ای محبت ملکونون سلطانی مولا یا حسین
ای آدی هر دردیمون درمانی مولا یا حسین
ای وئرن دینین یولوندا یار و انصارین فدا
ای ائدن انسانلارا تعلیم اخلاق و وفا
جانیمیز اولسون سنین ایثاریوه قربان آقا
همتین حفظ ائیله دی قرآنی مولا یا حسین
تا جهان وار پاک آدین رونق وئرور محفل لره
فخر ائدیر شیعه سنین تک بیر مقدس رهبره
مکتبین عزتدی، غیرتدی، صفادی یکسره
ائتمیسن حقین یولون نورانی مولا یا حسین
تا نفس وار آدیوی ذکر ائیلماقدان دویماروق
قاره کوینک فخریمیزدور بو لباسی سویماروق
چپ باخا بیر کس بو تشکیلاته بیر آن قویماروق
بیز سنه وابسته یوخ هر آنی مولا یا حسین
ای طریق عشقیده یاریله یولداشدان گئچن
هم اوغول، هم با وفا غیرتلی قارداشدان گئچن
ذلته باش اگمیبب، جاندان گئچن، باشدان گئچن
جان عالم جانیوین قربانی مولا یا حسین
ای اورک قانیین ائدن شوقیله قرآنه نثار
ای وئرن کرب و بلاده دین حقه اعتبار
ظالمه باش اگمیین اهل ولایه افتخار
سنده دورعشق اهلینین رضوانی مولا یاحسین
ای جمال اللهه مظهر جلوه حی ازل
ای آدی شیرین، جمالی هر گوزل لردن گوزل
سن عزیز آل طاهاسن حبیب لم یزل
فتح ائدیب عشقین هامی دنیانی مولا یا حسین
منکر و معروفه خاطر ائیلدون بیر انقلاب
تا اولا روشن حقیقت اهلینه راه صواب
باجی قارداش ائیلدیز تعلیم قرآن و حجاب
آیدین ائتدین کفریدن، ایمانی مولا یا حسین
گون کیمی تاریخیده شخصیتون تابنده دی
تا قیامت عشقیویله قلبلر آکنده دی
تا جهان وار مکتب کرب و بلا پاینده دی
آدین اولموش دیللرین عنوانی مولا یا حسین
سن بیزیم اربابیمیزسان بو سعادت دیر بیزه
هر ایکی عالم آدین شان و شرافت دیر بیزه
عشق پاکین کیمیادی نور و رحمت دیر بیزه
حسنوین یئر گوی اولوب حیرانی مولا یا حسین
سن امیر ماسواسن سیدی نعم الامیر
قیل کرم سن شاه عالم منده مسکین وفقیر
کربلا آدی گلنده لاله تک قلبیم اسیر
دست خالی ائتمه بو نالانی مولا یا حسین
بیر نولار که غصه وغمدن اورکلر دینجله
هیئتی لر دسته جمعی قبریوه مهمان گله
قبریوی هر اربعین (مدهوشه) ده ائله صله
قویما قالسین دردیمیز پنهانی مولا یا حسین
- سه شنبه
- 9
- شهریور
- 1400
- ساعت
- 11:32
- نوشته شده توسط
- یوسف اکبری
- شاعر:
-
محمد هوشمند
ارسال دیدگاه