چون کربلایه شاه شهیدان مدینه دن
عزم ایلدی او خسرو دوران مدینه دن
چکدیله چاوشان قضا بانگ الرّحیل
عرشه یتیشدی ناله و افغان مدینه دن
تا کربلا آدین ائشیدوب چکدی زینب آه
یا شعله چکدی آتش سوزان مدینه دن
دوردی عروس،ناوک مژگانه خونِ چشم
توشه گوتوردی لؤلؤ مرجان مدینه دن
خوانِ بلایه دوزدیلر انواع درد و غم
اهل جفا چاغیردیلا مهمان مدینه دن
کرب و بلا ده حرمله پیکانه سو وئرور
گؤزلر که گلسین اصغر عطشان مدینه دن
دوتسون فراتی خصم،نه غم،چون فرات وار
جاری دی ،اشک زینب نالان مدینه دن
بس که مدینه اهلی بو احواله آغلیوب
دریای اشک ایلدی طوفان مدینه دن
آچدی محمد حنفیه زبان عرض
گل گئتمه یا اخا سنه قربان ،مدینه دن
فدا اولوم سنه یاخشی دگُل هوای عراق
آماندی گئتمه که عشاقه چوخ چتیندی فراق
هنوز دویمامیشوق یاحسین وصالوندن
نه نوع گؤز گوتوراقبیز گُلِ جمالوندن
باشوندا واردی کیمون شور عشقی ای قارداش؟
که ال چکوب گئدیسن بیله مُلک و مالوندن
بئله که سن گئدوسن قان ایگی گلور قارداش
دیار کرب و بلا ،کشف اولور مقالوندن
خطر ائدور بو سفر عرضیمی ائشید،گئتمه
چوخ احتیاط ائدرم شوکت و جلالوندن
خدا نکرده اگر باشیوه بیر ایش گلسه
محافظت کیم اولور بو بولوک عیالوندن؟
علیّ اکبره باخدوقجا گؤزلرون یاشالور
بویور گؤروم نه گئچر دم به دم خیالوندن؟
علیّ اصغره باخدوقجا غصه ناک اولوسان
بیر اوزگه فکره سالورسان منی ملالوندن
ائشیتدی قارداشینون عرضین اول خجسته جناب
آچوب زبان گهربار،بیله وئردی جواب
ائشیتدی قارداشینون عرضین اول خجسته جناب
آچوب زبان گهربار ،بیله وئردی جواب
دوست راهنده نه یالقوز خانماندان گئچمیشم
بلکه من جانان یولوندا باش و جاندان گئچمیشم
شمر سیلی ویرسا تاپشورّام سکینم اوف دئمز
من جفایه طالبم ،آه و فغاندان گئچمیشم
گر قاریشسا اکبرین قانی ،حبیبین قانینه
راضیم من،حق بیلور،پیر و جواندان گئچمیشم
اوز قوجاقیمده آپارّام تا که دشمن اؤخلاسین
من علی اصغر کیمی شیرین زباندان گئچمیشم
قوی بَلَشسین قانینه قولسوز علمداریم منیم
قارداشیم عباس تک سروِ رواندان گئچمیشم
ائتسه لر یوزمین خطا ،راه وفاده نوشدور
بیر بلاکش عاشقم من امتحاندان گئچمیشم
طالب جانان ایچون دنیا ندور؟ عقبا ندور؟
عاشق یکرنگم و هر دو جهاندان گئچمیشم
عین مطلوبیم منیم ،عین رضای دوست دور
عشق بازارینده هر سود و زیاندان گئچمیشم
ویرسالار مین زخم کاری سینمه خوشدور منه
حق یولوندا من بو جان ناتواندان گئچمیشم
رسول روضه سین اول نور دیدهٔ زهرا
زیارت ایلدی،عرضْ قیلدی یا جدّا!
مرخص ائت منی که مبتلای هجرانم
مسافِرِ رهِ کویِ وصالِ جانانم
سنون بو روضهٔ پاکون ،غم فراقنده
اگرچه ظاهر صورتده دیده گریانم
ولیک خدمتیوه عازمم حقیقتده
او دور که باطن معناده شاد و خندانم
چک انتظاریمی،گئچمز او قدر وقت که من
سنه بهشتیده مجروح و تشنه مهمانم
او عهدنامهٔ حقه اطاعتیم واردور
که من بیر عبد ذلیلم ،مطیع فرمانم
بو افتخار منه بسدی ،یا رسول الله
سنه مطیعم و الله یولوندا قربانم
ستمله قانی آخان طشتِ دشت یحیایم
بساط عشرتی باده گئدن سلیمانم
بلا چولونده نزول ایلرم که صرصر ظلم
ائدن هامی ورَقین پاره پاره قرآنم
منای عشقه علی اکبر آدلی اسماعیل
آپارّام ائتمگه قربان خلیل دورانم
نه قدر تیر جفا گلسه سینمه ویرّام
هجوم ائدنده بلا ،یکّه تاز میدانم
یانیمجا زینب و کلثوم کربلایه گئدر
که همدم غم و همراه آه و افغانم
او دم که دمده که گویا آچیلدی پردهٔ راز
که گلدی قبر نبی دن بو نوعیلن آواز
گرک بو یولدا اوغول آه و ناله کیم چکه سن
تحمل ایلیه سن ،شمردن ستم چکه سن
مباد اینکه دلِ قاتل اینجیسون سندن
کسنده باشیوی خنجر دمنده دم چکه سن
گؤزون باخا باخا دوغرالّا نوجوانلاریوی
او گون کی گونده اوغول سن مباد غم چکه سن
بلا چولونده گرک باش و جانیدن گئچه سن
مباد عرضهٔ تسلیمیدن قدم چکه سن
نظرده ایستیه سن قالمیا به غیر از یار
اوز اختیاریوه باشدان گرک قلم چکه سن
یتور سفارشیمی زینبه که سنده قیزیم
گرک تحمل ائدوب محنت و اَلم چکه سن
بلا چولونده علمدارسیز قالاندا حسین
مباد شعلهٔ آهونله سن علم چکه سن
گئدنده باشی آچوق راه شام شومه گرک
نقاب وار اوزه زلف خم به خم چکه سن
به عزم شام قیلوب آفتاب پیغمبر
وداع مشرقِ قبر جناب پیغمبر
عزم عراق ائدوب شهِ گردون فر ،آتلانور
طبل رحیل چون دوگولور،لشکر آتلانور
صاق وصولوندا ،جمله جوانان هاشمی
دعوا لباسینی گینور یکسر آتلانور
آلمیش الینه قامت رعناسی تک علم
عبّاس نامدارِ وفا پرور آتلانور
اول دمنده بیر سمند سبک خیز خوش مرام
زین ائتدی خادمان،که علی اکبر آتلانور
گویا گؤرن دیردی اولور رفرفه سوار
معراج عزمینه گینه پیغمبر آتلانور
مین عزتیله چشم رکابه قدم قویار
درّ یتیم،او قاسم مه پیکر آتلانور
چون اهل بیت اگلشی،زرّین کجاوه ده
پیکان هواسی ایله علی اصغر آتلانور
فکرون گینه نه ائتدی تصور #شکوهیا
سیلاب وار ،اشکِ دو چشمِ تر آتلانور
#وداع_با_فاطمه_صغری_علیها_سلام
سیندیردی سنگ حسرتیله فاطمه باشین
دوتدی باباسینین اتگین توکدی گؤزیاشین
دئدی یواش گئت ایشیم اولدی آه و ناله بابا
غم فراق سالوب گؤر منی نه حاله بابا
سالوبسان ایندی که گؤزدن،سنده قوی باری
اوپوم ایاقون ،ایاق ساخلا لامحاله بابا
خوشا او گونلره مسروریدیم وصالوندن
بیر آیریلیق غمی دوشمزدی هئچ خیاله بابا
اولوبدی ایمدی گونوم قاره،طالعیم قاره
فراق الینده نئجه گلمیوم ملاله بابا
سکینه نی آپارورسان،منی قویوب گئدوسن؟
مگر تفاوتی وار التکین عیاله بابا؟
یانوندا خاطر منظوردور سکینه قیزون
کنیز آپار منی باری او مه جماله بابا
علیّ اکبرین ابروسینون خیالی منیم
بوکوبدی قامتیمی،دؤندروب ملاله بابا
#جواب_امام_حسین_علیه_السلام
آتاسی باغرینا باسدی،او طفل بیماری
سیلوب نه لطفیله گؤزیاشین ائتدی دلداری
بویوردی آغلاما چوخ ،گلمه آه و زاره قیزیم
سرشک چشمووی توکمه بو گل عذاره قیزیم
سنون سکینه کیمی تاب و طاقتون یوخدور
دؤزنمه سن ستمِ شمر نابکاره قیزیم
عروس سینه سینه داغ اوسته داغ چکر
سکینه باشه سالور قاره اوسته قاره قیزیم
گؤرنمسن علی اکبر فراقینی نئجه بس
گؤرر سکینه اولوب نعشی پاره پاره قیزیم؟
قضادن اولدی سنون قسمتون فراق،گرک
ئولینجه گؤز تیکه سن راه انتظاره قیزیم
حیات باقی اولا،یولّارام علی اکبر
سنی گلور گتورر من گئدن دیاره قیزیم
چکر همیشه گوگُل حسرتون فراق گونی
نئجه که مرغ خزان گؤز تیکر بهاره قیزیم
محمل کشان راه بلا چون اولوب روان
یوکلندی بار خانهٔ غم کوچدی کاروان
متاع مهر و وفا میر کاروان آپارور
نه احتشامیدی بو شاه کامران آپارور
بلای چرخ اولو بازار کربلاده رواج
که طالبان غم و درد نقد جان آپارور
منای عشقیده سئچمز حبیبین اکبردن
فدای دوست ایچون پیریلن جوان آپارور
دیار کوفه ده شمرین جفاسی آز گورونور
یانیجا ایلمگه ظلم،ساربان آپارور
نئجه سکینه ،نئجه فاطمه ،نئجه کلثوم
مجسم آهیله فریادیله فغان آپارور
خمیده قامتیله زینب دمادم آه چکر
که دشمن اوسته عجب تیر ،عجب کمان آپارور
عروسه خصم نچون بیرده تازیانه ویرار
که گوشواره سینی شمره ارمغان آپارور
آناسی اصغره سو چوخ وئرور که قوّت اولا
ضعیف طفلیدی پیکان دگنده قان آپارور
ائدوبدی زلفینی چین چین قطاس تک داماد
سنان ایچون نه عجب تیر و نه کمان آپارور
- سه شنبه
- 9
- شهریور
- 1400
- ساعت
- 11:38
- نوشته شده توسط
- یوسف اکبری
ارسال دیدگاه