفا گلسون
اماندور قویما قالسون منتظرلر گوزلری یولدا
آقام مهدینی یولّا درد عُشاقه دوا گلسون
ئوزون آگاهسن چوللرده سرگردان گزیر مولا
گوزَتلور تا کی سندن اذن آلوب اول مه لقا گلسون
هامی مستضعفین عالمی قید اسارتّدن
خلاص اِیتماقلیقا اول وارث شیر خدا گلسون
قالیب اهل تشیّع بی کمک ای خالق عالم
کرم قیل عنقریباً سرور اهل وَلا گلسون
الینده ذوالفقار آتشین حیدر کرّار
بنای کفری ویران ایتماقا اول مقتدا گلسون
پیاده ایلَسون احکام اسلامی بو عالمده
عدالت مظهری اسطوره مهر و وفا گلسون
سرافراز ایتماقا دنیا اوزونده پرچم دینی
امام عصر تک فرمانده کلّ قوا گلسون
دلینده ذکر جاءالحق الینده پرچم توحید
لوای باطل کفّاری ازدم یخماقا گلسون
دوتوبدور یر یوزون ظلمت تاپوب ظلم و جفا رونق
جهانه سالماقا ائوز نورینی شمس الضّحا گلسون
تاپوب جرأت جهاندا قان توکنلر قان توکور یکسر
هامی یول گوزلوری شاه جهان قان آلماقا گلسون
بیر عده دین آدیله ایستوری دینون اِئوین یخسون
جهان حسرتده دور تا حافظ دین خدا گلسون
اولار ایستولّه شیعه یر یوزونده پایمال اولسون
بجای شیعه بو دنیایه نسل اشقیا گلسون
ئوزون امداد ایله یارب جهاندا اهل اسلامه
داخی بیر بیله قویما جرأته اهل جفا گلسون
و بیرده حکم ايله عصرین امامی تا ظهور ایتسون
اونون گَلماخلیقیلَن عالمه صلح و صفا گلسون
قاپوندا بندهء شرمنده دور (رزاقی) یا ربّی
آچیب اَل ایستوری سَندَن گل خیرالنسا گلسون
- سه شنبه
- 9
- شهریور
- 1400
- ساعت
- 11:7
- نوشته شده توسط
- یوسف اکبری
- شاعر:
-
ستار رزاقی
ارسال دیدگاه